Скал кыскисьлэн ӧнерез гурт улонлэн азьпалэзлы оскон сётэ

Котькин уз быгаты шунды пуксёнэз но шунды ӝужанэз уж дораз пумитаса, чурыт графикен ужаны. Ӵапак та ужасьёслэн тыршемзы бордын луэ хозяйстволэн каньыл, тыр улонэз но. Шумпотымон, асьмеос пӧлын гурт удыслы, ужзылы сюлмысь сётӥськемъёс трос. Одӥгез соос пӧлысь — Сизнер гуртысь скал кыскись Екатерина Пиляева.

Екатерина Валентиновналэн нимыз район газетамы ӵем потылэ — со азьмынӥсь скал кыскисьёс пӧлысь одӥгез. Тани туэ южтолэзе солы ТР-ысь сӥё-дано пудо утись ним но сётӥзы. Кызьы уд гожты со сярысь!

—  Тӥледыз азьмынӥсь скал кыскисез кадь быдэс район тодэ, дыр, ини. Кызьы сыӵе бадӟым вормонъёсы вутскиды? — шуисько, вераськыны кутскеммы бере ик.

— Ваньмыз адямилэн тыршемез бордын луэ. Ужамъя опыт но люкаське, ужлэсь радзэ но валаны кутскиськод, ужед но соку умойгес пӧрме. Котькыӵе уж борды дышоно, — шуэ нылкышно.   

Паймоно кадь: ужезлы трос аръёс сӥзьыса тыршем, пудоосты утем нылкышно ӧнерезъя медсестра луэ вылэм. Но Екатерина Валентиновналы та удысын кема ужаны кылдымтэ. Можгаын кык ар дышетскыса медучилищеез йылпумъямез бере кӧня ке ар гинэ Сизнер гуртысь медпунктын ужа но, картлы кошке, кема улытэк декретэ но потэ — Сергей но Екатерина Пиляевъёслэн 1993-тӥ арын бадӟым нылзы Наташа вордске. Со сьӧры ик, 1995-тӥ арын, Маша но вордске. Декретысь потытозяз гуртысьтызы медпунктсы борӟаське вылэм ини. Соин нылкышно гуртысь клубазы заведующей луыса ужаны пыре. 2001-тӥ арын нош одӥг нылзы, Юля, вордске. Та нылэныз декретысь потэмез бере ини Екатерина Валентиновна интяыське Смаиль гуртысь фермае. 

— Соку, 2004-тӥ аръёсы, колхозлэн председателез адямиосты люкаса, колхозын ужаны ӵектӥз. Ужасьсы луымтэ. «Мыныса гинэ утё, кельшиз ке ужало, ӧз ке — уг» — шуи но, мынӥ. Тӥни со дырысен ини та ужын тыршисько, — вера Екатерина Валентиновна.

Кызьы скал кыскись луыса ужаны кутскем, озьы туннэ нуналэ но скал кыскисьлэсь ужъёссэ быдэсъя со. Каруселе потэмзылы туэ ини куинь ар луэ ке но, ужзы но кылкутонзы ӧжытгес кылиз шуыны уг луы. Скалъёссы но «Смаильёслэн» трос — ог сюрс йыр мында. Сомындаез скал кыскисьёс куать ӵошен кык сменаен утё — куинез нышырозь ужа, куинез — нышыр бере.

— Ужаны капчи ӧвӧл, кыӵе гинэ учыръёс уг луыло. Висись скалъёсты но асьмелы учкыны тупа, котькудзэ эскероно, котькудӥзлы дыр шедьтоно, — шуэ Екатерина Валентиновна.

Пичи дырысеныз ужаны дышетскем адями гинэ таӵе секыт ужын кема ужаны чидалоз, дыр. Но Екатерина Валентиновна вордскем ужась, тыршись семьяын. Анай-атаезлы юрттыса будэм, пудо но соос котьку вордӥллям. Огъя вераса, зэмос ужась нылкышно. Соин паймонэз но ӧвӧл, кин выжые со сыӵе ужась шуыса.

Кин ке вералоз, туннэ нуналэ хозяйствоос, фермаос туала техникаен оборудовать каремен гинэ умой ужаны быгато шуыса. Но мон тазьы верасал: нокыӵе техника уз быгаты адями кадь ужез быдэстыны. Фермалэн ужамез, солэн азинсконъёсыз меӵак пичи дырысенызы ужез яратыса будэм, ужзылы сюлэмзэс сётыса ужась адямиосын герӟаське. Екатерина Валентиновна но аслаз уж борды кыстӥськеменыз, кылкутымон учкеменыз ас ӧнераз лидер луэм. Солы азьпалан эшшо но бадӟым вормонъёсы вутскыны сӥзисько.