Одӥг нуналэ – кык юбиляр (1-тӥ люкет)

Паймымон кадь, кыкез ик кышномуртъёс — Петроваос. Кыкназы ик ас ужан удысазы быгатыса тыршем ужам ӧнерчиос. Кыкназы ик улонлэсь секытъёссэ адӟем нылпиос. Балтасьын улӥсь Зинаида Кузьминична аслэсьтыз 95 аресъем юбилейзэ пумитаз, нош Карек-Серма гуртын улӥсь Зоя Илларионовна — 90 арессэ. 

Таӵе суредэз син азе пуктыны туж шумпотымон. Арлыдоосмы али уло, дано аресазы вуыса но улонлы шумпото, куноосты гажаса пумитало, лад-лад верасько.

Котькуд кунолы соос пумтэм шумпото, улон-вылонзы сярысь, мылкыдъёссэс, будӥсь поколенилы кенешъёс верамзы потэ. Арлыдоослы трос кулэ ӧвӧл ук: шуныт валес, тазалык но тынӥсь улон. 
Котькуд арлыдо адямилэсь улон сюрессэ гожтыны кутскид ке, сюлмын ик мар ке чигиське кадь. Соослэн нылпи дырзы но секытэн ортчемын, улон но анай-атай нуныян, яратон мылкыдъёсын мултэс эркиямтэ. Тросэз соос верало: «Туннэ нуналэ ваньмыз умой, шуныт корка, коньдон но вань, тазалык гинэ ӧвӧл ини». Туж секыт кылыны таӵе кылъёсты. Пичи дырысен ужаса будэмъёс туннэ нуналэ но асьсэды шутэтскыны уг лэзё на, весь кытчы ке дырто, матысьёссылы юрттӥсько. Сюлэмзы уж куре, виразы тыршон пыӵамын. Песянай-песятайёсмы вань улонзэс семьязылы но нылпиоссылы сӥзьыны тыршо. 

Кык зэмос удмурт нылкышноос, кудъёсыз шуг-секытъёссэс вормыса, туннэ нуналэ каньыл но тынӥсь улонэн уло, ӵыжы-выжыоссылы, матысьёссылы бадӟым шумпотон но пыкет луо. Вӧзад сыӵе узыр историен, кузь улон сюресэн адями улэ ке, тынад но кужмыд ватсаське кадь, котькуд уж капчиен сётӥське. 

Зинаида Кузьминична тылысь труженик, вань гумырзэ Балтасьысь эмъяськоннилэн хирургия ёзэтаз санитарка луыса ужам. Туж тыршись, ӝикыт, вань ужзэ дыраз лэсьтӥсь — таӵеен сое тодазы ваё пациентъёс но, ӵош ужасьёсыз но. Калык понна тыршись но сюлмаськись адямиос ӵем уг пумисько, соос ас дыразы дунъяны луонтэм, Зинаида Кузьминична ӵапак сыӵе. Со сярысь рос-прос газет бамъёсамы гожтэмын вал ини. («Азьлане», № 11, 22.03.2019 — ред.). Соку солэн 90 аресъем юбилеез вал, лыктэм куноос 95 арессэ пумитаны но мед кылдоз шуыса сӥзизы. Шумпотымон, сӥзёнъёс зэмазы: Зинаида Кузьминична 95 арессэ но ӝутскем мылкыдын пумитаз. Яратыса но гажаса, дораз вуизы матысьёсыз но, бускельёсыз но.
Дано лыдпуссэ пумитась песянаез ӟечкыланы лыктӥзы исполнительной комитетлэн кивалтӥсезлэн воштӥсез Ильгам Гайнутдинов, социальной юрттэт сётонъя ёзэтлэн кивалтӥсез Алсу Гатиятуллина, ёросысь центральной больницалэн валтӥсь врачез Газинур Давлиев но Балтась город поселенилэн кивалтӥсез Ильдар Габдрахманов. Куноос асьсэлэсь ӟечкыланъёссэс веразы, улэм-вылэмез сярысь юалляськизы, эшшо лыктыны мед кылдоз шуыса сӥзизы.