Ульяна Кумаева: «Матысь адямиосы луыку, вормыны но капчигес луэ» (+фото)

Кылем арын, кылсярысь, Казаньын ортчем куасэн бызьылонъя марафонэ (50 иськем) пыриськыса, аспалмы Ульяна Кумаева куатетӥ инты басьтыны быгатӥз но дипломен пусйиськиз. Ёросамы та егит нылэз тодо, дышетскон юртаз — Казаньысь олимпийской резервъя училищеын — дунъяло, нош дораз — пумтэм данъясько. Кемалась ӧвӧл Ульяна куасэн бызьылонэз кельтыса, секыт атлетикае выжиз. Шумпотымон, та ӧрын но солэн ушъяськымон вормонъёсыз вань ини. Та сярысь Ульяна «Азьлане» газетлы сётэм интервьюын мадиз.
— Ульяна, тодӥсько, тон кемалась ини спортэн вырыны кутскид шуыса. Ма бордысен кутскиз спортэн эшъяськонэд? Кин вал тынад нырысетӥез наставникед?
— Спортэн мон вырыны кутски, куке мыным 10 арес вал. Соку асьме дорын спортэн вырисьёс трос ӧй вал бере, бырйиськыны кема ӧз тупа — куасэн бызьылон вылэ дугдӥ. Нырысетӥ тренере, наставнике, юрттӥсе луиз Никитин Роман Валентинович. Визьмо, трос энергиё дышетӥсе котьку визь-кенеш сётыны дась вал. Солэн юрттэменыз мон нырысетӥзэ куас вылэ султӥ, куасэн ветлонэз яратӥ. Куасэн ветлонтэк аслэсьтым улонме син азям но уг пуктӥськы вал ини. Со понна Роман Валентиновичлы туж бадӟым тау, со монэ ас дыраз тросэзлы дышетӥз.
— Нош ку тон валад, спорт тон понна огшоры яратоно уж, хобби гинэ ӧвӧл но тынад соин улондэ герӟамед потэ шуыса?
— Школаын дышетскыкум ик, ёрос ӵошатсконъёсы трос ветлылӥ, соку ик тодматски тренеръёсын Р. Р. Аскаровен, Л. Г. Галимзяновен. Ӵапак соос ик монэ республиканской, всероссийской куасэн ӵошатсконъёсы ветлытыны кутскизы. Озьы мон кужмогес но кужмогес та спортлэн ӧрез борды кыстӥськи, тужгес но шумпотӥсько вал, куке ӵошатсконъёсын вормылӥ яке призовой интыосты басьтылӥ. Мон понна со кыӵе ке но азарт выллем луиз. Соку мон валай, спорт мон понна хобби гинэ ӧвӧл, со мынам улон амалэ луиз ини шуыса.
— Кыӵе арын тон Казаньысь Олимпийской резервъя училищее дышетскыны пырид?
— Роман Валентинович, школаын дышетскыкум, мыным спортъя кыӵе ке дышетскон юртэ пырыны ӵектэ вал. Мон аслэсьтым быръёнме лэсьтӥ — Ципья шоръёзо школаысь 9-тӥ классэз йылпумъяме бере, 2018-тӥ арын, Казаньысь Олимпийской резервъя училищеысь (КазУОР, УОР) физической культурая но спортъя факультетаз куасэн бызьылон ӧръя дышетскыны пыри (тренерлы Р.Р. Аскаровлы бадӟым тау, со туж юрттӥз). УОР-ын тренере Минуголов Радик Хамитович луиз. Чурыт куронъёсты пуктӥсь, зэмлыко, ужзэ умой валась, бадӟым опыто, сӥё-дано тренер, усто сервисмен (спорт инвентарьёсты дасянъя ӧнерчи — ред.) со. Солэн гинэ кужмо вазем куараеныз, кеськеменыз мон, кыльымтэ кужымме шедьтыса, выльысь трассаын куас вылэ султыса, бызьылонме азьланьтыны быгатӥсько вал. Со котьку мыным визь-кенешъёсты сётӥз; вераз, кызьы со яке та учырын лэсьтыны умойгес луоз. Малы гинэ со монэ ӧз дышеты. Вормонъёсы, данъетъёсы понна но, мылкыдлэн кужмыз (сила воли) понна но, номаин воштонтэм опыт сётэмез понна но солы туж бадӟым тау. Нялтас вераса, туэ Выль арлы тренере мыным куас кузьмаз но вераз, куасэн бызьылонэз медам вунэты но медам кушты шуыса. Туннэ нуналэ мон ини 4-тӥ курсысь студент, ӝоген дышетсконме но йылпумъяло. Училищее — мынам кыкетӥ юртэ, отысь кошкеме уг поты.
