Пичи малпанъёс – бадӟым вормонъёс (+фото)

Визьнодась — со нырысь ик юрттӥсь. Ӵапак нылпилэн тодон-валан дуннее сюресэз нылпи садысен ик кутске. Татын со нырысетӥ букваосын тодматске, нырысетӥ лыдпусъёсын эшъяське, эктыны-кырӟаны быгатонлыкъёссэ усьтэ, со сяна, адямиосын кусып возьыны но дышетске. Соин визьнодась азьын но туж бадӟым ужпум сылэ — пичи адямиез бадӟым дуннее кыдатыса лэзён. 

Сыӵе ушъямон но данъяськымон визьнодасьёс пӧлы пыртыны луэ Ципья нылпи садысь крезьгуръя кивалтӥсез Лариса Тарасоваез но. ТР-ысь Электрон дышетонъя личной бамаз пырыса учкид ке, Лариса Николаевналэн данъетъёсыз паймымон трос (малпасько, ваньмыз татчы пыртымтэ но, дыр, ай). Солэн кылдытэм концерт номеръёсыз ӵыдонтэм чебересь. Вашкала амалъёсын герӟам пуштросо кырӟанъёс но эктонъёс паймыто устолыкен, нош чылк-чылк калык дӥськутъёс воксё синмаськыто. Нылкышнолэсь уж бервылъёссэ адӟыса, валаськод: ужез янгыш быръемын ӧвӧл, нылпиен ужан — солэн призваниез.

12 ар ини со сюлмысь быдэстэ ас ужзэ, нылпиос но сое ярато, ачиз но соосты аслэсьтыз нунокъёссэ кадь уте, со борды кыстӥсько — та самой бадӟым дунъет, дыр, визьнодась понна.

Лариса Николаевнаен вераськон луыны кулэ вал ни кылем арын ик. 2023 арлэн шуркынмоназ со дошкольной дышетон программаосты вордскем кылын улонэ пыӵатӥсь педагогъёс пӧлын радъяськем элькун вожвылъяськонын кыкетӥ интыен пусйиськиз. Ёросмы понна та бадӟым вормон луиз. Но та сярысь берлогес, ваньзэ радызъя эскером.

Ципья нылпи садлэн юртэз палэнысен туж чебер адӟиське. Матаз лыктыса но валаськод:,татын ужасьёс юнме дырзэс уг ортчыто: котыр сяськаос, пӧртэм фигураос, ваньмыз утялтэмын. Нош нылпи садлэн пушказ котыр небыт ковёръёс валемын, дорын кадь потӥськод. Кыкетӥ этажлэн крезьгуръя залэз дорын пумита веськрес, пальышась ымныро кышномурт — Лариса Тарасова — таӵе лад-лад дӥсяськыса пумитась визьнодась доры мон но лыктысал дышетскыны. Солэн залаз пуконъёс но радъямын, ӝӧказ но ваньмыз ас интыяз пуктэмын. 

— Лариса Николаевна, дунне вылысь пӧртэм тунсыко ужъёс пӧлысь малы тӥ крезьгуръя кивалтӥсьлэсь ӧнерзэ бырйыны малпады?

— Мон пичи дырысен ик асме артистэн адӟисько вал ини. Кырӟан-эктонъёсты быдэстыны яратылӥ. Нылпи садын ужаны кутскон азьын, 16 ар Тагашурысь гурт клубын ужай. Елабугаысь лулчеберетъя но искусствоя училищеез йылпумъям бере нылпи садэ пыроно кариськи, малы ке шуоно Ципьяын улӥсько вал бере, гуртэ ветлыны туж секыт вал ини мыным. Со дыре ӵапак нылпи садын инты но сюриз. Кык ар пала вуж зданиын но ужаны тупаз на. Со дырысен асме нылпиослы но лулчеберетлы сӥзисько. Лулчеберет удысын дышетскем сяна, психолог-педагоглы но дышетскеме вань.

— Клубын но, нылпи садын но тӥледлы калыкен, адямиен ужано, пӧртэм номеръёс, крезьгуръёс утчано луиськоды. Пӧртэмлыкез вань-а?

— Пӧртэмлыкез туж шӧдскымон. Клубын тон гурт калыкен ужаськод. Адямиосты вань ужрадъёсы ӧтчано, репетициосы кысконо, нош гурт калыклэн сотэк но юрт котыраз ужъёсыз тырме. Нош нылпи садын тыныд адями утчано ӧвӧл ини. Мыным умойгес нылпиосын ужаны, нырысь ик соос вӧзам, утчано ӧвӧл. Бадӟымъёсын со пумысен секытгес ужаны. 

— Кызьы радъяське тӥляд ужан нуналды?

