Сырья гуртын улон сыръя

Ми, четэ кошкемъёс, анай-атай юртысь палэнэ улыны но ужаны интыяськемъёс, кема витимы та нуналэз. Малы ке шуоно милемлы, кыдёке интыяськемъёслы, ог-огмес ваньзэс валче адӟыны уг тупа. Семыке кин бертэ, кин уг, кин вазьгес дыртыса кошке, кин бергес вуэ. Гурт калык ог-огзэ котькуд нунал адӟыны быгатэ. Кин куное ӝамдэлы гинэ бертыса кошке, соосты но гуртоос адӟо ик, пумитало.

Милемлы мӧзмем сюлэммес буйгатыны, пумиськыса вераськыны муг сюриз. Гуртлэн пумаз спортивной площадкаын милемыз пумитазы бадӟым куноосты кадь: шулдыр крезьгурен, пӧсь табанен, ческыт вунэтэм шӧмо кӧжы кисален, сӥлё-вӧё ӝукен, самоварысь зыно турынъёсын пӧсь чаен. Пукыны инты но малпамын, сцена но артистъёслы дась. Вожвылъяськонэз но ӵошатсконэз яратӥсьёслы дасямын трос пӧртэм шудонъёс, кузьымъёс. Вамышлы быдэ кӧня шумпотон синкылиосын пумиськонъёс, ӟыгыръяськонъёс, пумтэм вераськонъёс, егит будэм пиналъёсын но вунэтэм адямиосын выльысь тодматсконъёс! Нокинлэн но сюлэмыз бугырскытэк палэнэ огназ ӧз кыльы, кожасько. Кыӵе мусо но матысь потэ вордскем гуртысь калык!

Нош сцена вылын мар даурто Сырья нылкышноосмы но пиналъёс! Чебер удмурт дӥськутэнызы, жингрес куараосынызы, чылкак профессиональной артистъёс лыктӥллям, кожалод!

Вылӥ кивалтисьёс но палэнэ ӧз кыле. Лыктӥллям юри, гурт калыкез гажаса, праздникен ӟечкыланы. Дунъяло ик калыкмес, туж тыршись, ужась, оскыны луымон визьмо калык улэ шуо гуртамы. Озьы ик вань, шонер соос верало. Медаз гинэ куштэ удмурт гуртмес, мед юрттозы, ужтэк медаз кельтэ но умой уждун мед тырозы. Калык эшшо но лӧптыса ужалоз.

Озьы малпамеям сцена вылэ потӥзы Удмурт Элькунысь лыктэм артистъёс, вить Сергейёс. Кутскиз ук шулдыръяськон. Пыдъёс асьсэос нуо эктыны! Вань калык кутскиз, кызьы быгатэ, озьы позыръяськыны, берганы. Кезьыт куазь но ӧз ни люкеты, тэтчаса, шулдыръяськыса шунамы ваньмы...

Куазь но пеймыт луиз ни, артистъёслэн но туж ик кошкемзы уг поты ни кадь, калык но уг таркаськы. Кытчыозь кыстӥськиз на Плотников Николайлэн, усточи арганчилэн, шудэмезъя шулдыръяськон, вераны уг тодӥськы ни.

Но мар вераме потэ? Йыбырттыса ик тау шуэме потэ Леонид Дмитриевич Сапожниковлы та праздникез дасяны мылысь-кыдысь басьтӥськемез понна! Котькуд пичи вамышсэ, чыры-пыры ужъёсты ваньзэ пыр-поч малпам, радъям. Леонид Дмитриевичлэн юрттӥсьёсызлы ваньзылы туж бадӟым тау! Гурт калыклэн пыриськемезлы, дасяськемезлы, котькуд коркан куно пумитасьёслы туж бадӟым рамат!!! Улонды азьланяз но умой мед радъяськоз, уката но шулдыр огкылысь тупаса мед улоды!

Четэ кошкемъёслэн нимынызы тау каре Н.Я. Крючкова (Сапожникова).

Вордскем гуртэ! Сыръя гуртэ!

Я вань-а меда тынэсьтыд чеберез?

Пуштрес бадьёс пӧлын нюкъёсамы

Жингрес гурзэ кисьтэ уӵы котькуд тулыс.

Гуртлэн шораз, Исьток нюкын но Кереметын

Жильыр вазё чылкыт, юзмыт ошмес синъёс.

Вордскем гуртэ! Сыръя гуртэ!

Я вань-а меда тынэсьтыд узырез?

Бусы лудъёс но бакчаос котькуд вакыт утялтэмын,

Ас емышеныз, ю-няненыз куно каро дауръёсын.

Сяськаё возь вылъёсын, пичи-бадӟым нюлэсъёсын,       

Узыос но борыос, губиос но мульыос — ваньмыз удалтэмын.

Вордскем гуртэ! Сыръя гуртэ!

Я вань-а меда тынэсьтыд дуноез?

Кызьпу арамаос, гурезь бамъёс но шормуӵъёс

Утё, возё кадь тушмонлэсь.

Вуко сюрес, Шонер ветлон,

Пышты сюрес вутто мукет дуннеосы.

Вордскем гуртэ! Сыръя гуртэ!

Я вань-а меда тынэсьтыд даноез?

Ужась калык татын улэ,

Соин узыр мусо гуртмы.

Тыршись калык татын улэ,

Соин чебер гурт котырмы.

Гажась калык татын улэ,

Куно вуэ ӵемысь соин.

Визьмо калык татын улэ,

Сырья гуртмес данъя соин!

ӧвӧл, уд шедьты мукетсэ сыӵе гуртэз,

Кытын чылкыт ошмес сыръя.

Улон укыр туж зол берга, сыръя,

Калык туж юн поръя, ужа, сыръя!

Соин узыр, дуно, дано Сыръя!!!

11.06.2022

 P.S.: Гуртлэсь нуналзэ ӵектӥсько 5 арскын, яке 10 арскын нош ортчытыны. Арлы быдэ, мынам малпамея, уг яра. Дунлыкез, эффектэз быроз. Гурт калыклы но, дасясезлы но секыт йӧтоз. Сокем мӧзмыны но уз вуэ. Бельгытэле но калыкез люканы секытгес луиз ук ини.