Хезмәт

Полициын тыршись, кышкасьтэм воргоронъёс служить каро

10 шуркынмонэ Россиысь Внутренней ужъёсъя министерство ӧнер праздниксэ пусйиз

Россиысь Внутренней ужъёсъя управлениын ужасьёс дасэтӥ арзэ ини пусъё Полицилэсь нуналзэ. Трос аръёс ӵоже 10-тӥ шуркынмон милицилэн нуналыз вал. Реформа ортчиз, нош Внутренней ужъёсъя управлениын ужасьёслэн праздниксы ӧз воштӥськы. Россиысь Внутренней ужъёсъя управленилэн Казань городъя 14 номеро «Дербышки» полици отделысьтыз полициысь старшой сержант, Балтасьын улӥсь Владимир Ишмурзин праздникен валче асэныз тодматӥз. Туннэ нуналэ со полицейской-водитель луыса тырше. 

Зэм, со оперуполномоченнойёс кадь йыружъёсты шараян бордын уг ужа, йыруж лэсьтӥсьёсты пытсэт сьӧры пуктон понна доказательствоосты уг люка, экспертъёс выллем вещдокъёсын но уг ужа (телевизор учкыса олокыӵе кылъёсты но тодод). Но солэн ужезлэсь кулэлыксэ пусйыны кулэ: котькуд полицейскойлэн ужез полицейской-водительлэн дыраз тодыса-валаса но профессионально ужаменыз туж юн герӟаське.

Туала улонэз внутренней ужъёсъя органъёстэк, полициын тыршись адямиостэк син азе пуктыны но уг луы.  Ёросысь, республикаысь калыклэсь, огъя вераса, шаермылэсь каньыллыксэ утён понна нуналмысь нуналэ трос кужымзэс поно соос – полициысь представительёс. Соослы туж чурыт куронъёсты пукто, со дыре ик соослы оскыса но уло. Полициын ужасез ваньмы таӵеен син азе пуктӥськомы, дыр: юн, кышкасьтэм, аслэсьтыз верам кылъёссэ быдэстӥсь, котьку юрттыны дась луись. Ӵапак Владимир Ишмурзин но сыӵе ик полицейской: ужезлы сюлмыныз сётскыса, ваньзэ радызъя ужась, но со дыре ик трос вераськисьтэм, ушъяськисьтэм.  Полицейской-водительын автомобильёсты яратон но адямиослы юрттон мылкыдъёс пӧлэстӥськыны кулэ. Оло, ӵапак та сямъёс ик юрттӥллям, дыр, сыӵе зӥбыт, но со дыре ик туж кулэ ӧнеръя ужась адямилы улоназ шонер сюрес бырйыны. Та сярысь аслыз но верам бере, кема малпаськытэк, Владимир Вячеславович шуиз: «Полицейскойёс пӧлын но пӧртэм сямоосыз луо. Кин ке вераськись, кин ке мултэс кылзэ уг потты. Но милемыз, полицейскойёсты, одӥгез огазея – ми калыклэн каньыллыкез понна кыл кутӥськомы». Зэм но, кыӵе умой но шонер кылъёс. Котькуд вакытэ, инкуазь шоры учкытэк, полицейской-водитель ас улонэныз рисковать карыса, секыт службазэ кылкутыса нуэ.         

Владимир Вячеславович полицилэн радъёсаз 2005-тӥ арысен ужа ини. Со вакытэ егит воргорон кемалась ӧвӧл гинэ армиын служить карыса бертэм луэ (2004-тӥ арын). «2005-тӥ арын тодмое полицие ужаны интыяськыны кенеш сётӥз, мон соглаш луи. Со дырысен полицилэн радъёсаз ини», - шуэ Владимир Ишмурзин.

Ӧнерезъя техник-механик луэ бере, кӧня ке дыр ӵоже Владимирлы дышетскыны тупа. Ӝыны ар ӵоже со стажировка ортче, собере Казаньысь учебной центрын дышетсконзэ азьланьтэ. 2005-тӥ арын егит воргорон Казаньысь патрульно-постовой службалэн полказ ужаны кутске. Дас ар ӵоже отын тыршемез бере, 2015-тӥ арын Россиысь Внутренней ужъёсъя управленилэн Казань городъя 14 номеро «Дербышки» полици отделаз полицейской-водитель луыса ужаны интыяське.