— Кабинетам лыктыса вуытозь ик нылпиос пумитало ини «ойдолэ, репетици каром», «ойдолэ, кырӟалом», шуыса. Шумпотыса лыкто занятиосам. Куддыр курткаме но этаже тубыкум ик кылёно луисько. Дыр шоры учкыса уг пукиськы, нылпилэн мылкыдэз вань ке, соку ик тыршисько ваньзэ дасяны. Котькуд группаын арняезлы кык пол занятие луэ, самой покчи группаын занятиос уг нуисько на, но каллен учкисько ини, кинлэн кыӵе сямез, кин маин тунсыкъяське. Распевкаос лэсьтӥськом, со понна кӧня ке фортепианоен но шудӥсько. Со сяна, туэ арысен эктонъя кружок но нуисько на. Собере ини пӧртэм кагаз ужъёс борды кутскисько. Валамон ни, куд-огез доре но бертылэ. Но та ваньмыз ӝутскем мылкыдэлы уг люкеты. Кузпалэ но шуэ: «Тон котькуд нунал ужад празднике кадь мынӥськод». Бен, мон шумпотыса мынӥсько ужам. Котьку йырам нылпиосы.

Соосын валче ми кыр-ӟаськом но, эктӥськом но, спектакльёс но пуктӥськом, визьнодасьёсын валче утренникъёс но радъяськом. Бадӟым инты али «Мудорвай» конкурслы висъяськом. Визьнодасьёсын вераськыса, огазе ужаны тыршиськом, нылпиосты озьы гинэ бадӟымесь вормонъёсы вуттыны луэ. Крезьгуръя кивалтӥсь — со нырысь ик ужрадъёсты радъясь, концерт программа лэсьтӥсь. Арлы быдэ отчётной концерт пуктӥськом. Нылпиослы сяна, нылпи садын ужасьёсын но огазе номер пуктӥсько. Номеръёсты но крезьгуръёсты ас мылкыдъя бырйисько. Сюлэмам сыӵе тӥни тылгизьы ӧз ке ӝуатскы, мон крезьгурез уг кутӥськы, солы дыр вуэмын ӧвӧл на.
Вань сыӵе нылпиос, кудъёсыз шуген пырисько, возьдасько. Соосын мукетгес амалъёсын ужано луэ. Котькуд адямилэн аслаз сямез ук. Кин ке но сценкаосын туж усто, кин ке кырӟа, кин ке кылбуръёсты умой тодэ, кинлэн ке эктонъёслы яратонэз сайка. Котькуд нылпи аспӧртэмлыко, соин нылпи садын ми нырысь ик нылпилэсь быгатонлыкъёссэ шараяськом, коллективе пыртӥськом.

— Нылпиосын сяна, тӥледлы анай-атайёсын но ужано луэ, дыр. Споръяськон дыръёсы кыӵе кылъёсын соосты буйгатӥськоды?

— Нылпиез визьнодан сюресын анай-атайёс валтӥсь юрттӥсьёс луыны кулэ. Споръяськон дыръёсы валэктӥськом ини, малы нылпиез ум пыртӥське. Кин ке берлогес пыриське, будэмъяз дӥсьтӥсь луэ. Нылпи соку ик уг усьтӥськы ук, солы кӧня ке дыр кулэ. Котькуд ужын кадь ик милям но пӧртэм дыръёсмы луо. Но тау шуыны кулэ милям анай-атайёсмылы, котькуд куронъёсмылы соку ик вазисько, концерт номеръёсмылы костюмъёс но ас коньдонэнызы вуро. «Нылпиос мед гинэ пыриськозы, асьсэды мед возьматозы», — шуо. Таӵе кылъёс эшшо но бадӟым стимул сёто ужаны. Озьыен, шумпотонъёсмы тупамтэ дыръёслэсь тросгес.

— Ёросамы Ципья гурт самой йӧскалыко луэ, тае лыдэ басьтыса, кызьы визьнодан процесс радъяське? Нылпиос тросэз ӟучомыса будо, тӥ дорын та шӧдӥське-а?

— Туннэ нуналэ та туж бадӟым юан кылдытэ шуысал. Мыным туж валантэм луэ, малы семья пушкын анай кылын уг верасько. Котькуд адями нырысь ик аслэсьтыз вордскем кылзэ умой тодыны кулэ. Юнме уг верало ук, мукет кылэз тодон понна, азьло ик аслэсьтыдзэ умой тодоно. Котькуд группаын бигерез но, ӟучез но, удмуртэз но вань. Огъя программа ӟуч кылын радъяське ке но, котькуд нылпиен ӟечъяськыны анай кылын тыршисько. Али дуннеез валаны кутскись адями понна туж дуно, куке тонэн вордскем кылын верасько. Каллен-каллен калык сям-йылолъёслы тросгес саклык висъяны тыршиськом, пӧртэм ужрадъёс ортчытӥськом, калык дӥськутэн тодматӥськом. Нылпиослы но тунсыко потэ: пӧртэм калык кырӟан-эктонъёсты но быдэсто. 

— Таин валче кылем арын элькун конкурсэ пыриськемды сярысь но юаме потэ вал. Дыр ортчыса, кыӵе мылкыдъёсты али?

