«Нылпиосмы кужыммес уг басьто — соос сое сёто»

Та ваньмыз но асьмелы тодмо но валамон. Соин ик та сярысь трос чебер кылъёс гожъятэк, районысьтымы одӥгез адӟем карымон, трос нылпиё семья сярысь гожто. Статьяе — Кисальысь Григорьевъёслэн семьязы сярысь.

...Елена Юрьевна вордске Кисальын, отын ик ортче пинал дырыз но. Солэн кузпалыз, Вячеслав Анатольевич, Гондыргуртын вордскем, нош Елена Юрьевнаен тодматскыкуз Балтасьын улэ вылэм ини. Тодматскиллям кузпалъёс 1997-тӥ арын, куке егит Вячеслав армиысь бертэм юлтошеныз ӵош лыктэм Кисале (юлтошезлэн яратоно нылыз со гуртын луэм). Озьы Елена но Вячеслав тодматскиллям, валче луиллям, нош 1999-тӥ арын кузпалъяськиллям.

Ленапай верамъя, солэн котьку бадӟым семья кылдытэмез потэм. «Мон ачим семьяын одӥг нылпи вал. Бускельёслэн пиналъёсыныз шудӥ, возьмай соосты. Туж мӧзмыт вал мыным, соин но аслым пичи дыръям ик верай, бадӟым семья кылдыто шуыса».

Бен, Ленапайлэн малпанэз быдэсмем — туннэ туналэ семьяязы вить нылпизы. Дианалы 17 арес, Анналы — 13, Яналы — 6, Ромалы — 4, нош самой покчиезлы, Машенькалы, 11 толэзь гинэ на. Нылпиосыз огезлэсь огез визьмоесь но чебересь, огезлэсь огез ужасесь но тыршисесь. Тросэз анай-атайёс ӝожтӥсько, туала дыре одӥг нылпиез но будэтыны секыт шуыса. Нош Григорьевъёс та сярысь тазьы шуо: «Нылпиосмы кужыммес уг басьто — соос сое сёто. Жадиськомы шуыса вераммы уг луы, пӧртэм дыръёс луо, мазэ веранэз. Но милям нылпиосмы — со милям шумпотонмы но данъяськонмы. Дорад лыктыса одӥг пол ӟыгыртӥз ке но нылпиед, вань жадёнъёс соку ик вуно, выльысь ваньзэ ужаны кужым сёто». Но нылпиослэн кужым сётэменызы гинэ улыны уг луы, дыр. Сомында нылпиосты утён понна, али со сяна юрт возьыса утялтон понна но, трос кужым кулэ. Татын юрттӥсьёстэк уг луы. Григорьевъёслэн та ласянь шуг-секытъёссы ӧвӧл. Бадӟым нылпиоссы трос юртто: корка утялто, покчи сузэръёссэс но вынзэс возьмало. Но туж бадӟым юрттэт сёто кузпалъёслы Ленапайлэн анаез но атаез — Антонида Александровна но Юрий Иванович.
Семья сярысь пыр-почгес газетмылэн 19-тӥ номерысьтыз лыдӟыны быгатоды.