Кыӵе умой — тон вань: яратоно анай кылмы

Та сярысь радио пыр но верало, телевизор пыр но возьмато. Асьме трос йӧскалыко ёросамы но таин валче ини толшорысен ик ужрадъёс ортчытӥськыны кутскизы. Одӥгаз сыӵе ужрадэ мыным но шуд усиз пыриськыны.

12 тулыспалэ, Анай кылъёслэсь но калык огазеяськонлэсь арзэ усьтыса, Покчи Лӧзя нылпи садын Лебедева Евгения Ивановналэн но крезьгуръя кивалтӥсь Васильева Рамзия Салимовналэн кивалтэмзы улсын «Мынам кылэ — мынам данъяськонэ!» шуыса нимаськем лыдӟисьёслэн вожвылъяськонзы ортчем вал. Мон сяна та ужрадэ пыриськизы на ёросысь ӟучъёслэн огазеяськонзылэн кивалтӥсез Анастасия Данилова но Покчи Лӧзя нылпи садысь бигер кылэз дышетонъя визьнодась Роза Галимова. Ми тыршимы пиналъёсты удмурт, ӟуч но бигер калыкъёслэн лулчеберетэнызы но сям-йылолъёсынызы тодматыны но тунсыкъяськытыны. Тужгес кельшизы нылпиослы калык шудонъёс. Соос мылысь-кыдысь удмурт, ӟуч но бигер калык шудонъёсын шудӥзы (пӧзьыса улӥсь энергизэс кулэ ӧре лэзизы). Нош милемды соос асьсэ анай (удмурт, ӟуч но бигер) кылъёсынызы лыдӟем кылбуръёсын но кырӟанъёсын шумпоттӥзы, шумпотон мылкыд кузьмазы.

Та ужрадэ, нылпиосын ужан процессэ пыриськыса, соослэсь тунсыкъяськонэн ӝуатскем синъёссэс адӟыса, мон валай: луэ на соосты тунсыкъяськытыны анай кылынызы, калык сям-йылолъёсын но лулчеберетэн. Мылкыд но нылпиосын огъя кыл шедьтыны быгатон гинэ кулэ, дыр, шуыса малпасько. Та ласянь нылпи садысь визьнодасьёсты но, мукет ужасьёсты но ушъяме гинэ потэ, ӟуч но бигер кылын занятиос туж тунсыко нуисько. Но, жаляса верано, удмуртэз палэнэ кыле, малы ке шуоно Покчи Лӧзя нылпи сад — ӟуч кылын визьноданъя садик. Йӧскалыксыя удмурт луэм визьнодасьёс нылпиосын удмуртэн верасько ик (нылпи ачиз тодэ ке), но нимысьтыз удмуртэн занятиос ӧвӧл. Мазэ веранэз, та югдур мон понна валантэмгес, малы ке шуоно Покчи Лӧзяысь нылпи сад вань куронъёсъя этнокультурной компонентэн нылпи садлы тупа, угось отын визьнод басьтӥсь тросэз пиналъёс удмурт яке суро семьяосысь луо. Нылпи садын визьнод басьтэмзы бере но тросэз соос пӧлысь этнокультурной компонентэн Покчи Лӧзя школае дышетскыны мыно. Соин но туж умой луысал та нылпи садын но, ӟучен но бигерен кадь ик, удмуртэн но тунсыко занятиоссы луысал ке…

P.S.: 21-тӥ тулыспалэ Анай кыллэсь калыккуспо нуналзэ пусйимы. Соин валче но ёросамы, тужгес но школаосын но нылпи садъёсын, тунсыко ужрадъёс ортчытӥськизы. Интернет вотэсъёс но та нуналэ мур пуштросъем публикациосын тунсыкъяськытӥзы.