Тунсыко шутэтскон

12 июне сюрес вылэ потӥмы. Казане вуэммы бере милемыз экскурсовод пумитаз — егит, чебер, каньыл сямо нылаш. Нырысетӥ шутэтскон пунктмы одӥг чебер ресторан луиз. Лыктэммылы дасесь вал ини пӧртэм ческыт сиёнъёсын тырмытэм ӝӧкъёс. Татын ужасьёс туж каньылэсь луизы. Нылпиосмылы но, милемлы но туж кельшиз. Кыкетӥез инты луиз «Туган авылым» усадьба. Та туж чебер инты. Милемыз котыртӥзы бигер сямен лэсьтэм чебер юртъёс. Та инты сяськаос пӧлы выемын, нош шораз выжен пичи гинэ вутым. Куинетӥез дугдылоннимы луиз занимательной техникалы но наукалы сӥзем музей. Таиз ветлонмылэн тужгес тунсыко люкетэз луиз, дыр. Нылпиослы физика законъёс сярысь мадизы, соос ас синмынызы самолётъёсысь бортовой самописецъёсты но Быдӟым Отечественной оже пыриськем самолётэз адӟизы, космосэ лобан корабльлэсь люкетсэ (соин лобам космонавтъёс сярысь но тодӥзы), озьы ик огшоры улонысьтымы тунсыко явлениос сярысь кылзӥзы. Мукетыз шутэтскон интымы вал батут центр. Нылпиос мылысь-кыдысь татын тэтчазы. Собере Бургер Кинг шуэм сиськон интыын кӧтмес тыримы. Казане ветлэммес йылпумъяз М.Горький нимо парк — та мегаполислэн туж каньыл, писпуосын котыртэм, чылкыт омырен интыез. Татын нылпиослы тунсыко потӥз аспӧртэмлыко фонтан. Казане ветлэмлэсь нылпиослэн но, анай-атайёслэн но умоесь гинэ мылкыдъёс кылизы. «На ура» ветлӥмы шуыны луысал. Та шутэтсконэз радъянэ пыриськем котькуд муртэ ушъяны луэ.

Анай-атайёслэн нимынызы

Людмила Фомина