— Туэ дышетскондэ йылпумъяськод ини, ньыль ар куспын пӧртэмез луэм, дыр — секыт дыръёсыд но, жадён вакытъёсыд но…
— Дышетскон нокинлы капчиен уг сётскы, дыр. Тужгес но милемлы, спортсменъёслы. Малы ке шуоно котьку ӵошатсконъёс, тренировкаос, люкаськонъёс (сборы) луо… Дышетсконэз но вунэтоно ӧвӧл ук. Со ласянь УОР-ын туж чурыт куронъёс пукто — дисциплина но дышетскон татын нырысетӥ интыын. Милемлы, кылсярысь, толэзьлы быдэ котькуд предметэн аттестация ортчоно. Аттестациез ортчыны ӧд быгаты вылэм — тонэ нокытчы уг лэзё.
— Дышетскон но дисциплина ласянь сыӵе чурыт куронъёс бере, тренировкаос ласянь куронъёс сярысь юанэз но ӧвӧл, дыр…
— УОР-ын котьку сямен арняяз 10 пол тренировкаос луо, нош люкаськонъёс дыръя — 15 пол. Огшоры нуналъёсы тренировкаослы ньыль но ӝыны час дыр висъяське, люкаськонъёс дыръя — куать час.
— Кӧня?.. Спортсменъёслэн ведь, тренировкаос сяна, изён дырзы но, сиён-юонзы но контроль улсын луыны кулэ али.
— Шонер. Изён дырмы бордысен кутско. УОР-ын 22:00 часэн визьнодасьёс, комнатаосъя ветлыса, ӟеч уйвӧтъёсты сӥзё но, собере ваньзы дышетскисьёс изьыны выдыны кулэ. Умлэн ӟечлыкез спортсменлэн тазалыкез но асшӧдонэз вылын туж шӧдӥське. Одӥг уй куспын 500-лы матэ калорийёсты быдтыны луэ! Но, зэмзэ верано ке, котьку дыраз выдыны уг луы, дорысь ужъёсты ужано луэ. Табере сиён-юон сярысь мадё. Милемыз столовойын нуналаз ньыль пол сюдо, сиёнэз туж умой. Ваньзэ сиыны уг луы, малы ке шуоно котькуд сиськеммы одно ик калораже пыремын луыны кулэ. Тренеръёсмы туж чурыт учко милесьтым сиськеммес но секталамес, туж ӵем милемыз мертало. Дорамы бертыса сиськиськомы ни, нокин адӟымтэ дыръя (серекъя). Но шутэтсконо нуналъёсмы, озьы бере дорамы бертылонъёсмы но, шер но ӧжыт луо. Мукет студентъёс доразы арнялы быдэ бертыло ке, милемыз тренеръёс уг лэзё — тренировкаосты кельтыны уг яра. Кылем арын вань гужем понна ог дас нунал шутэтскыса вутски, лэся. Доре бертыкумы но, тренеръёс ортчоно тренировкаосты интернет пыр лэзё.— Ульяна, тон трос куасэн бызьылонэн вырид, спортлэсь со ӧрзэ туж яратӥд. Нош кемалась ӧвӧл секыт атлетикае выжид. Та тросэз тодмоосыд понна паймымон вал. Малы ӧрдэ воштыны малпад?
— Зэмзэ но, мынам та вамыше ваньзэсты паймытӥз. Мон ведь укмыс ар ӵоже куасэн выри, нош татын малпамтэ шорысь секыт атлетикае выжи. Мыным аслым но кӧня ке ар талэсь азьло верасалзы ке, секыт атлетикае выжо шуыса, ӧй оскысал. Мынам тренере, Радик Хамитович, биатлонэ выжиз. Мон соку туж сюлмаськи, кызьы табере мон сотэк спортэн выронме азьланьто шуыса, со синтэм-китэм кылем кадь вал. Трос сюлмаськи соку, бӧрдӥ, мар карыны ӧй тоды. Монэ выль тренерлы оскизы. Нош выль тренер — со ваньмыз выль шуэм кыл: выль амалъёс, выль тактика, выль эшъёс… Огъя вераса, ваньзэ выльысен дышетскыны тупаз. Кык толэзь ӵоже озьы мон тренироваться кари, выль командаен ӵошатсконъёсы ветлӥ. Озьы одӥгаз ӵошатсконын монэ секыт атлетикая тренеръёс синйылтӥзы но ӵектӥзы асме та ӧрын утьыны, ку мынам вакытэ луоз, асме эскерон понна гинэ. Мон ути, мыным кельшиз. Тренеръёс веразы, кужмы вань, базае вань шуыса. Мон та сярысь верай УОР-лэн директорезлы — Шакиров Рамиль Ильдусовичлы. Со монэ кылзӥз, валаз, кык толэзь дыр сётӥз малпаськон понна но секыт атлетикая люкаськонъёсы лэзиз. Озьы, кык толэзь ортчем бере, монэ секыт атлетикае выжтӥзы. Табере мынам выль улонэ, выль эшъёсы. Тренере Петров Игорь Николаевич, калыккуспо классысь спортъя мастер (мастер спорта международного класса), профессиональной тренер, туж умой адями но тренер, котькинэн огъя кыл шедьтыны быгатэ, серекъяса гинэ вераське.
