Удмурт кыллэн нуналыз – Шор Кушкет школаын

«Ӵукнаысен гурламы. Школае пырыкузы ик котькинлы Удмурт кыллэн нуналэзлы сӥзем пус (логотип) сётэмын вал. Борддоръёсы юнматэмын вал ӟеч кылъёс («ӟечбур», «тау», «вождэс эн вае», «таза лу», «ӟеч луэ» но мукет). Ӵукнаысен чузъяськизы удмурт кырӟанъёс но гуръёс. Пиналъёс но дышетӥсьёс удмурт калык дӥсен дӥсяськыса ветлӥзы. Школьной радиоузел пыр ивортӥзы та нунал сярысь. Мылкыдмы зэмос праздник дыръя кадь вал», - шуыса ивортӥз Шор Кушкет школаысь удмурт кылъя но литературая дышетӥсь Мария Петровна Николаева. «Нылпи садысь пиналъёс но мылысь-кыдысь пыриськизы та ужрадэ. Удмурт сямен задор эктэмзэс возьматӥзы», - ватсаз,  Шор Кушкет нылпи садлэсь  но та акцие  итӥськемзэ пусйыса, мукетыз анай кылъя дышетӥсь Петрова Римма Николаевна.

Озьыен, данъяськыса вераны быгатӥськом, Балтась ёросысь удмуртъёс но та дунневыл ужрадэ пыриськизы шуыса. Та туж шумпотымон.