«Труд» обществоысь скалъёслэн «эксэйзы»

«Труд» обществоысь скалъёслэн «эксэйзы»

Азьмынӥсьёслэн слётазы одӥгез тужгес яркытэз но тодэ кыльымонэз,  «Труд» обществоысь егит скал кыскисез, Антон Никитинэз, ӟечкыламзы луиз, дыр. Ушъямон скал кыскись нылкышноос пӧлын сценаын Антон огназ сылӥз — чебер костюмен, синъёсыз чиляло, ачиз пальпотэм. Сое районлэн главаез Рамиль Нутфуллин ӟечкылаку но залын пукисьёс киоссэс кужмогес чабизы, лэся. Со шоры учкыса ик валаны луиз: та егит пи аслаз ужезлы сюлмыныз сётӥськемын но скал кыскись луэмезлэсь чик но уг возьдаськы. Антонэн «нылкышно» ужез сярысь вераськимы. Тӥледлы но та вераськонмес ӵектӥськом.

— Антон, нырысь ик ӟечкыласько тонэ районысь азьмынӥсьёслэн радазы луэменыд. Зэмзэ-а тон сокем аслэсьтыд уждэ яратӥськод, вормонъёсы вуымон тыршыса ужаськод?

— Аслэсьтым ужме туж но туж яратӥсько. Мон ведь пичи дырысен пудоосын выри. Но школаез йылпумъям бере дышетсконме мукет ӧнеръя йылпумъяй — Ижкарын сиён пӧзьтӥсьлы дышетски. Дышетски одӥг ар ӵоже, со дыре ик ужай но. Но городын улон мыным ӧз кельшы. Гуртын гидэ потӥськод ке, мар ке ужаськод ке, сюлэм буйга, каньыл луэ. Городын улыкум, дорам котьку жингыртыса юасько вал, кыӵегес уло отын мынам пудоосы шуыса. Сюлмы дышетскыкум но гуртын вал. Шумпотӥсько, гуртэ бертыса фермае ужаны интыяськи шуыса.

— «Труд» хозяйствоын пиосмуртъёс пӧлын тон огнад гинэ скал кысконъя оператор-а?

— Хозяйствоын, малпано ке, мон сяна но трос воргоронъёс ужало. Нош скал кыскись луыса ужасьёс, зэмзэ но, пиосмуртъёс пӧлын трос ӧвӧл. «Труд» колхозын мон сяна вань на Щербаков Юрий, Вукогуртысь скал кыскись. Со, монэным ӵошатыса, ини кема аръёс ӵоже та удысын тырше.

— Озьы бере, тыныд троссэ нылкышноосын ужаны тупа. Секыт-а пиосмуртлы нылкышноосын ужаны?

— Мон озьы ӧй верасал. Коллективмы милям туж умой, куспамы ӟеч ужаськомы. Ма, дыр но уг луы даллашыны. Скал кыскон — со ведь шулдыр уж ке но, кылкутымон но трос дырез кулэ каре. Кылсярысь, мон вылын туннэ нуналэ 54 скал лыдъяське. Мон соослэсь котькудӥзлэсь кушемнимзэ тодӥсько. Куд-ог адями паймыса юа мынэсьтым, кызьы вань скалъёсыдлэсь нимзэс тодӥськод шуыса. Ма кызьы бен уд тоды ? Нуналлы быдэ соосты адӟиськод, соосты утиськод бере?

— Антон, кӧня ар ӵоже тон та ужен выриськод ни?

— «Труд» колхозын мон Ижевскысь бертэм бере ужаны кутски. Со луиз 2013 арын. Ужаны кутскыкум нырысь кунянъёс дорын пудо утись луыса ужай куинь толэзь ӵоже. Собере ини скал кыскись луи. Со дырысен та ик должностьын. Огъя сизьым ар ӵоже татын тыршисько ни. Но кык пол (2015-тӥ но 2017-тӥ аръёсы) кӧня ке толэзьёслы, ужме кельтыса, Ижкаре кошкылэме вань.

— Малы?