— Уд жаляськы-а, секыт атлетикаез бырйид шуыса? Адямиос пӧлын ведь сыӵе малпан вань, секыт атлетикаен вырись нылъёслэн мугорзы воргоронъёслы кельшыны кутске шуыса.
— Уг жаляськы. Мон та сюресэз ачим бырйи. Котькытын вань аслаз плюсъёсыз но, минусъёсыз но. Кин вераз, секыт атлетика воргоронъёс понна гинэ шуыса? Малпасько, ваньмыз ныл бордын луэ шуыса, малы ке шуоно спортлэн котькыӵе ӧреныз вырид ке но, нылкышнолыко кыльыны луэ. Куасэн ветлӥсьёслэн, кылсярысь, сколиоз луэ, солэн но минусъёсыз вань шуэме потэ. Секыт атлетикаен вырыса но чебер кыльыны луэ. Вылаз ик атлетикаен вырисьёс мугорзэс шонер возё. Тунсыко: спортлэн та ӧрез мукетъёсызлэсь сӧсырмонъёс ӧжытгес луэменыз висъяське, малы ке шуоно котькуд травмаез азьпалаз ик тодыны, адӟыны луэ.
— Анай-атаед, матысьёсыд поддержать каризы-а?
— Поддержать каризы, юрттӥзы. Ӵужанае гинэ пумит луиз. Кӧня ке матысьёсы но та малпанлэсь алыны туртто вал, тренеръёсы воксё ӧз оске, лэся. Али ке но паймо.
— Паймемзы валамон но. Тон ведь куасэн бызьылонъя ӵошатсконъёсын туж трос вормонъёсы вутскид, бадӟым осконъёс возьматӥд. Ма, секыт атлетикаын но, ӝыны ар куспын гинэ но, шӧдскымон вормонъёсыд вань.
— Озьы. Куасэн бызьылонъя мон спортъя мастерлы кандидат луи. Туж-туж трос ӵошатсконъёсы пыриськылӥ, бадӟым вормонъёсы вань. Секыт атлетикаын туннэ нуналозь мыным кык ӵошатсконъёсы пыриськыны шуд усиз — республиканской (1-тӥ инты басьтӥ) но всероссийской (2-тӥ интыен пусйиськи) ӵошатсконъёсын. Бадӟымъёс пӧлын кыкетӥ разрядэ вань. Азьпалан эшшо но бадӟымгес вормонъёсы вутскыны тыршо.
— Ульяна, тынад котькуд часэд гинэ ӧвӧл, котькуд минутэд дуно вылэм. Эшъёсыныд пумиськылыны дыр шедьтӥськод-а бен?
— Зэмзэ верано ке, аслым дыр ӧжыт кыле. Тренировкаос луымтэ дыръя, городын ветлӥськомы, киное мынӥськомы. Мон туж яратӥсько туспуктыны, дыры луиз ке, та ужен но вырисько.
— Сыӵе ритмен улыны дышемед, дыр, ини.
— Дыши. Мынам мукет ритмен улэме но уг луы ини, мар ке но уг тырмы кадь потэ. Тренировка мон понна — антидепрессант. Спортэн вырем бере, мугорлы но, луллы но капчи луэ, энергия тросгес луэ.
— Дышетскондэ йылпумъямед бере, малпаськод-а басьтэм ӧнередъя ужаны?
— Ӝоген дышетскон юртме йылпумъяса, мон физической культурая дышетӥсьлэсь но тренерлэсь ӧнерзэ басьто. Малпасько та ӧръя ужаны но. Планъёсы бадӟымесь. Кылдэм ке, Казаньысь физической культурая, спортъя но туризмъя Поволжской кун университетэ дышетскыны пырыны но малпанъёсы вань.
— Оскисько, вань малпанъёсыд быдэсмозы шуыса. Ульяна, вераськемед понна бадӟым тау. Азьпалан эшшо но бадӟымгес вормонъёсы вутскыны сӥзисько.
— Тау. Мынам но, учырен пайдаяськыса, егитъёслы вазиськеме потэ вал. Спортэн выре, со туж пайдаё. Котькин аслыз спортлэсь кельшымон ӧрзэ шедьтыны быгатэ, шумпотымон, туала дыре соос трос. Эн кышкалэ, уз пӧрмы шуыса. Ваньмыз пӧрмоз! Ваньзылы тренеръёсылы туж бадӟым тау шуэме потэ, котькудӥз соос пӧлысь номаин воштонтэм опытэнызы монэным вошъяськизы, дышетӥзы, спорт сюресэ султыны но сое азьланьтыны юрттӥзы. Туж бадӟым тау анай-атаелы но вань матысьёсылы, котьку юрттэмзы, монэ валамзы понна. Вормыкум соос мон понна шумпото, вормымтэ дыръя буйгатӥсь кылъёссэс уг жаляло. Сыӵе матысь адямиосы луыку, вормыны но капчигес луэ.