Праздник яркыт тодэ ваёнъёс кельтӥз

Гырон быдтон удмурт лулчеберетэз азинтонын, йӧскалык асваланэз пыӵатонын но калыкъёс куспын тупаса улонэз юнматонын бадӟым инты басьтэ, калык сямъёсты но йылолъёсты выжыысь выжые утьыны юрттэ.

Удмурт лулчеберетэз азинтонлы чаклам праздник, зэмзэ но, аслэсьтыз кулэлыксэ возьматэ. Удмуртъёслэн вашкала но туала лулчеберетсы удмуртъёслы гинэ ӧвӧл, мукет йӧскалыкысь адямиослы но тунсыко потэ. Со сюлме пырись кырӟанъёсын но мылкыдэз ӝутӥсь эктонъёсын, яркыт дӥськутэн, удмуртъёслэн ӟеч мылкыдо луэменызы ас бордаз кыске. Соин но туннэ Гырон быдтонэз, зэмзэ но, интернациональной праздникен ниманы луэ ни, со ёросысь пӧртэм йӧскалыкысь адямиосты огазея, трос шулдыр мылкыдъёсты кузьма.

Туэ Гырон быдтон праздникмылэн мыло-кыдо кузёосыз луизы удмурт, бигер, ӟуч, пор но мукет калыкъёсты огазеясь Ципья, Смаиль, Кугунур гурт поселениос но «Труд», «Смаиль», «Активист» обществоос. Ужрадэз радъянэ но ортчытонэ вылӥын пусъем поселениосысь 9 удмурт гуртъёс пыриськизы. Тани соос: Сизнер, Вукогурт, Сырья, Ципья, Тагашур, Янгурчи, Кускем, Кургем но Дурга. Та гуртъёсын азьло дырысен эшлыко но ужась калык улэ.

Туннэ но «Труд», «Смаиль» но «Активист» обществоос, Хадиев Рашид Хафизовичлэн, Шакиров Ильгам Мансуровичлэн но Закиев Рафиль Наилевичлэн быгатыса кивалтэмзылы но ужасьёслэн асьсэ ужзы шоры кылкутыса учкемзылы луыса, экономика ласянь азинско. Озьыен, ужасьёслэн но улонзы умоя. Удмуртъёс но, тыршыса ужаменызы, ёрослэн, республикалэн но Россилэн экономикаяз асьсэ люкетсэс пырто. Тау тӥледлы со понна! Малпасько, поттэм расходъёсты умоен берытскозы.

Туж бадӟым тау шуэме потэ Удмуртиысь артистъёслы — Иван Котельниковлы, Алёна Тимерхановалы, Андрей Корниловлы но Егор Маштаковлы, озьы ик гурт клубъёслэн но культура юртъёслэн коллективъёссылы. Озьы ик праздникмес шулдыртӥзы Киров улосысь Вятской Поляна карысь «Чипчирган» ансамбль но. Тау туж бадӟым чебер концерт понна, шулдыр но капчи мылкыдъёс понна. Творческой азинсконъёс тӥледлы! Выльысь пумиськонъёсмес витиськом.

Сюлмысь таукаронме вуттӥсько ваньзылы, кин мыло-кыдо пыриськиз удмурт калык праздникез — Гырон быдтонэз — радъянэ но ортчытонэ. Малпасько, ужрадмы пӧрмиз но вылӥ радлыкен ортчиз шуыса.

Вань пыриськем адямиослэн кылкутонзылы но тупаса ужамзылы луыса, озьы ик Балтась муниципал ёрос кивалтэтлэн юрттэменыз праздникмы удалтӥз! Ваньдылы туж бадӟым тау!

Гырон быдтон эшшо огпол возьматӥз, асьме ёросысь калык сюлмысь ужаны но, мыло-кыдо шутэтскыны но быгатэ шуыса, праздник эшшо огпол юнматӥз Балтась ёросысь калыкъёслэсь огмылкыдын но куспазы тупаса улэмзэс.

Ваньдылы но юн тазалык, шудбур, азинсконъёс сӥзисько, вордскем шаермылэн сяськаяса улонэз понна тыршыса ужаны, удалтэм урожайлы шумпотыны мылкыд карисько.

Таиз но Гырон быдтон котькуд удмуртлэн, котькуд кунолэн улоназ яркыт тодэ ваёнъёс кельтэм, дыр, шуыса оскисько.   

Ольга Пчельникова,
Балтась ёросысь удмуртъёслэн

«Кенеш» НКА-зылэн тӧроез