— Ужелэсь возьдаськи. Адями мар малпалоз, мар вералоз шуыса малпай. Соин кошки, мукет интыын, мукет ужын асме утчай. Но ӧй шедьты. Соин выльысь но выльысь татчы, вордскем палъёсам, яратоно интыужам берытски. Табере валасько: ужед сюлэмедъя ке, адями мар вералоз шуыса малпанэз но ӧвӧл — ужано но ужано. Туж шумпотӥсько, тае валаны быгатӥ шуыса. Кинлэн кыӵе ужез вань, кытын адями ужа, солы аслаз ужез кельше ке? Ушъяськеме уг поты, но 25 аресам мынам та ужын азинсконъёсы но вань ини.

— Тодӥсько. Кылэме вань.

— Кылсярысь, кӧня ке ар радысь ини «Егит ӧнерчи» республиканской конкурсэ пыриськисько. Валамон, та гурт удысын ужась егит ӧнерчиос пӧлын ортчытӥськись конкурс. Кылем арын но со ортчиз, шуркынмон толэзе. Отчы пыриськыса, 13 мурт пӧлын 5-тӥ инты басьтӥ. Малпасько, та пичи вормон ӧвӧл. Кылдэм ке, туэ но та конкурсэ пыриськыны мылкыды вань. Со сяна, районын ортчем пӧртэм конкурсъёсы но мыло-кыдо пыриськисько.

— Кызьы вутскиськод ваньзэ? Графикедъя ужад нуналлы кӧня ке пол мыноно луэ шуыса тодӥсько. Конкурсъёсы но пыриськыса вуиськод... Ма, конкурсъёсы пырыны кивалтэтэд ӵектэ, дыр — скал кыскисьёс пӧлын егит пиос трос ӧвӧл ук.

— Куинь пол нуналаз ветлӥсько. Но та графиклы дыши ни. Котькыӵе ужлы, котькыӵе графиклы дышыны луэ шуо ук. Вылаз ик ужме яратӥсько бере, график ужлы нокызьы люкетыны уг быгаты. Конкурсъёс сярысь верано ке, нырысь озьы ик луиз — ужысен ӵектӥзы конкурсэ пыриськыны. Но табере ачим кулэ карыса, мылкыд карыса пыриськисько вожвылъяськонъёсы. Шумпотымон ук, куке тынэсьтыд уждэ дунъяны быгато.

— Соглаш. Нош кылсярысь, туала техника ӧй ке луысал, ӧй потысал, дыр, ваньзэ киын быдэстыса ужамед? Тон ведь егит на.

— Ужасал. Нырысетӥез, кызьы пусйи ни, пудоосты мон туж яратӥсько. Кыкетӥез, фермаын кыӵе аръёсы ужад ке но, киын быдэстоно ужъёс ӧжыт ӧвӧл. Аппаратэн скалъёсты кыскиськомы шуэмысь, мукет ужмы ӧвӧл шуэм кыл ӧвӧл со. Скалъёсты сузяны кулэ, сиён тырон интыоссэс, пудоослэсь пыд улзэс сузяно, молокопроводъёсты, укноосты миськоно. Со сяна но чыры-пыры ужъёс шедё.

— Ноку но мукет ӧнеръя ужамед ӧз поты-а? Гуртысь, колхозысь нокытчы кошкытэк, татын ик, кылсярысь, механизатор луыса ужаны малпанъёсыд ӧй вал-а?

— Ноку но ӧй вал. Зэмзэ ке верано, машина нуллыны правое вань ке но, техникаен мон туж уг эшъяськиськы.

— Нош матысьёсыд, ӵыжы-выжыосыд ужед сярысь мар ке верало-а? Эшъёсыд, тодмоосыд мар малпало? Оло, тыныд соослэн верамзы нокыӵе уг ӥӧты-а?

— Матысьёсы но, тодмоосы но монэным данъясько, сыӵе секыт ужлэсь кышкатэк ужасько шуыса. Ушъяло, татчы ужаны интыяськи шуыса. Гуртын егит ӧнерчиос котьку но кулэ ук, тужгес туала дыре. Мон шумпотӥсько, та удысын асме шедьтӥ шуыса.

— Бадӟым тау вераськемедлы! Вуонояз но тыныд бадӟым вормонъёсы вутскыны сӥзисько.