Лыз сӧзуло, голькыт сӧзуло дэреме...

Черсон, куиськон, шорт дасян, чильпаськон, керттӥськон но мукет киужъёс сокем кулэ ӧз ни луэ. Озьы ке но тросаз семьяосын тус-тас карытэк утьыса возизы вашкала дӥськутъёссэс, камализэс, дэремлы, дукеслы, зыбынлы куэм кесэгъёссэс, ӵушконъёссэс, быркенчиоссэс, ужтӥрлыкъёссэс. Туж гажасько сыӵе ӝикыт адямиосты, кудъёсыз та дырозь утьыса возизы но берыктӥзы вашкала дӥськутъёслэсь но мукет арбериослэсь данзэс. Табере туннэ соосыз туж кулэ кариськомы, бадӟым данъяськомы. Туэез но, вуоно поколение но, медаз ышты калыкмылэсь ортчем сюрессэ. Киысь кие сётыны кулэ вашкалаосмылэсь тыршыса кылдытэм узырлыкъёссэс, но валэктоно сямъёссэс-йылолъёссэс. Ӵемгес юалляськоно-вераськоно мӧйыосын, берло жаляно медаз луы ни. Котькуд нодлыко адями, пе, тодыны кулэ аслаз сизьым поколениез сярысь.

Шӧдӥське, берло дыре вордскем палам Балтась районысь удмурт гуртъёсын улӥсьёс ӵем но ӵем пӧртэм чеберлыко самодеятельной конкурсъёсы но праздникъёсы пыриськыло шуыса. Палэнэ уг кылё мӧйыос но, нылпиос но. Мон сыӵе ужрадъёсты Интернет пыр, «Азьлане» газетлэн сайтысьтыз учкылӥсько. Отысь ик адӟисько удмурт дӥськутъёсын дӥсяськыса сцена вылын быгатонлыкъёссэс возьматӥсьёслэсь туспуктэмъёссэс но. Газетын ужасьёслы бадӟым тау Интернет пыр газетын потэм гожъямъёсын, туспуктэмъёсын палэнын улӥсьёсты но тодматэмзы понна.

Но, жаляса верано луэ, куд-ог коллективъёслэн сцена вылыны возьматоно костюмъёссы удмурт дӥськутлы тупась нимысьтыз куронъёслы уг тупало. Сцена вылысен возьматоно дӥськут тужгес но радзэ валаса быдэстэмын луыны кулэ.

Кылсярысь, дэрем сӧзуллэн вылӥысь тасмаез 1 см пасьта гинэ, кыкетӥез тасма сюбег (ансыр), куинетӥез паськытгем, берпуметӥез самой паськыт (та тасмалэн буёлэз ик сётэ дэремлы ним но: лыз сӧзуло дэреме, вож яке голькыт сӧзуло дэреме шуыло), собере ини сяськаё басмалэсь паськыт сӧзул. Тасмаос куспын 2 мм кадь вис луыны кулэ. Айшетлэн сӧзулаз тасмаосыз, мукет ласянь кутӥсько: вылӥяз паськыт тасма, отӥяз сюбеггем но сюбеггем тасмаосын кутоно. Декоративной сюбег тесёмкаосты но уже кутоно луоно. Айшетлэн тасмаосыз дэремлэн тасмаосыныз одӥг линиын луыны кулэ, нош чильтэрез дэремлэсь паськыт басма сӧзулзэ мед шобыртоз (али дыре магазинъёсысь зэмос киын керттэм кадь ик чильтэръёс басьтыны луэ). Камзоллэн кузьдалаез одно ик дэремлэн вылӥ тасмаез дорозь луыны кулэ. Азьвыл серекъяло вылэм дэрем вуттӥсез, кудӥз тасмаослэсь буёлзэ сураса сӧзул кутэ ке. Туж чаклало вылэм буёлъёслэсь артэ кельшемзэс.

Та куронъёсты чакласа вурем дӥськутэн туж бадӟым сцена вылэ но потыны возьыт уз луы, муспотон пичи артистъёс но тужгес мусо адӟиськозы. Асьмеос мед быгатомы данъяськыны, ушъяськыны мукет калыкъёс азьын дӥськутъёсынымы но, быгатонлыкъёсынымы но.

Куддыр кылоно луэ: «Кыӵе-мар шедьтӥм сое ик дӥсямы, тазэ но шуген шедьтӥмы». Сцена вылэ потэм бере дӥськут одно ик чебер но радызъя луыны кулэ, туж умойтэм адӟиське вакчи ке удмурт дэрем, пыдес дорозь гинэ ке. Дэмлан сётэме потэ: кылсярысь, дэрем вакчи ке, солэн улӥяз дэремлы тупась басма итоно но со вылэ ини тасмаос кутоно, яке итэт пуктоно дэремлэн кусказ, камзол улын уз адӟиськы итэмез. Бигер калош но интыяз ӧвӧл дыр кадь потэ, чик но уг кельшы. Вашкала туспуктэмъёсты учкыса валано, удмуртъёс (кутъёсын сяна) вакчи ныро калошен яке катаен ветло вылэм.

Вера Пашкеева, Ижкар.

Редакцилэсь.

Гажано эшъёс, лыдӟисьёс, тужгес но арлыдоос! Оло тӥляд но та темаен, удмурт калык дӥсен герӟаськем малпанъёсты, мылкыдъёсты, тодэ ваёнъёсты вань, дыр. Ивортэ милемлы, гожтэ «Азьлане» газетэ. Асьме калык дӥськутлэсь зэмос вылтуссэ, аспӧртэмлыксэ утён понна со туж пайдаё луысал. Витиськом гожъямъёстэс.