Покчи Лӧзяын спорткомплексэн но нылпи садэн тодматскизы

Сӥё-дано ужрадэ РФ-ысь Кун Думалэн 7-тӥ ӧтёсэзлэн депутатэз, йӧскалыкъёсын ужанъя комитетлэн председателезлэн воштӥсез Ильдар Ирекович Гильмутдинов, Балтась ёрослэн главаез Рамиль Рашитович Нутфуллин но районысь трос мукет представительёс, нылпиос но анай-атайёс, спорткомлексын ужасьёс, спортэз матын карись адямиос пыриськизы.

— Туннэ Покчи Лӧзяын, зэмзэ но, бадӟым праздник, малы ке шуоно спортзаллэн усьтӥськемез но, садиклэн но капитальной ремонт бере ужаны кутскемез — кулэ луись, калыкен витем ужрад. Пусъеме потэ, республикаын трос программаос ужало. Уноез соос пӧлысь районъёс понна малпамын. Со программаослэн юрттэменызы асьме гуртъёсмы будо, выль зданиос лэсьтӥсько, сюресъёс выльдӥсько — ваньзэ лыдъяса быдтонтэм. Покчи Лӧзя поселениын гинэ но берло аръёсы шӧдскымон трос ужъёс быдэстӥськизы — нылпи садлы, спорткомплекслы капитальной ремонт лэсьтӥськиз, клуб кемалась ӧвӧл выльдӥськиз, сюресъёсты югдытӥзы. Ваньмыныз кулэезъя пайдаяськыны мед кылдоз. Оскисько, та выльдэм спорткомплексэ нылпиос но, егитъёс но, мӧйыос но шумпотыса ветлозы шуыса. Ваньдэсыз праздникен ӟечкыласько но сӥзисько ваньзэ умойзэ гинэ, — шуиз Рамиль Рашитович.

Ильдар Ирекович но та верам кылъёсын соглаш кариськиз. Со но спорткомплеслэсь но нылпи садлэсь усьтӥськемзэ калык понна туж кулэ ужрадэн лыдъям малпанъёссэ вуттӥз. «Гуртын-а, городын-а асьмеос улӥськомы — котькытын адямиослы огкадь улон условиос кылдытыны тыршыны кулэ. Нылпиосмы визьмо гинэ ӧвӧл, таза но мед луозы», — шуиз со.

Выльдӥськем, бадӟым спорткомплексын ваньзэсты — егитъёсты но, мӧйыосты но — витьыса кылё. Татын волейболэн но, баскетболэн но, мини-футболэн но шудон понна луонлыкъёс кылдытэмын; куасэн нискыланы, туризмен вырыны но кулэ луись инвентарьёс вань.

Со иу нуналэ кивалтӥсьёс Покчи Лӧзяысь тупатъям ужъёс бере выльдӥськем нылпи садэн но тодматскизы.

Нылпи сад но туала куронъёслы тупа. Визьнодасьёс но куноосты «Выльдэм нылпи садын шумпотыса ужаськомы» шуыса пумитазы, нылпиос но садике шумпотыса ветлӥськомы шуыса оскытӥзы. Туннэ нуналэ татын 72 нылпи визьнод басьтэ. Соослы шуыса, ремонт дыръя садикын йылэтыса одӥг кабинет но радъяллям. Визьнодасьёс кема малпаськытэк та кабинетэз сюрес вылын ветлон правилоосты дышетон кабинетлы тупатӥллям.