Огмылкыдо луон семьяысен кутске

Туннэ асьме шаермы Калыкъёслэсь огазеяськон нуналзэ пусъе. Та нунал асьмелэн нырысь ик Россилэн историеныз, адямиосыныз но мерасэныз герӟаськемын.

Нош бадӟым юн семьялэсь дуногес мар ке но луыны быгатэ меда? Уг, дыр. Асьме семьяосмы — Россилэн валтӥсь мерасэз. Соин но та мур пуштросъем праздник вуон азьын мынам потэ тӥледыз тодматэме ёросысьтымы одӥг чебер семьяен, кытын яратон, ог-огедлы оскон, гажан но валан кузёяське. 

Тодматске, Гузель но Олег Фёдоровъёс. Одӥгез бигер, мукетыз удмурт. 

Гузель вордске но будэ Казаньын. Дышетскемезъя со педагог, Казаньысь педагогикая институтэз йылпумъяса, ӟуч но англи кылъёсъя ӧнер басьтэ. Социальной дурбасьтонъя министерствоын ужа. Туннэ нуналэ но Гузель социальной удысын тырше, но табере Балтась ёросысь «Наз» центрын, со социальной ужъя ӧнерчи луэ. Солэн киулаз 20 социальной ужась но 9 гурт поселениысь 121 оген кылемъёс но оген улӥсьёс. Социальной удысын ужам огъя стажез 22 ар. 

Олег вордске но будэ Балтась каргуртын, трос нылпиё удмурт семьяын — семьяын, кытын котьку эшлыко кусыпъёс, ог-огдэ гажан, ог-огедлы юрттон кузёяське вал. Олег одӥг гинэ пи семьяын, солэн вань на эшшо кык апайёсыз — Римма но Светлана. Анай-атайзы, Александр Григорьевич но Зоя Константиновна, быгатӥзы сётыны асьсэ нылпиоссылы вань яратонзэс — соос калык пӧлын гажамон адямиос луизы, ужез яратыны дышетӥзы, вылӥ-тодон валан басьтыны луонлык кылдытӥзы. Олег Казаньысь гурт возёсъя институтэз йылпумъяз. Трос аръёс ӵоже ужаз автомастерскойын нимаз ужбергатӥсь луыса. Али ужа МЧС-ын. 
Бен кызьы кутскем соослэн историзы? 

Гузель вера:

— Милям историмы 1995-тӥ арын кутскиз. Пичи но егит дыръёсам мон ӵем вуылӥсько вал Балтасе гужем каникулъёсы ӵыжы-выжыосмы доры. Тодматскимы ми дискотекаын. Кельшимы ог-огмылы. Дыр ортчыса, синмаськон яратонлы берытскиз — зэмос, валаса вуттэм, оскымон яратонлы. Бератаз 2006-тӥ арын картэн кышно луимы — кузпалъяськимы. 

— Россиын суро семьяос шоры пӧртэм сямен учкисьёс вань. Одӥг ласянь, шаерамы ӧвӧл сыӵе кат, кудӥзъя пӧртэм йӧскалыкысь яке осконысь адямиослы кузпалъяськыны уг яра. Мукет ласянь, куд-ог обществоосын, тужгес но йӧскалык республикаосын, суро семьяослы пумит азьвыл ик урод малпанъёс вань. Но котьма ке но али дыре тросгес но тросгес адямиос суро семьяосты кылдыто. Малпасько, со адямиослэн мобильнойгес луэменызы герӟаське шуыса, калыкъёслэн лулчеберетъёссы куспын гожъёс ӵушисько, нош адямиос ӵемгес пӧртэмлыкез дунъяны кутско. Соин валче мынам юан кылдӥз: Гузель, кызьы пумитазы тӥлесьтыд кузпалъяськыны малпандэс кыкнапаласен но анай-атайёсты? Ведь, котьку сямен, тросаз учыре суро семьяосын кузпалъёс пумисько шуг-секытъёсын, кудъёсыз лулчеберет но оскон ласянь пӧртэмлыкъёсын герӟасько. Вераны кулэ, ӵемысь соос шараясько нылпи вордскем бере. Тӥляд та ласянь кызьы вал? 

— Олеглэн но, мынам но анай-атайёсмы пумит ӧй вал милям кузпалъяськеммылы. Со ласянь милям огпол но споръяськонъёс, керетонъёс ӧз потылэ. Ми котьку ог-огмылэсь лулчеберетмес но осконмес гажамы но гажаськом. Дорын куинь кылын вераськиськом — ӟучен, удмуртэн но бигерен. Нылпиосмы но куинь кыл тодо. 
Валтӥсь узырлыкен Фёдоровъёс асьсэ нылпиоссэс лыдъяло. Пиналъёссы соослэн куинь кузя — кык пи но одӥг ныл: бадӟымез Артём, шоретӥез Тимур, покчиез София. Нылпиоссы визьмоесь, ӟеч сямоесь, анай-атайёссы кадесь. Вордскемзы дырысен нылпиос ас анай-атайёссылэсь ӟеч сямъёссэс гинэ басьто, нош анай-атайёс ас черодазы нылпиоссылы будон но азинскон понна каньыл луонлыкъёс кылдыто.

— Нош мар тӥ малпаськоды суро семьяосын нылпиосты визьнодан сярысь? Тӥ сямен вань-а пӧртэмлыкез?

— Мон малпасько, визьноданын нокыӵе пӧртэмлыкез ӧвӧл шуыса. Аслэсьтыд нылпиостэ яратыны кулэ, соку вань шуг-секытъёсты вормыны луэ. Нылпиосты визьноданын, тужгес но пиосты, бадӟым инты басьтэ атай. Олег туж умой, саклык висъясь, сюлмаськись атай. Со аслаз примереныз Артёмез но Тимурез визьнода. Солы луыса, атаезлэсь адӟем карыса бадӟым пимы 11 аресысен гужем толэзьёсы ужа, аслаз расходъёсызлы коньдон ужа. Пиос шумпотыса спортэн выро. 

— Тӥ бадӟым эшлыко семьяен, анай-атайёсыныды ӵош улӥськоды. Та но тросэз сярысь вера но туж гажамон луэ. Уд-а усьтэ семья шуддылэсь, куспады тупаса улэмдылэсь секретсэ?

— Озьы, 18 ар ини ми анайзыен но атайзыен — Зоя Константиновнаен но Александр Григорьевичен — ӵош улӥськом. Соос милям туж умой, котькуд ласянь милемлы юртто, внукъёссэс ярато, внукъёссы но песянаен песятайзэ гажало. Семьяын тупаса улонлэн секретэз ог-огдэ гажан бордын шуыса малпасько. 

— Мон тодӥсько, тӥляд семьяды туж мыло-кыдо. Тӥ пӧртэм школьной, ёрос но элькун масштабен конкурсъёсы пыриськиськоды. Тросаз учыре — со семейной, культурной но спортивной ужрадъёс. Пиосты тӥляд спортэн выро. Со сярысь но пыр-почгес тодэм потэ вал.

— Бен, милям семьямы спортэн вырыны яратэ. Бадӟым пимес, Артёмез, Олег 5 аресысен каратэе ветлытыны кутскиз. Куать ар выриз пимы спортлэн со амалэныз. Озьы ик футболэн, волейболэн шудӥз. Со сяна Артём мыло-кыдо пыриське егитъёслэн «Форпост» но «Юнармия» движениосазы. Ёрос, элькун, Росси соревнованиослэн вормисез но со милям. Туэ соослэн командазы «Юнармия» движенилэн элькун соревнованиосаз 2-тӥ инты басьтӥз. Али со 11-тӥ классын дышетске, солы 17 арес, огъя кун экзаменъёсты сётыны дасяське. 

Шоретӥез пимы Тимур, солы 11 арес, дышетске 5 классын. Озьы ик яратэ спортэн вырыны: футболэн, хоккеен, волейболэн. Туэ картинген тунсыкъяськыны кутскиз, англи кылэз дышетэ. Солэн туж трос эшъёсыз, яратэ путешествиосты но походъёсты, чорыганы но квадроциклэн ветлыны.

София нылмылы 6 арес. Нырысетӥ классын дышетске. Ачиз куать аресэн школае мыныны мылкыд кариз. Мон сое ӝыны ар 7 аресэн мыныны либатыны тырши. Ачиз лыдӟыны дышетскиз, садике ветлыкуз ик али. Лепкае ветлэ, кылем арын лепкая калыккуспо конкурсын нырысетӥ инты басьтӥз. Туж мыло-кыдо нылаш, пӧртэм кружокъёсы ветлэ: хореография, вокал, спортивной гимнастика, англи кыл.

— Семьядылэн яратоно занятиез?

— Кызьы верай ни, эшъяськиськом спортэн, гужем кузпалэным уяськом Лӧзя тыын. Ваньмон дыр луыку, концертъёсы но театръёсы ветлӥськом. Дышетскемея мон филолог, яратӥсько книга лыдӟыны. Пиналъёслы но пичиысен тырши книгаез яратон мылкыд пыӵатыны, ӵем ветлӥськом библиотекае. 

София ачиз милемлы книгаос лыдӟе, туж яратэ выжыкылъёсты. Телевидениын съёмкаосы пыриськиз, удмурт но бигер кылын кылбуръёс лыдӟиз. Туэ коньывуон толэзе милям семьямы Центральной библиотекаен Семьялэн арез улсын ортчытэм «Семейное чтение — к мудрости движение» ёрос конкурсэ, пыриськиз. Семьямы сярысь видеоролик лэсьтӥмы. Татын туж юрттӥз Тимур пимы, со монтировать кариз видеороликмес. Йылпумъянъёс тодмо ӧвӧл на.

Семья... Мазэ веранэз, та кылэ котькудӥз аслэсьтыз валатонзэ понэ. Ми понна семья — со секыт минутъёсы пыкет но юрттэт, со матысьёсыд сярысь сюлмаськон но яратон. 

— Кыӵе шонер кылъёс! Котькинлэн но дунне вылын шуг-секытъёсты вормон понна сыӵе пыкетэз но юрттэтэз мед луоз, матысьёсмылэсь сюлэм шунытсэс, яратэмзэс шӧдыса но асьмеос но соослы яратон кузьмаса уломе!

Семьяын тупаса, огмылкыдын улон вал, вань но азьланяз но валтӥсь луоз — ӵапак соин герӟаське асьмелэн вуономы, асьме семьяослэн вуонозы но кунмылэн вуоноез.