Удмурт кыллэсь нуналзэ пусъёзы

Та сярысь ивортэ Удмурт Элькунысь Печатья но калыке ивортодэт вӧлмытонъя агентстволэн пресс-службаез. Кылсярысь, Будапештын, та нуналлы сӥзьыса, удмурт кылын вераськыны но удмурт грамматикалэсь шуг интыоссэ эскерыны малпало шуыса ивортӥське ВКонтакте вотэсысь «Удмурт кыллэн нуналыз» огинын. Удмурт кылын «Узы-боры» но «Пузкар» кинофильмъёсты пуктӥсь Пётр Палган но Польшаын удмурт кыллэсь нуналзэ пусйыны дасяське вылэм. «Удмурт кыллэн нуналаз малпасько палэнысь вуэмъёслы но, эшъёсылы но удмурт калык сярысь мадьыны, социальной сетьёсы удмурт кыллы сӥзем веранъёсты пуктыны. Тросгес калык мед тодоз со сярысь», — верам со «Удмурт дунне» газетлы.

Радъясьёслэн верамзыя, та нуналэн валче Удмуртиын укмыс площадкаосын пӧртэм акциос ортчытӥськозы: экскурсиос, адӟытонъёс, конференциос, лекциос но мукет.

Москваын ортчоно праздник программаын — «Введение в удмуртский язык» обзорной лекция, удмурт кылбуретлэсь XX-тӥ дауре азинскон сюресъёссэ эскерон но удмурт кыллэн туала югдурез сярысь вераськон.

«Удмурт кыллэн нуналэз удмурт кыл сярысь, солэн аспӧртэмлыкъёсыз, шуг-секытъёсыз сярысь, обществолэн сое юнлыко азинтонэ пыриськемез сярысь тодон-валанэз вӧлмытон вылысь радъяське», — шуиське праздниклэн «ВКонтакте» официальной группаяз. 

Удмурт кыллэсь дунневыл нуналзэ пусйыны малпазы анай кыллэсь статуссэ будэтон вылысь. Сыӵе мылкыд туэ 18-тӥ куартолэзе Алабгоын удмуртъёслэн улосвылкуспо конференциязы чузъяськем вал.

Зэмзэ ке верано, удмурт кыллэсь дунневыл нуналзэ 27-тӥ шуркынмонлы тодмостон юнме быръемын ӧвӧл. Удмуртиын ӵапак та нуналэ, 2001-тӥ арын кутӥллям кун кылъёс сярысь но республикаысь мукет калыкъёслэн кылъёссы сярысь законэз, кудӥныз валче удмурт кыл Удмурт Элькунын кун статус басьтӥз.

Туннэ нуналэ Интернет вотэсъёсын Удмурт кыллэн дунневыл нуналыз сярысь трос верасько, талы мылкыдтэм луымтэос асьсэос но тунсыко акциос ӵекто. Кылсярысь, «Удмурт Кылбурчи» огин  удмурт кыл сярысь пӧртэм кылбуръёсты #УдмКылБур хэштег улсын Интернетэ поттыны но вӧлмытыны ӧтё. Кылбуръёс туспуктэмен яке видеоен (мылкыд каремъя) яке текстэн, аслад яке тодмо кылбурчилэн луыны быгато.

Озьыен, быдэс дуннеен Удмурт кыллэсь нуналзэ пусйыны дасяськиськом!