«Куке уждэ яратӥд, соку одно ик шудо адями луиськод»

Куддыръя со нылпилы анай-атаез воштӥсь адями но луэ. Трос нылпиос понна сыӵе яратоно дышетӥсь луэм но луэ Покчи Лӧзя школаын кема аръёс ӵоже покчи классъёсты но математикаез дышетыса ужам Медведева Нина Петровна. Дышетӥсьёслэн ӧнер праздниксы азьын, со «Азьлане» газетлы интервью сётыны соглаш луиз.

«ДЫШЕТӥСЬЁСЛЭН УКСЁЗЫ УНО»

Тросэз нылпиос пичи дыръязы асьсэды пӧртэм ӧнеръёсын утьыса шудо. Кин врач луэ, кин — визьнодась, нош Нина Петровна пичи дыръяз шудыкуз но дышетӥсь луэм ини. Юлтошъёсынызы люкаськыса «дышетскиллям», дышетӥсьёслэн выллем чебер причёскаос но кариллям, эсьмаса. «8-тӥ классэз йылпумъям бере, анае мыным шуиз: «Мон уксёлы ёрмыса улӥ. Тон дышетӥсьлы дышетскыны мынод, дышетӥсьёслэн уксёзы уно».  Соку дышетӥсьёс, зэмзэ но, ӧжыт уксё уг басьто вал», — шуэ гажамон дышетӥсь. Верамын — каремын. 8-тӥ классэ йылпумъямез бере (со луэ 1974-тӥ арын), егит ныл Арча педучилищеын дышетскыны кутске. Шудэзлы луыса, валче дышетсконо эшъёсыз но умой луо, дышетсконэз но Ниналы кельше. Со сяна, баскетболэн но шудыны ветлэ, пӧртэм городъёсы но вуылэ — огъя вераса, студент улонэз солэн «пӧзе».

Нина Петровна 1978-тӥ арын Арчаысь педучилищеез быдтэ но нырысь отын ик кык ар ӵоже профсоюзной ужась луэ. 1980-тӥ арын Ушма гуртысь покчиёзо школаын подготовительной классэн одӥг ар ужа, собере Покчи Лӧзяысь школаын начальной классъёсты дышетыны кутске. Татын ини 2016-тӥ арозь ужа: 90-тӥ арозь покчи классъёсты дышетэ, собере завуч луыса ужаны кутске. Одӥг ар дышетон ужъёсъя, нош собере — визьнодан ужъёсъя директорлэн воштӥсез луэ. Но 2002-тӥ арын Нина Петровна та ужлэсь куштӥське, математикаен дышетӥсь луыса гинэ ужа (Арчаысь педучилищеез йылпумъям бераз, Нина Петровна КГУ-ысь физико-математической факультетэз но заочно йылпумъя). «Анай больницаын санитарка луыса ужаз, атай — гумырез ӵоже колхозын. Соослэн монэ дышетыны уксёзы ӧй вал, соин заочно гинэ дышетскыны пыри», — тодаз вае Нина Петровна.

МАТЕМАТИКА ЯКЕ ПОКЧИ КЛАССЪЁСТЫ ДЫШЕТОН: КУДӥЗ ТУНСЫКОГЕС

Та юанлы Нина Петровна кема малпаськытэк ик ответ сётӥз:

— Покчи классъёсын ужам ужед адске, соин татын тунсыкогес но, дыр. Нылпиос азьло школае лыдӟыны но, лыдъяськыны но быгатытэк лыкто вал. Пиналъёс лыдӟыны дышетско ке — тынад ужам ужед адске. «Таблица умножения» дышетскизы вылэм — нош ужам ужед адске. Соослэсь вормонъёссэс, быгатонлыкъёссэс адӟыса, дышетӥсь макем шумпотэ ук. Нош 5-тӥ классэ лыктыкузы ӝыны классэд со таблицаез уг тоды ке, начальной классысь дышетӥсьёс ужамтэзы шуыса малпаськод ни. Но мон уг вераськы, математикаез дышетыны тунсыко ӧй вал шуыса. Котькуд предметлэн аслаз тунсыко моментъёсыз вань. Математикая али пенсие потэме бере но мон доры репетиторствое ветлӥсьёс луизы, — шуэ дышетӥсь.

Туннэ нуналэ со доры репетиторствое уг ветло ке но, та внукъёсыныз пукеменыз гинэ валэктӥське. Нина Петровна — визьмо но валась, покчи классъёсын дышетскисьёсын но, озьы ик бадӟым классъёсын дышетскись школьникъёсын но огъя кыл шедьтыны быгатӥсь дышетӥсь луэм. Зэм, бадӟым классъёсын солэн одӥг гинэ выпускез луэм, нош покчи классъёсты дышетыкуз выпускъёсыз трос луиллям. «Сыӵе ужен аслам нылпиослы гинэ котьку дыр уг тырмы вал», — жалянзэ ватытэк шуэ вераськоно муртэ. 

«МОН ИДЕАЛЬНОЙ ДЫШЕТӥСЬ ӧЙ ВАЛ»

«Мон идеальной дышетӥсь ӧй вал», — ватытэк вера Нина Петровна. — Гумырад улӥськод, гумырад дышетскиськод, озьы но дышетскон уг тырмы али. Ини сомында аръёс ортчыса, соку тазьы кароно вал, соку тазьы кароно вал шуыса малпаськод».