— Та конкурсэ ас мылкыд каремея пыриськи. Азьвыл ик туж кышкай. Уйбыт но изьыны ӧй быгаты дасяськыса, весь малпаськисько вал, кызьыгес, мар карыны. Ӵукна султӥсько — конкурс йырам, изьыны выдӥсько, нош ик конкурс йырам. Но ортчем бераз аслам сюлмы ик шумпотӥз. Эшшо но трос малпанъёс кылдо. Сыӵе конкурсъёсы ветлыса, нырысь ик аслыд мар ке выльзэ басьтӥськод, кыкетӥез — дӥсьтонлыкед будэ.
Юрттӥсьёсы но трос вал. Быдэс коллектив аслэсьтыз люкетсэ пыртӥз дасяськонэ. Гульнара Фирдависовна (Нутфуллина — ёросысь школаазь визьноданъя методистэз) но Фарида Фирдависовна (Хафизова — Балтасьысь 5 номеро нылпи садлэн визьнодасез) уй но нунал ми дорын улӥзы шуыны луэ. Вань сюлмысен мыным юрттӥзы. Ирина Валентиновна но котьку монэн артэ вал. Мон кадь ик сюлмаськиз, котьку кенеш, юрттэт сётыны дась вал. Малпасько, кивалтӥсен милемлы удалтӥз, малы ке шуоно кивалтӥсь ке умой, коллектив но огазеяське, сюлэмзэ поныса ужа. Ваньзылы туж бадӟым тау шуэме потэ! Та бадӟым вормон мынам гинэ ӧвӧл, татын туж трос адямилэн кужымез пыртэмын. 

Вераськонамы трос гинэ грамотаосын, пӧртэм статуэткаосын шкафез синйылтӥ. Кыӵе гинэ тунсыко шудонъёс, крезьгур инструментъёс ӧвӧл татын. Вань грамотаос но адскымон интые радъяса пуктэмын. Элькун конкурсысь грамотаосты адӟыса, Лариса Николаевна вераз: «Тани ваньмыз нырысетӥ инты луиз ке, соку гинэ буйгатско. Али сюлмы та йылпумъянъёсын тыр ӧвӧл на». «Озьыен, ӟучъёс верамъя, главное не победа, главное — участие, тӥляд девизды ӧвӧл?», — юасько. 

— Котькытын самой вылӥезлы кыстӥськоно. Адямилэн котьку кыӵе ке быдэстоно ужпумез луыны кулэ. Азьланяз та вожвылъяськонэ одно ик пырисько на, нырысетӥ инты басьтоно на.

— Ас семьяды тӥ понна оскымон пельпум луэ-а?

— Семьялэн пыкет луэмез та ужын валтӥсез, дыр. Евгений кузпалэным ми 1998 арысен ӵошен улӥськом. Милям 2 нылъёсмы вань — Анжела (2000) но Алина (2007). Алина нылпи садэ ветлон дыре ик ӵапак ужаны кутски. Солэн вожан сямез шӧдӥське вал. Ноку но кужмысь кружокъёсы ӧй нуллы, ас мылкыдзыя бырйизы. Кыӵе ке визь-кенеш куризы ке, одно ик юрттыны тыршисько. 

— Огъя вераса, визьнодась — со кин?

— Визьнодась — со анай, матысь эш, дышетӥсь, психолог но педагог. 
Малпасько, та кылъёс ик ваньзэ верало. Нылпи садысь педагог — со нырысь ик нылпилэн самой матысь эшез луыны кулэ. Малы ке шуоно семьяезлэсь люкиськыса, со выль дуннее омырске, солэн азьлань сюресэз копак нылпи садысь басьтэм тодон-валанъёсын герӟаське. Таӵе визьнодасьёслэсь ик быдэс шаермылэн историез кылдэ. Та пумысен туж кельшизы Лариса Николаевнаен верам кылъёс:

«Нылпи — со корка кадь. Макем юн фундамент пуктӥськод, сокем зӥбыт луэ со».

Визьнодасьлэн каньыл вераськемез, веськрес мугорез но пальышамез сюлме ик шуныт мылкыдъёс кельтӥзы. Кезьыт тӧл куазен но нылпи садысь шумпотыса потӥ. Соку ик вожъяськон сяме но кылдӥз: кыӵе удалтӥз нылпиослы визьнодасен! Котькуд нунал соосты «праздник» возьма. 

Лариса Николаевнаез, вань визьнодасьёсты, та удысын ужам ветеранъёсты сюлмысен ӧнер праздникенызы ӟечкыласьком! Котькуд нуналды нылпиослэн сюлмысь серекъяменызы, шумпотэменызы мед тырмоз. Улонады нылпиослэн кадь пиштӥсь ымныръёсты мед луозы, нош ужан мылкыдды ноку но медаз куашка.

Туспуктэмъёс: Ю. Щербакова, Ципья нылпи садлэн архивез, личной архив