Маин тодэ кылиз туэез «Гырон быдтон»?

Туэ солэсь «тэльбугозэ» Ӟаны котырысь удмурт гуртъёс басьтӥзы но туж шулдыр праздник радъязы. Кызьы ортчиз удмуртъёслэн одӥгез валтӥсь праздниксы но маин тодэ кылиз туэез «Гырон быдтон» — вераломы та статьяямы.

«Гырон быдтонлэн» валтӥсь ужпумъёсыз — удмурт калыклэсь сям-йылолъёссэ, аспӧртэмлыксэ утён; калыкъёс вискын кусыпъёсты юнматон. Угось кемаласен ини «Гырон быдтонэ» удмурт калыклэсь кырӟам-эктэмзэ учкыны, соин ӵош шумпотыны, шулдыръяськыны пӧртэм выжыысь калыкъёс люкасько. Шулдыръяськонлэсь калыкъёсты огазеяны быгатӥсь кужымзэ пусйизы ужрадэз усьтонэ пыриськем куноос но: Балтась ёрослэн тӧроез Рамиль Нутфуллин, ТР-ысь Кун Кенешысь депутат, ёросмылэн кураторез Камиль Нугаев, «Кенеш» НКА-лэн кивалтэтэзлэн тӧроез Ольга Пчельникова, Шор Кушкет гурт поселенилэн главаез Юрий Перфилов но аспалмы, Удмурт Элькунысь искусство удысысь дано ужась, Удмурт Элькунлэн Кун премиезлэн лауреатэз, «Айкай» театрлэн директорез Пётр Данилов.  Гажано куноос люкаськем калыкез праздникен ӟечкылазы, ӟеч сӥзёнъёссэс веразы.

«Дуслык» обществоысь ушъямон ужасьёс «Гырон быдтонлэсь» флагзэ ӝутэм бере, кутскиз шулдыръяськон. Кытчы эн учкы — котькытын шудо-вожвылъясько. Шулдыр крезьгур улсын бадӟымъёс но, пичиос но мыло-кыдо шудонъёсы пыриськизы. Та нуналэ, котьку сямен, луизы горшок пыргытон, пуйыен жугиськон но пуйыен бызьылон, возьвылтӥ куасэн бызьылон, чорыган, атас но «кролик» кутон, гынсапег куян, бодыен кыстаськон выллем сяме пырем шудонъёс но вожвылъяськонъёс. Выльёсызгес пӧлы пыртыны луоз тыгыли питратонэз, выждэраен ныгыли тэтчатонэз, пуклё куянэз, сӧриськем велосипедэн ветлонэз.

Туала дыре пиналъёслэсь урамын шудэмзэс адӟон — со туж шер пумиськись суред. Нош «Гырон быдтон» асьмелы сыӵе луонлык сётэ: нылпиос вожмаськыса пӧртэм шудонъёсы, вожвылъяськонъёсы пырисько (таӵе дыръя кузь черодъёсын сылон но соосты уг ӝожомыты). Соин «Гырон быдтон» выллем калык шулдыръяськонъёслэн калык сямъёсты но йылолъёсты утёнын кулэлыксы бадӟым шуыса вераны быгатӥськомы.

«Гырон быдтонлэн» эшшо одӥг тодметэз — праздник ӵыжы-выжыосын, матысь адямиосын, тодмоосын пумиськыны луонлык кылдытэ. Туэез та ласянь эшшо но тодэ кыльымон луиз, дыр, малы ке шуоно праздник Семык шумотлы, куноос бертон, шайвылэ мынон нуналлы тупаз уга.

Тросэз «Гырон быдтонэ» концерт учкыны, мылысь-кыдысь шутэтскыны шуыса мыно. Туэ праздникмес калык кырӟанъя но эктонъя «Айкай» театр шулдыртӥз. Яркыт, ворекъясь дӥсьсы, пальпотӥсь ымныръёссы, жингрес куараоссы но сцена вылын бубыли кадь поръямзы нокинэ мылкыдтэм ӧз кельтэ. Тае юн оскыса верасько. Эктыкузы сцена вылысь тузонлэн пурӟемез ик адске вал. Огъя вераса, котьку сямен, туж зол но дано выступить каризы «айкайёс».

Тулыс бусы ужъёслы сӥземын бере, «Гырон быдтонын» нырысь ик музъем ужасьёсты данъяло. Тодматске музъем ужанысь батыръёсын, тани соос: «Дуслык» обществоысь Петров Евгений Семёнович, «Борнак» обществоысь Шишкин Анатолий Никодимович, «Яна тормыш» обществоысь Петров Владислав Александрович.

«Дуслык» обществоысь механизатор Кешишев Виталий Юрьевич но Карек-Серма гурт библиотекаысь библиотекарь Якимова Мария Анатольевна тыршыса ужамзы но йӧскалык лулчеберетэз утемзы но азинтэмзы понна Балтась муниципал ёрослэн Данъян грамотаеныз пусйиськизы. Сыӵе ик данъетэн ас удысаз тыршыса ужамез понна но Мелиораторлэн нуналэныз валче пусйиськиз «Мелиоратор» обществоысь тракторист Пчельников Олег Александрович. Нош со ик огазеяськонысь Тихонов Александр Павловичлы та муген ик  Балтась ёрослэн главаезлэсь Таукарон гожтэтсэ сётӥзы.

Балтась муниципал ёрослэн тӧроезлэсь Таукарон гожтэтсэ озьы ик Карек-Серма гурт клублэн кивалтӥсез Никитина Зоя Михайловна, «Дуслык» возёсысь скал кыскись Смирнова Ирина Анатольевна, Янгул амбулаториысь медсестра Филипова Алина Александровна, О.Н. Исаев нимо Шор Кушкет шоръёзо школаысь удмурт кылъя но литературая дышетӥсь Яковлева Олеся Васильевна но басьтӥзы.

О.Н. Исаев нимо Шор Кушкет шоръёзо школаысь крезьгуръя дышетӥсь Камаев Виктор Павлович но Бурнак гурт поселенилэн секретарез Андреева Ольга Германовна Балтась ёросысь исполнительной комитетлэн Таукарон гожтэтэныз пусйиськизы.

Озьы ик праздникын нимысьтыз пусйизы «Гырон быдтонэз» ортчытыны юрттэм спонсоръёсты но.

Балтась ёросысь гурт возёсысь профсоюз огазеяськонлэн тӧроез Марина Ишмурзина профсоюззы луэм огазеяськонъёсысь куд-ог ужасьёсты пусйиз. Тани соос: Тимирязев нимо обществоысь скал кыскись Чочоков Сергей Петрович, «Борнак» возёсысь инженер Игнатьев Яков Юрьевич, «Яна тормыш» обществоысь тракторист Петров Владислав Александрович, «Активист» возёсысь скал кыскись Тургенева Ольга Викторовна, «Сурнай» обществоысь электрогазосварщик, тракторист Антонов Владимир Владиславович, «Арбор» возёсысь фермаен кивалтӥсь Понуркин Николай Александрович но «Труд» обществоысь профсоюз огазеяськонлэн председателез Филиппов Валерий Геннадьевич.

Ӟаны котырысь удмурт гуртъёсысь тужгес арлыдо адямиосты но тужгес покчи пиналъёсты, кема дыр ӵоже валче улӥсь кузпалъёсты но пусйыны ӧз вунэтэ. Ӟаны гуртысь Анисимова Анна Дмитриевна, Кисальысь Перфилова Анна Николаевна, Кутэшысь Самсонова Гликерия Григорьевна, Кушкетысь Мартынова Елизавета Фёдоровна, Починкаысь Дмитриева Нина Васильевна, Турья гуртысь Алдырова Августина Александровна та палась тужгес мӧйы адямиос луизы. Нош берло дыре вордскем нылпиос — Кутэшысь Кешишева Виталина Витальевна но Починкаысь Игнатьева Аделина Андреевна. Кутэшысь Зинаида Ивановна но Григорий Васильевич Трофимовъёс 50 ар ӵоже валче улӥсь кузпалъёс луыса пусйиськизы. Праздникез радъясьёс 3-тӥ инвожое вордскем нуналзэ пусйись Ӟаны гуртысь Николаева Ольга Николаевнаез но кузьымен шумпоттӥзы.

Праздник ортчиз, кырӟанъёс кырӟамын, шудонъёс шудэмын, кузьымъёс басьтэмын, сӥлен ӝуклэн ческыт зыныз тӧлӟемын, со понна сюлэмъёсын вуоно «Гырон быдтонозь» утиськозы шуныт тодэ ваёнъёс! Вуоно пумиськытозь, «Гырон быдтон»!

P.S.: 17-тӥ инвожое Кукмор ёросысь Нырья черкогуртын республиканской «Гырон быдтон» ортчоз.