Музее ветлон

Ципья черкогуртын интыяськем «Калыкъёслэн эшъяськонзы» музей сярысь трос пол умойзэ кылэм вал ини. Но та дырозь отчы ваньмылы вуылыны кызьы ке но ӧз кылды. Нош тани выль ар шутэтсконъёс дыръя та тунсыко интыез милемлы ас синмын адӟыны тупаз. Отчы ми бадӟым семьяен люкаськыса ветлӥмы.

Ваньмылэн но ветлэммы бере мылкыдъёсмы ӝутскем вал. Нырысь ик вераны кулэ, музей милемыз праздник нуналъёслы тупамон пумитаз — чебермам вож кызэн но аспӧртэмлыко малпам выль ар сӥзёнъёсын но ӟечкыланъёсын. Пырон азьын ик мылкыдмес ӝуткамзы бере музей ужасьёс милемыз тунсыко истори дуннее валтӥзы. Экскурсоводлэсь пуштросо веранзэ кылзыса ортчылӥмы ми одӥг залысен мукетаз. Солэн верамезъя но арбериосты учкемъя истори бамъёс туж вашкала, мамонтъёс улон дырысен кутскыса но туала вакытозь вошъяськизы: артефактъёс но вашкала шедьтосъёс, пӧртэм калыкъёсысь адямиослэн дӥськутсы но чеберманъёссы, корка тӥрлык, ужан тӥрлык, пыӵал тӥрлык, туж уно пӧртэм книгаос, туспуктэмъёс, кагазъёс но суредъёс, пӧйшур сульдэръёс... — ваньмыз та тупамон эскпозициос пыр возьматӥськиз. Нимаз экспонатъёс вылэ дугдылытэк вераса, милемлы тужгес тунсыко потэм арбериосты пусйысал, соосты мон «улэп» экспонатъёсын нимасал — со сыӵе арбериос, кудъёсыз аръёс шоры учкытэк али но ужало (кылсярысь, вуж кунгожсьӧр час яке куиськон станок) но кудъёссэ лыктэм адямиослы киын йӧтылыны лэзиське (кылсярысь, мамонт лылэн люкетэз яке пулемёт). Семьяысьтымы пинал муртъёс «Мар тӥледлы тужгес но кельшиз?» юанлы ваньзы ӵошен «Пӧйшуръёс!» шуизы. Ма веранэз, пӧйшур сульдэръёсын висъет котькудмылы пумтэм тунсыко потӥз.

Мурт городъёсысь бадӟым музейёсын экскурсоводъёслэн веранзы огпӧртэмгес но мӧзмытгес потыны быгатэ, вордскем интыысьтыд пичи шаертодос музейын шуныт вераськонэн сое ӵошатыны уг луы, татын уга уноез экспонатъёс я ас улонэныд, я ӵыжы-выжыеныд, я тодмо адямиеныд гераӟаськемын. Соин но, дыр, сыӵе музее ветлон но вунонтэм шуныт мылкыд кельтэ.

Таӵе пуштросо музеез кылдытэм мурт — Гарифзян Галиевич Галиев — та ужезлы быдэс улонзэ сётӥз, шуыны луэ. Ёрос понна, татын улӥсь адямиос понна со бадӟым узырлык, сое одно ик дунъяны но гажаны быгатоно. Шумпотымон, музейын ужасьёслэн тыршеменызы Гарифзян Галиевичлэн ужез туннэ нуналэ но адӟем карымон азинтӥське. Бадӟым семьямылэн нимыныз «Калыкъёслэн эшъяськонзы» музейын ужасьёслы шуныт пумитамзы но тунсыко экскурсия ортчытэмзы понна бадӟым тау верам потэ. Тӥледлы выль экспонатъёс но выль малпанъёс сӥзиськом, вань кутсконъёсты мед пишмозы!

Ольга Плотникова: «Музейын туж кельшиз! Тунсыко экскурсия! Мыным тужгес но нылкышно чеберманъёсын люкет кельшиз, малы ке шуоно, соосын котьку но тунсыкъяськи. Ваньдылы но одно ик музее ветлыны ӵектӥсько!»

Ӟуч Лӧзя гуртысь Плотниковъёслэн
бадӟым семьязылэн нимыныз Екатерина Салтыкова

Туспуктэмъёс: музейлэн архивез