Дышетӥсьлэн верамезъя, арысь аре дышетӥсьёслы нылпиосын ужаны секытгес но секытгес луэ. Соосты дышетсконэн тунсыкъяськытыны быгатыны кулэ: нырысетӥез, дышетӥсь аслэсьтыз предметсэ яратыны кулэ; кыкетӥез, нылпиосты, кыӵе гинэ ӧз луэ ке но, соосты яратоно. «Котькуд нылпилэн аслаз сямыз. Куд-ке дыръя небыт кылын вазиськод, куддыръя кужмогес куарадэ поттӥськод. Мынам ас дышетскисьёсме сюдэме но вань али. Но та ӝожтӥськыса но веран ӧвӧл, ушъяськыса но веран ӧвӧл. Мынам таин вераме потэ, ужакум кыӵе гинэ дыръёс но ситуациос ӧз луэ ке но, мон котьку шудо дышетӥсь вал шуыса. Куке уждэ яратӥд, соку одно ик шудо адями луиськод. Ужаны шумпотыса мынӥськод. Коллективед но умой луиз ке — вераса быдтонтэм шудо адями луиськод. Монэ ужаны басьтӥз Пётр Васильевич Байтуганов, со соку Покчи Лӧзя школалэн директорез вал. Зинаида Андреевна Савельева завуч вал, со кошкиз но, мон ӵапак со интыын завуч луыса ужай. Собере организаторе кӧчи. Анатолий Васильевич Степанов завуч луыса лыктӥз. Куспамы туж юн тупаса ужамы, та адямиосты но, ваньзэсты мукет дышетӥсьёсты но, умой кылын гинэ тодам вайисько».  

МЕДВЕДЕВЪЁС — ДЫШЕТӥСЬЁСЛЭН ДИНАСТИЗЫ

Районын Медведевъёслэсь семьязэс умой тодо. Озьы ик тодо, соос пӧлын туж трос дышетон удысын ужасьёс вань шуыса. Та сярысь но Нина Петровналэсь юатэк ӧйлась.

— Мынам аслам выжыям атайлэн выныз гинэ дышетӥсь луэм. Со кулэм бере, мон гинэ кыли ни. Нош тани кузпалэлэн выжыяз дышетӥсьёс туж трос. Картэлэн сузэрыз дышетӥсь — Тамара Валентиновна Плотникова, Покчи Лӧзя школаын ӟуч кылъя но литературая дышетэ; апаезлэн нылыз но, Вероника Вениаминовна Егорова, Покчи Лӧзяын географиен дышетэ. Атайзылэн ..., Людмила Ивановна Мухина, Покчи Лӧзя школаын ик ӟуч кылъя но литературая дышетӥсь луыса ужам. Бабаймылэн нылыз, Анна Кузьминична Ишмурзина, кунгож кылъёсъя дышетӥсь луэм... Милям асьмелэн нылпиосмы но кыкназы ик дышетӥсьлэсь ӧнерзэ бырйизы — нылы Надежда Николаевна ӟуч кылъя но дышетӥз, табере, переквалификация ортчыса, историез дышетэ. Пие, Евгений Николаевич, дышетскемезъя информатикая дышетӥсь. Али дыре ӧнерезъя уг ужа ке но (Евгений Николаевич Балтасьын полициын ужа — Н. Ж.), ужез компьютеръёсын герӟаськемын.

Нина Петровналэн нылпиосыз, анайзы шоры учкыса, дышетӥсьлэсь ӧнерзэ бырйиллям. «Бен, озьы луэ ни», — серекъя Нина Петровна. — Дышетӥсьлэсь ужзэ ми умой тодӥськом». Нылыз Надежда педучилищеез йылпумъям. Нина Петровналэн верамезъя, педучилищеез йылпумъяса, опыт луэмысь, школаын ужаны капчигес луэ. Евгений пиез институтын физматэз быдтэм. Анайзы соослы огпол но дышетӥсь эн луэ шуыса верамтэ. Малы ке шуоно ачиз та удысын капчиен ужам. Со но нылпиосты яратэм, нылпиос но сое яратӥллям.

— Дышетӥсь луиды шуыса ноку но ӧд жалялэ-а? — юасько.

— ӧй. Ноку но ӧй жаля. ӧкынэме ӧй вал. Мон аслэсьтым ужме туж яратыса ужай. Нылпиос — улонысь тужгес бадӟым шумпотон. Соосын ужаны туж тунсыко вал. Котькуд дышетӥсь школьникъёссэ ас нылпиоссэ кадь яратӥз ке, соос куспын ноку но валантэмъёс уз кылдэ.

Врезка

Нина Петровна 1982-тӥ арын, ини школаын ужакуз, картлы кошке. Солэн кузпалыз, Николай Валентинович Медведев, дышетон удысэн нокызьы но герӟаськемын ӧвӧл. Со гумырез ӵоже колхозын ужам тракторист луыса, фермаен но кивалтэм. Кузпалъёс ини 37 ар ӵоже валче шудо улонэн уло. Кык нылпи будэтӥзы, туннэ нуналэ кык внукъёссы но будо.