Хезмәт

Сергей Никифоров: «Пудоен ужаны мыным котьку кельшиз»

«Бурнак» обществоысь скал кыскисез Азьмынӥсьёслэн слётазы пусйизы.

2019-тӥ арын Турья гуртэ ветлыса, Никифоровъёслэн семьяенызы тодматскиськем вал. Соку асьме гожъяськисьмы Николай Никифоров сярысь статьяме дасяны материал люкай. Никифоровъёс монэ мыло-кыдо пумитазы, куно каризы. Дыр вуиз Николай Михайловичлэн пиез сярысь гожтыны.

Сергей Николаевич Никифоров сюлэмызъя ик гурт адями. Улон сое пӧртэм интыосы вуттэм — Киров улосвылэ, Комиын но со улэм, туннэ нуналэ со атаезлэн вордскем гуртаз, Турьяын, улэ.

— Пӧртэм интыосын ужаны вутски ини, — маде Сергей Николаевич. — Комиын улыку МВД-ын ужай, вордскем палъёсы бертэме бере колхозэ ужаны интыяськи. Нырысь Янгулын «Яна тормыш» обществоын тырши, собере «Бурнак» обществое ужаны выжи. Янгулын ужаку, кунянъёсты сюдӥ, дас ар ӵоже отын ужай. Бурнакын но со ужме азинтӥ. Пудоен ужаны мыным котьку кельшиз.

Сергей Николаевич школазэ йылпумъямез бере Амур улосвылын одӥг но ӝыны ар ӵоже армиын служить каре. Собере ини Коми улосвылэ кошке. Отын ньыль ар ӵоже ужамез бере асьме пала бертэ.

— Анае, Екатерина Алексеевна, гумырыз ӵоже скал кыскись луыса ужаз — егит дырысеныз пенсие потытозяз. Гуртын улӥмы бере, пудо но котьку вал. Соин паймонэз но ӧвӧл, мон пудо борды кыстӥськи но колхозын ужаны кутски шуыса, — валэктэ колхозын ужамез сярысь Сергей Николаевич.

Кӧня ке нуналскын, шонергес вераса 8-тӥ тулыспалэ, скалъёсты кыскыны кутскемез дырысен ӝыны ар луэ вылэм. Туж ик кема скалъёсын уг ужа ке но, Сергей Николаевич та ужлэн секретъёсызлы но каллен дышетске ини. «Нырысетӥзэ скалъёсты кыскыны кутскеме бере, сураськыса быдми — кудзэ скалэз кыски, кудзэ — ӧй, — серекъяса тодаз вае воргорон скалъёсын ужаны кутскем дыръёссэ. — Но котькыӵе ужлы, кулэ карид ке, тыршид ке, дышыны луэ. Али дыши ини шуыса вераны быгатӥсько. Быгатонлыкъёсы, опытэ луэм бере, секытэн дыши шуэме но уг луы».

Озьы, пудоен ужан понна тодон-валан сяна, тросгес быгатонлык кулэ луэ вылэм. Тодон-валанэд луиз ке но, сое уж вылын кутыны быгатыны кулэ. Сергей Николаевичлэн тани нокыӵе нимысьтыз тодон-валанэз ӧвӧл — 9-тӥ классэ йылпумъямез бере со дышетскыны пырем луэм ке, дышетсконзэ кельтэм. Но та солы улонын но ужын аслэсьтыз интызэ шедьтыны люкетымтэ. Пудоез яратэ бере, ужез но кельшымон луэ.

Бурнакын ферма туж ик выль ӧвӧл ке но, ужаны отын умой, пе. Ӝожтӥськисьёс ӧвӧл кадь. Ужан инты — шуныт, коллектив — умой. Тани Сергей Николаевич но валче ужась нылкышноосыныз туж ӝог огъя кыл шедьтэм.

— Коллективмы умой, куспамы керетыса ум ужаське. Котькыӵе коллективын ужад ке но, та самой валтӥсез — ваньзэсын умой кусып возён. Соку ужаны но капчигес луэ, — валэктэ со.

Группаязы соос куинь ӵошен ужало — кык нылкышноос но Сергей Николаевич. Соос сю скал понна кыл куто.

Ужан нуналзы ӵукна ньыль но ӝыны часэн кутске: скал кыскисьёс кормушкаосты сузяло, скаллэсь пыдулзэс чылкыт каро, опилка пазяло, собере скалъёсты кыско… Ужзы вераса быдтонтэм трос. Скал кыскисьёслэн ужзы берло аръёсы трослы капчиёмиз шуо ке но, та ужзы ӧжытгес кылиз шуэм кыл ӧвӧл. Котьма ке но, сомында пудоез утьыны кулэ ук али. Нош Сергей Николаевич ужзэ секытэн уг лыдъя, скалъёс но сое кылзӥсько, пе. «Скалъёс думемын, ворсамын бере, кытчы пырозы? Кылзӥсько», — серекъя воргорон.

Скал кысконэз пиосмуртъёслы тупасьтэм уж шуыса но уг малпа Сергей Никифоров. Туннэ нуналэ доразы но трос пудо вордо бере (скалзы гинэ но ньыль), та ужлы со дышемын ини. Кузпалыз Юлия нылпи витьыкуз, скалъёссэ ачиз кыскем. Кызьы скал кыскись луыса ужаны кутскиды шуэм юанлы со пӧятэк вераз: «Асьме палан малы ке но скал кыскись луыса ужась воргоронъёс ӧжыт. Киров улосвылын соос, кылсярысь, тросгес. Отын ужай бере, тодӥсько. Нырысь ик коньдон сярысь малпаськи, мазэ ватонэз. Малпай: пудоосты яратӥсько бере, ма луоз скал кыскыны кутски ке? Колхозын котькыӵе уж секыт ини. Колхоз — колхоз ини со. Кӧня ар ӵоже корка лэсьтыны курадӟимы — лэсьтӥмы. Машина басьтӥмы. Нылпиосты но будэтоно, ваньмыз понна уксё кулэ».

Кышноез туннэ нуналэ — юрт возись кышномурт (домохозяйка), соин Сергей Николаевич семьялэн валтӥсь сюдӥсь-вордӥсез. Куинь нылпиоссэс — Никитаез, Игорез, Лизаез — пыд йылазы султытонзы вань.

— Уж вань дыръя, ужаны быгатыку шумпотыса ужаны кулэ. Милемыз, кылсярысь, нуналлы быдэ ӵукна но, ӝыт но автобусэн ужаны ветлыто — та но туж умой. Малпано ке, трос каньыллыкъёс ужасьёс понна радъямын. Ужа гинэ, — вера пиосмурт.

Воргоронлэсь тыршыса но азинлыко ужамзэ «Бурнакын» умой тодо. Арлы быдэ умой показательёсты возьматӥсь пиосмуртэз 2018-тӥ арын Азьмынӥсьёслэн слётазы но пусйиллям, таяз арняе ортчем слётын но Сергей Николаевичлэсь ужамзэ вылӥ дунъязы (зэмлык понна пусйыны кулэ, пудо утись луыса ужакуз возьматэм показательёсызъя), Балтась ёрослэн главаезлэсь Таукарон гожтэтсэ сётӥзы. Сыӵе кузьым азьпалан но бадӟым вормонъёсы вутскон понна стимул мед луоз.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: