Малы мимоза Тямысэтӥ мартлэн тодметэз луэ?

Татын ик ватскемын одӥгез валэктон, малы мимоза Тямысэтӥ мартлэн тодметэзлы пӧрмиз — яратоно роза яке хризантема ӧвӧл, ӵапак ческыт зын вӧлмытӥсь мимоза нырысетӥен луыса сяськаяське кема кыстӥськем тол бере.
Вылаз ик, котькуд нылкышно кадь, мимоза лушкемын возе одӥг югдурез: со сяська, кудзэ асьмеос мимоза шуыса нимаськом, воксё мимоза но вылымтэ. Ваньзэ тодӥсь Википедилэн ивортэмезъя, со Мимоза выжыысь акация, пе, луэ. Со туж чебер будэ вылэм Кавказысь Сьӧд зарезь дурын. Ӵапак отысь ик вуэ та сяська Нылкышноослэн калыккуспо нуналзы азьын асьме шаерысь вань сяська магазинъёсы.

Нош куинетӥ малпан таӵе. Мимозалэн нимыз возьдаськон но воштӥськытэк кылён (постоянство) кадь берыктӥське. Ӵапак таӵе сямъёсыз куке но луыны кулэ вылэм ассэ гажась котькуд нылкышнолэн. Оло, туннэ но, ненег мимоза кузьмакуз пиосмурт оскытэ, дыр, ассэ ачиз, быръем нылкышноез ӵапак сыӵе адями шуыса.

Тунсыко, Нылкышно нунал Россиын гинэ уг пусйиськы, шутэтскон нуналэн но асьме дорын гинэ уг лыдъяськы. Сое пусъё Анголаын, Замбиын, Камбоджаын, Кениын, КНДР-ын, Мадагаскар, Угандаын. Лаосын та нунал нылкышноос понна гинэ шутэтскон луэ, нош Китайын кышномуртъёс та празднике ӝыны нунал гинэ ужало вылэм (Википедилэн ивортэмезъя).

Мимоза Россиын но матысь шаеръёсын гинэ популярной вылымтэ. Та сяськаез гажало Франциын. Францилэн лымшор палаз феврале арлы быдэ ортчытӥське сӥё-дано ужрад, кудӥзлэн пумаз бырйиське ӝытлэн королеваез — лыктэмъёс пӧлысь самой чеберез егит нылмурт. Озьы ик бере уг кылё Черногориын но. Мимозалэн ӵуж буёлэз улсын мартлэн кутсконаз ортчо карнавалъёс но шулдыръяськонъёс. Озьы та шаерын пумитало тулысэз. Нош Италия 500 гектарлэсь уно мимоза пуктэменыз тодмо луэм. Та паймымон чебер сяськаяськись будосэз учкыны отчы арлы быдэ ветло туж уно туристъёс.

Фото: pixabay.com