- Полицейской-водительлы машинаез умой нуллыны, ӝог ветлыны быгатыны кулэ. Со сяна, со городлэсь маршрутсэ но умой тодыны кулэ али. Ужмы озьы ик моральной но физической чиданлыкез кулэ каре. Соин ми, мукет полицейскойёс сямен ик, физической подготовкаосъя занятиосы ветлӥськом, нормативъёсты сдавать кариськом, - шуэ Владимир.

Кин ке малпалоз, полицейской-водительлэн ужез полициысь мукет ужасьёслэн кадь секыт ӧвӧл шуыса. Но таин нокызьы соглаш уд луы: ӵемысь йыртэмасьёсты кутон оперативниклэн быгатонлыкеныз гинэ ӧвӧл, нош водительлэн шаплы но чырткем луэменыз но герӟаське. Озьы ик тае но вунэтыны кулэ ӧвӧл: водительлэн ужез машина нуллонэн гинэ уг быры, куддыръя йыртэмасьёсты ӝегатонэ но пыриськоно луэ.

- Ужды шоры семьяды кызьы учке? Полициын тыршисьёслэн графиксы но лад-лад радъямын ӧвӧл шуыны луэ – куддыръя шутэтскон нуналэ но ужаны потыны тупа, - тунсыкъяськисько полицейскойлэсь.

- Семьяе монэ вала, ваньмыз ласянь поддерживать каре. Таня кузпалэ но пал кыл но уг вера. Ачим но, матысь адямиосы но дышизы, лэся, ни ужан графикелы. График сярысь ке верано, одӥ нунал ужасько но кык нунал шутэтскисько. Но пӧртэм сямен луэ, куддыръя малпамтэ шорысь ужаны потыны но тупа. Но мон дыши ни, аслам уже кельше, - валэктэ мыным выль тодмое.

Ужзэ кельшытэ бере, Казане ветлонэз но бадӟым проблемаен уг лыдъя Владимир Вячеславович – ваньмызлы дышем ини, соин мукет интые, Балтасьлы матэгес, ужаны интыяськемез но уг поты вылэм. Ӵош  ужасьёсынызы но умой кусыпъёссы возисько, пе, котьку ог-огзылы юрттыны но дась луо вылэм. «Зэмзэ ке верано, полициын тросгес егитъёс ужало. Но вань арлыдоос но. Ваньзэсын тупаса ужаськомы», - ас кылъёссэ юнматыса вера полицейской.

 Нокин понна бадӟым секрет ӧвӧл, дыр: гуртын гинэ но полициын ужасьёс каньыл улонэз уг тодо, городын ужасьёсыз сярысь веранэз но ӧвӧл. Владимир Вячеславович но та сярысь тазьы вера: «Сменалы быдэ шуымон кыӵе ке паймымон яке кышкыт учыръёс луо». Озьы. Йыруж лэсьтӥсьёс ноку но уг быро шол. Соин полициын ужасьёс но ноку ужлы уг ёрмо. Оперативникъёсын ӵош йыртэмасьёсты кутонэ мыныку, Владимир Ишмурзин адямиослэн сюлмаськонъёссылы мылкыдтэм уг кыльы. Со понна полицейской-водителез кивалтэтэз но, валче ужась эшъёсыз но гажало.

- Учырен пайдаяськыса, мынам коллегаосме ӧнер праздникенымы ӟечкыламе потэ. Тазалык, семьяяды шудбур, ужады каньыллык но карьера ласянь вылӥе ӝутскыны сӥзисько, - шуиз Владимир Ишмурзин. 

Мон но Владимирез, озьы ик полициын ужась вань кадь представительёсты Полицилэн нуналэныз сюлмысен ӟечкыласько. Тӥ туж бадӟым но кылкутымон ужез быдэстӥськоды – адямилэн кышкыттэмлыкез, каньыл улонэз понна кыл кутӥськоды. Тау тӥледлы, гажано полициын ужасьёсмы!

 

 

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: