Кытын будэто егит волонтёръёсты?

Шаерысьтымы котькуд адями нимысьтыз ожгар операци сярысь кылӥз ке, соку ик ымнырын воштӥське: пальпотон малпаськонэн воштӥське, нош каньыл мылкыд мӧзмонэн берытске. Озьы ке но, асьмелэн туж бадӟым кужыммы вань — шаермес яратон но огазе луон. Та ваньмыз возьматэ адямилэсь патриот мылкыдзэ. 

Волонтёръёс — туннэ нуналэ самой кулэ луись ужез быдэсто.

Юрттэт сётыны дась луэм адямиос тросгес луо, нимысьтыз ожгар операции тае эшшо но золгес шарая. Ёросын мынӥсь юрттэт сётон ӧрез нимысьтыз басьтӥм ке, татын шумпотыны луэ, малпасько. Огъя туннэ нуналлы мерлыко сетьёсын пӧртэм группаос кылдытэмын, гуртысь калык кужымзэ но дырзэ жалятэк ужа. Та зэмзэ но данъяськымон: юртъер котырысь ужъёстэ палэнтыса, аслэсьтыд люкеттэ вормонэ пыртон. Ӟеч ужъёс котьку вылӥын адӟисько, шуо. Озьы ик вань, дыр. 

Ципья шоръёзо школаысь Оксана Степановалэн кивалтэмез улсын дышетскись нылпиос кылем арын туж трос гуманитарной юрттэт люкаса ожгарчиосмылы ыстӥзы. Пичиысен ик соос ӟеч ужлы дышетско, мукетъёслы уж вылын пример возьмато. Та ваньмыз юнме ӵектэмын ӧй вал. Ӵош дышетскись эшсылэн — Даниэль пилэн — атаез нимысьтыз ожгар операцие пыриськиз. Со вакытэ Наздековъёс копак воргоронтэк кылизы. Алина — ожгарчилэн кузпалэз — кык нылпиосын кылиз. Классысь анай-атайёс но нылпиос соку ик юрттэт кизэс мычизы. Толалтэ соос ӵошен юртъер котырзэс лымылэсь мозмытыны юрттӥзы, сӥзьыл — бакча емышъёсты октӥзы. Та пример вылын адӟиськом, кызьы анай-атайёс, классэн кивалтӥсь но нылпиос огазе ӟеч уж лэсьто.
Юрттэт сётон — со ожгарчиосмы гинэ ӧвӧл ук, со нырысь ик адямилэсь ӟеч сямъёссэ но усьтэм сюлэмо луэмзэ возьматӥсь тодмет. Макем юн адями тырше, сокем тросгес солэн улоназ шундыё нуналъёсыз луо. 

Туэ, 3 классын, Оксана Степановаез воштӥз Екатерина Шамова. Азьвыл со Улисьял гуртысь нылпи сад-покчиёзо школаын визьнодась луыса ужам. Покчи классъёсысь нылпиосын ужан методикаез но усто вала, англи кылэз но тодэ, пӧртэм паласен данъямон дышетӥсь. Екатерина Валерьевна но мылысь-кыдысь басьтӥськиз юрттӥськон уж борды. Кемалась ӧвӧл классной часазы кускылиос люказы, соослэсь адӟем карыса мукет пиналъёс но та уж борды итӥськизы. Даниэльлэн атаез дораз бертэмын ке но, соос ялан юрттыны тыршо ожгарчиослы. 

Нылпиос доры пырыса юай: «Тӥ тодӥськоды-а кинлы юрттэт сётӥськоды?» «Асьмелэнъёслы», — кема возьмано ӧз луы пиналъёслэсь валэктэмзэс. Покчи классысен ик бадӟым уже итӥськемзы азьланяз но соослы пайдаё луоз шуыса оскисько.
Школаысь визьноданъя директорлэн воштӥсез — Нина Давлекова — гуманитарной юрттэт сётонъя ужез быдэстӥсьёс сярысь мыло-кыдо вераны соглаш луиз. 

— Школаын нимысьтыз ожгар операци туж секыт, со дыре ик туж кулэ луись тема. Визьнодан ужын та нимысьтыз бадӟым инты басьтэ. Милям 16 нылпиосмы нимысьтыз ожгар операцие пыриськисьёслэн пиналъёссы луо. Соослы бушын сиён радъяське. Дышетӥсьёс но ужасьёс пӧртэм паласен юрттыны тыршо, сотэк уг луы. Но, мынам малпамея, сыӵе пиналъёсты мукет пиналъёсын огкадь адӟоно, жаляно ӧвӧл, малы ке шуоно нылпиез нырысь ик пӧртэм югдуръёслы дась луыны дышетоно, со ачиз понна кыл кутыны кулэ. 3 классысь нылпиос сярысь верано ке, соос туж ӟеч уж лэсьто: коньдон но, сиён-юон но, кулэ луись арбериос но люкало, гожтэтъёс но ысто. Куддыр ми тодытэк но кылиськом. Вань люкам арбериоссэс Алина (Наздекова — Ю.Щ.) Балтасе нуллэ, волонтёръёс доры вуттэ. Нош пиналъёс доры тау шуэм кылъёс вуизы ке, соос эшшо но золгес юрттыны тыршо кадь. Сыӵе мылкыдо пиналъёс луизы ке, со туж умой. Жаляса гинэ вераны кулэ бадӟым классъёсысь пиналъёс сярысь. Соос ведь пример сётыны кулэ будӥсьёсызлы. Но улонлэн реалиосыз туж чурытэсь: дышетсконлэн нырысетӥ нуналъёсысеныз ик экзаменъёслы дасясько. Эшшо ке бадӟым классъёсысь егитъёс спортэн эшъясько, мукетызлы дырзы уг ни тырмы.

— Нош тӥ соглаш-а, котькуд пи одно ик армиез ортчыны кулэ шуыса. Со воргоронлэн инъет луись ужпумез. Та малпанэз вӧлмытон понна ик нимысьтыз ожгар операциысь бертэмъёсты ӧтчано ӧвӧл-а школае пумиськонъёсы?

— Шонер вераськод. Пиослы одно ик вордскем шаерзэ, семьязэ утьыны дышетсконо. Туннэ нуналысь югдуръёс тае умой возьмато. Тани кемалась ӧвӧл пиосмы военной сборе ветлӥзы, ас вылазы секыт ожтӥрлыкъёс нуллӥллям, туспуктэмъёсты учкыса ик валамон: шутэтскон дырзы луымтэ. Озьыен соос асьсэ вылын валазы, макем кышкыт ожлудысь воргоронъёсмылы. Ожгарчиосты пумиськонъёсы ӧтчаны тыршиськом. Но пӧртэм мугъёсъя соглаш уг луо лыктыны. Нырысь ик соос туж возьдасько нылпиос азьын вераськыны, юанъёссылы но валэктонъёс сётыны кышкалогес на. Кыкетӥез — соос уг валало, мар вераны луэ пиналъёслы. Кышкыт учыръёсты уд вера, нош умоез шер-тур гинэ луэ. Соин ялан юалляськыса гинэ улӥськом, ку соос дась луозы. Кужмысь карыны ми но ум быгатӥське, ас мылкыдзы луиз ке, ми одно ик соосты пумиталом. Та нылпиослы гинэ ӧвӧл, бадӟымъёслы но туж пайдаё луоз.

Вераськонамы кӧня ке вакытлы школалэн директорез — Раниф Ахатов — но итӥськиз

— Луэммыя ваньзэ ужаны тыршиськом. Спонсоръёсмылэн юрттэменызы тани матысь дыре мемориал пулъёслы дасям интые нимысьтыз стенд радъяськоз, отчы ожгарчиослэсь яркыт туспуктэмъёссэс интыяломы. Озьы пиналъёс но соос кадь луыны тыршозы, герой батыръёсмы котьку син азямы улозы. Котькуд школаын нимысьтыз сыӵе ужъёс нуисько, быгатыса калыклы гинэ вуттоно ваньзэ сое.

Тӥни озьы пиналъёс покчи классъёсысен ик волонтёр ужез валаса будо. Азьланяз но оскеме потэ: соос кунмы понна трос гинэ ӟеч ужъёс лэсьтозы. Нош усто дышетӥсьёслэн визьнодамзы улсын азязы пуктэм ужпумъёссы одно ик быдэсмозы.
Сыӵе ӟеч сямо но юрттыны кизэс мычыны дась луись пиналъёсты будэто Ципья шоръёзо школаын. Та понна бадӟым тау шуыны кулэ вань дышетӥсьёслы но визьнодасьёслы. Юрттон мылкыдды ноку но медаз кысы. Ӟеч ужъёсты одно ик умоен мед берытскозы. Нош вань лыдӟисьёслы сӥземе потэ вал: мылкыдтэм эн луэ! Таӵе кышкыт югдур котькуд семьяе йыгаськыны быгатэ, солэсь уд пегӟы. Но огазе луыса ог-огмылы юрттӥмы ке, асьмелэн одно ик туж кужмо но эшлыко мерлык кылдоз!