Мария Александровна Иванова: «Мон шудо адями»

— Пересьми ни, пельёсы но начар кыло. Но тани йырам тӧдьы кышет керттэм бере, ӧжыт ке но пиналгес адскисько, дыр, — серекъяса пумита Мария Александровна. — Ма, ӝожтӥськоно ӧвӧл ни мыным — али всё-таки ачим сиисько, сиён но пӧзьтӥсько, урамын ветлӥсько сое-тае карыса, — веранзэ азьланьтэ мусо песянай (зэмзэ но мусо, тӧдьы кышетэз сыӵе возьматэ, дыр — Н. Ж.).— Гужем нюлэскы борылы, губилы но ветлӥсько. Мынэме потэ ук, ветлэм потэ — нюлэскын ведь кыӵе рахат! Омырез чылкыт, мар гинэ уг буды! Ай тани сӥзьыл нюлэскын кузьылиосын вераськыса сылӥськем вал.

— Мар тунсыкозэ веразы кузьылиос? — юасько, Мария Александровналэсь верам суредзэ син азям пуктыса.

— Оград кӧня ке кузьылиез адӟи но дугдӥ. Учке ай, шуисько, тӥ кытчы ваньды пыриды. Тол потыны пегӟиды-а, вазьгес ӧвӧл-а али шуисько, — пальпотыса маде песянай.

Тӥни сыӵе со — Мария Александровна. Син азяды пуктӥды-а? Етӥз, но со дыре ик каньыл, огшоры нылкышно. Нымы-кибыосты, будосъёсты — вань улэпсэ но, улэп луымтэзэ но яратӥсь песянай. Сыӵе сямыз кӧня ке минут вераськеммы бере ик валамон луиз. Со но та улон питыранын нюлэскысь пумитам кузьылиос выллем ӝог берга, етӥз выре.

Нюлэсэн Мария Александровналэн улонэз юн герӟаськемын. Гондыргуртын вордскем Мария школаын вить классэз йылпумъяса (ньыль арзэ Гондыргуртысь покчиёзо школаын, одӥг арзэ Покчи Лӧзя школаын), дышетсконзэ куштэ — 6-тӥ классэ потэм бераз анаез висьыны кутске. Кыӵе дышетскон ни собере...

— Дышетсконме куштыса, анайме ути. Бадӟым агае 7-тӥ классэ йылпумъяса Урняке дышетскыны кошкиз бере, мыным вань секыт уж кылиз. Анаймы но вазь кулӥз, висьыса... Ми солэн вить кузя нылпиосыз вал. Но одӥг нылпиез 8 аресэн жугиськон кутскытозь кулӥз, кыкетӥез но пичиен кулӥз. Азьло пӧртэм висёнъёслэсь ма мында нылпиос кулӥзы... Озьыен, ми куиньнамы кылимы — агае, сузэре но мон. Нош пуш тыриз ини.., — шуэ Мария Александровна, небыт чиньыосыныз бамез кузя васькись синкылиоссэ ӵушылыса.

Секыт йӧтэм солы. Жугиськон кутскем бере тужгес но. 14 аресэз тырмем бере, Мариялы анаез интые ужаны мыныны тупа — весь нюлэскын, весь нюлэскын... Нурмабаше, Чапшаре нюлэс кораны ветлэм, собере пузэ Балтась школае, больницае нуллэм. Берлогес ини Мария Александровна кутскем валэн ужаны — егит ныл шуыса учкымтэзы, пиосмуртъёсын огкадь ужам. Сиёнэз но ӧвӧл, ужез но бушын. Атаез но ожын бырем... Бертоз шуыса, сое кема витиллям. Но ӧвӧл, бертымтэ.

1959-тӥ арын Мариялы но шуд усе — со, Бадӟым Лӧзялэн I-тӥ люкетысьтыз Аркадий нимо егит пиосмуртэн тодматскыса, солы картлы бызе. Соку Мариялы куамын арес луэ ини. Оло, вазьгес но кошкысал, дыр, — висись анайзэ, песяйзэ куштэмез потымтэ. Картлы кошкемез бере, Мария Александровна Балтасьысь кирпич заводэ ужаны интыяське. Гужемзэ отын, толалтэзэ нош — Балтасьысь ик мебельной фабрикаын подсобник луыса ужа. Фабрика Карадуванэ кӧчем бере, отчы кошке, токарной станокен ужа. 1968-тӥ арын отын но ужамысь дугдэ. Берпуметӥ ужан интыез —  Ленин нимо колхоз (туала дыре со «Сурнай» общество). Кузпалыз, Аркадий Алексеевич, киужъёслы усто пиосмурт луэм — со ужам столяр луыса (кулэмезлы дас арлэсь уногес вылэм ини). Кузпалъёс будэтӥллям куинь нылпиосты — Николаез, Леонидэз но Валериез. Жаляса верано, Леонид пизы улэп ӧвӧл ни. Бадӟым пиез улэ Ивановской улосвылын, нош покчи пиез Ирина кышноеныз  но кык пиосыныз ӵош — татын, Бадӟым Лӧзяын, Мария Александровна но соосын улэ. Туннэ нуналэ со шудо песянай — солэн вить внукез но одӥг правнукез вань.

— Матысьёсы ярато, гажало, утё бере, кызьы улонме шудтэм шуом бен? Мон шудо адями. Улонын пӧртэмез луэ, но ваньзэ дано ортчыны быгатыны кулэ, — вера Мария Александровна.

Визьмо вераськись песянайлы 5-тӥ толсуре 90 арес тырмиз ини шуыса вераны но уг луы. Со али но егит нылъёс сямен бызьылыса ветлэ, котькыӵе темалы вераськон нуыны быгатэ, кенэзлы юртъер котырын но ужаны юрттэ вылэм. Мария Александровнаез вордскем нуналэныз ӟечкыланы лыктэм куноос — Наиль Сабирзянов, главалэн воштӥсез, Сергей Мухин, Покчи Лӧзя поселенилэн главаез, Фарит Мухаметзянов, «Сурнай» обществоысь валтӥсь агроном, юбилярлы сӥзизы шудо-буро, таза улон, мылкыд каризы висёнъёслы сётскытэк улонзэ азьланьтыны, кузьмазы трос кузьымъёс но РФ-лэн Президентэзлэсь ӟечкылан открытказэ, район главалэсь Таукарон гожтэтсэ.