Хезмәт

Михаил Перфилов: «Укмыстон тырмиз ини…»

Сала Кушкет гуртын улӥсь Перфилов Михаил Алексеевичлы 1 южтолэзе 90 арес тырмиз

Котырес лыдпусэныз юбилярез ёросысь куноос ӟечкыланы вуизы, озьы ик Михаил Алексеевичлэн матысь ӵыжы-выжыосыз но люкаськизы. Шумпотымон, Перфиловъёслэн туэ нош ик одӥг бадӟым праздниксы вылэм — арлыдо кузпалъёслэн, Михаил Алексеевичлэн но Анна Николаевналэн, бриллиант сюанзы, соос ини куатьтон ар валче!

Юбилеен но бриллиант сюанэнызы Перфиловъёсты ӟечкыланы вуизы район главалэн воштӥсез Наиль Сабирзянов, социальной дурбасьтонъя ёзэтлэн кивалтӥсез Алсу Гатиятуллина, ЗАГС ёзэтлэн кивалтӥсез Зухра Ахметханова, «Дуслык» обществоысь но гурт поселениысь представительёс. Матысь адямиоссы, ӵыжы-выжыоссы но та нуналэ соос вӧзын вал.

Перфиловъёс куноосты мыло-кыдо пумитазы. Куноос но буш киын ӧз лыктэ: дышем сямъя, соос РФ-лэн Президентэзлэсь ӟечкылан открытказэ, ёрос главалэсь Таукарон гожтэтсэ вуттӥзы, кузьымъёсын но шумпоттӥзы. Сяська керттэтэз кузё кышнолы кузьмазы, Анна Николаевна солы туж шумпотӥз. Кузпалъёслэн туэ семья кылдытэмзылы куатьтон ар но луэ вылэм, соин та нуналэ соос кык полэс праздникез пусйизы шуыны кулэ. Ӟечкыланъёсты кылэмез бере, шумпотон мылкыдъёссэ ватыны ӧз быгаты ни юбиляр. Куноослы таукарон кылъёссэ вераса, со егит дыраз берытскиз:

— Укмыстон тырмиз ини. Куке но мон но егит вал ук. Ас дырам Грузиын служить кари, Севастопольысь Сьӧд зарезь дурез возьмай. Отысен Белоруссие келязы. Куинь толэзь дышетӥзы, собере полковник, умой дышетскемысь, Грозный городэ военной училищее лэзьыны мылкыд каремзэ вераз. Отын мон милициын ужасьлы дышетски. Умой дышетскемысь, одӥг бандаез кутыны лэзизы. Отысен мон куинь ранение но басьтӥ. Со бандитъёс монэ ранить каризы, Грозный городын госпитальын кылли. Комсомол путёвкаен Хрущёв вакытэ Иркутскысь ГЭС-э ужаны но лэзизы, палаткаын одӥг ар ӵоже улӥ отын. Китайын но, Вьетнамын но луи… Троссэ тодэ вайыны луэ, ваньзэ вераса быдтымон но ӧвӧл.

Сала Кушкетэ бертэм бераз Михаил Алексеевич Балтасьын нянь пыжон заводын ужа. Собере Ципьяын но ужаны вутске, пенсие колхозысен потэ ини.

— Колхозын трос адями ужа вал, соос пӧлын ваньзы вал — бигеръёсыз но, удмуртъёсыз но, поръёсыз но, ӟучъёсыз но. Мыным отын ужаны кельшиз, соин отчы кыли ини ужаны, — валэктэ юбиляр.

Анна апаен соос 1961-тӥ арын кузпалъясько. Анна Николаевна Сала Кушкет гуртысь луэ. Кема аръёс ӵоже со тазалыкез утён удысын ёросын адӟем карымон ужась луэм. Ас дыраз Сала Кушкетэ со доры кенеш но, юрттэт но курыса трос гуртъёсысь вуылӥллям. Михаил Алексеевичен тодматскон дыръяз со Арборын ужа вылэм. Ньыль ар ӵоже бигер гуртын тыршем нылкышно, соин туннэ нуналэ но бигер кылын туж усто вераське. Кузпалъяськемзы бере егитъёс кӧня ке ар ӵоже Татарстанлэн палэназ уло, шонергес верано ке, Свердловск улосвылын. Ольга нылзы но, Юрий пизы но отын вордскиллям. Юрийлы кык арес дыръя, семья вордскем палъёсаз бертэ. Миша агай Ципьяысь сельхозтехникае ужаны интыяське, собере «Искра» (туннэ нуналэ «Дуслык») колхозын тырше. Анна апай 50 арес тырмытозяз медсестра луыса тыршем. Гуртысьтыз медпунктаз заведующий луыса ужа. Со сяна, Ципья черкогуртысь больницаын, Ӟаныын, Кушкетбашын медсестра луыса но тыршем.

— Ньыль нылпиосмы вал. Кык ныл но кык пи. Одӥгез нылмы 56 аресэн кулӥз. Кузпалэным нылпиосмылы быгатэммыя ваньзэ сётыны тыршимы. Дышетӥмы ни соосты. Одӥгез инженер, мукетыз — дышетӥсь, одӥгез мынэсьтым ӧрме бырйиз, медсестралы дышетскиз, покчи пимы механизатор, со колхозын ужа. Шумпотӥсько, ваньзы улонын ас интызэс шедьтыны быгатӥзы шуыса, анай-атай понна нылпилэн шудэз валтӥсез ук, — шуэ Анна Николаевна.

Нылпиоссылы соос умой визьнод сётыны быгатӥллям. Туннэ нуналэ та юртын кыкназы гинэ уло ке но (нылпиоссы ас семьяосынызы нимаз уло: одӥгез Казаньын, кыкетӥез Пор-Кутешын, нош Юрий пизы — Сала Кушкетын), нылпиоссы анай-атайзы сярысь уг вунэто — куное бертыло, утялскыны юртто. Нош Михаил Алексеевич но Анна Николаевна сизьым внуксылы, ньыль правнукъёссылы шумпотыса уло, соосты куное витё.

— Эшшо но кемагес валче улыны Инмар мед сётоз милемлы. Пиосмурт таза луиз ке, улыны капчи ини со, мар шуид ке но. Ваньзы таза мед луозы, кема мед улозы. Табыдӟа карыса милемыз ӟечкыланы лыктэмды понна пумтэм тау кариськомы, — шуиз Анна апай.

— Троссэ адӟемед ини тон, Михаил агай. Тон сярысь но, Анна апай, ушъяса верамон гинэ. Тӥледын тодматскимы шуыса туж шумпотӥськомы. Тӥ кыкнады кема аръёс ӵоже тупаса, эшлыко улыны быгатӥллямды. Азьпал улонды но сыӵе  ик лякыт, шуныт мед луоз. Нылпиостылэсь, внукъёстылэсь, правнукъёстылэсь ӟечсэ гинэ адӟыны мед кылдоз, — шуиз Наиль Нургаязович, эшшо огпол Перфиловъёсты ӟечкыласа.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: