Кырӟалэ, эшъёс, кырӟалэ!

2020 арын 18 сентябре потэм газетын «Кисыын нуллымон книга-песенник» сярысь лыдӟиды ни вал, дыр. Бадӟым книгаысь та пичи книгае пыризы туала дыре тужгес тодмоесь ньыль чуръем ог 500 пала кырӟан-такмакъёс. Пӧртэм югдуръёслы тупало соос: зоутэн, сюан, лекрут, котырскыса шудон-юмшанъёслы такмакъёс, палэнысь вуыса асьме пала выжыяськем калык кырӟанъёс. Со сяна пыризы на асьме палан вордскем туала авторъёслэн кырӟанъёссы...

Кырӟанъёс пыртэмын нотаосын, эктон-юмшанъёс — суредъёсын, пуштросэзъя тыремын туспуктэмъёс, вунэм яке валантэм кылъёслы валэктонъёс сётэмын. Кисыын нуллымон тачак гинэ, мултэс зӧк но векчи но ӧвӧл, 240 бамъем книга. Праздникъёсы-юондыръёсы басьты сьӧрад но мыты кельшем кырӟанъёстэ! Эшъёслы, тодмоослы синпельлы кузьманы усто кузьым но шуыны луэ...

Книгалэн пуштросэныз тодматскон ӝыт ортчоз Сырья гурт клубын 18 июне 19:30 часэн. Пырон дуныз — 150 манет. Та уксё кутӥськоз асьтэ шоры ик — тыр ӝӧк сьӧрын кырӟаса-вераськыса пукомы, мылкыд ӝутскемъя эктомы-юмшаломы. Та ӝытэ ик книгаен вузкарон но радъямын луоз. Книгалэн дуныз 500 манет. Пичи книга чотэ пыртэм уксё кошкоз Бадӟым Книгаез поттонлы. Ӵапак соингес но вордскиз со дунне вылэ: «Юртты аслыд ачид!» — тазьыгес валэктӥз мыным Алексей Шмелёв, кылем гужем книга поттон сярысь курон-косонзэ вуттыкуз. Тау Алексей Юрьевичлы таӵе ӵектосэз аркаын потэм книга понна!

Пумиськон ӝытмылэсь пуштроссэ югдытэ книгае пырем Николай Жуковлэн «Пумиськон» кырӟанэз:

Пумиськон

(Кылъёсыз А.Белоноговлэн,

крезьгурез Н.Жуковлэн)

Пумиськыны тӥледын

Ми лыктӥмы ӟеч мылкыдын.

Милемын ӵош тӥ но, дыр,

Ӟеч мылкыдо луоды.

Припев:

Ог-огмес ке валамы,

Валчеяськоз мылкыдмы.

Медло ваньмылы шулдыр,

Мед гурлалоз сюлэмды.

Ӧръяса мылкыдъёсмес,

Вералом на ӟеч кылъёсмес.

Кырӟалом но шулдыртом,

Вань улонмес данъялом.

Мед луомы асьмеос

Вунонтэм ог-огмылы.

Вераськом шуныт кылъёсмес,

Кырӟаськом ӟечкыл гурмес.

Леонид Сапожников