Ужам ужлэн бервылэз туж шумпоттэ

Со ик «#будудмурт» проектлэн авторез но луэ. Проектлэн кылдэмез, кулэлыкез, вуонолы малпанъёсыз но мылкыдъёсыз сярысь вера ачиз автор.

— Кызьы ваньмыз кутскиз, Анна Владимировна? Кызьы кылдӥз «#будудмурт» проектты?

— Мон ачим Удмурт Элькунысь Кияса ёросысь Карамас-Пельга гуртысь. Татарстанэ вуэм бере мон туж зол удмуртъёсын кусып возёнлэсь, удмурт окруженилэсь тырмымтэзэ шӧдӥ, малы ке шуоно сыӵе ӵем уг бертылӥськы вал дорам. Собере мон малпай утчаны удмуртъёсты. Озьы тодматски Марина Ивановаен но соин ӵош кутскимы ини кыӵе ке но проектъёсты лэсьтыны, егитъёсты люканы, кыӵе ке ужрадъёс ортчытъяны. Собере мынам юан кылдӥз, кыӵе вообще практиказы Татарстанысь удмуртъёслэн, кыӵе вообще проектъёссы вань адямиослы. Вань проект нылпи садын визьнодаськись пиналъёс понна. Со бадӟым проект — «Мудорвай». Собере вань «БиГерд» проект — удмурт егитъёслэн форумзы. Вань туж трос коллективъёс гуртъёсысь лулчеберетъя юртъёсын. Но туж трос нылпиос, тани, кылсярысь, подросток пиналъёс, соос вообще нокытын но нокызьы уже кутэмын ӧвӧл. Ӵапак тӥни со группа, кудӥз покчи аресъем пиналъёсты но егитъёсты герӟа, со чылкак ыше но олокытчы кариське, соослэн нокыӵе но тунсыкъёссы ӧвӧл. Соин ик мон малпай сыӵе проект дасяны, кытын нылпиос удмуртъёслэн историзы но лулчеберетсы, кылзы пыр тодматскозы огъя удмурт калыкен. Озьы 2019-тӥ арын Покчи Лӧзя школаын ортчиз мынам нырысетӥ проектэ, кудӥз нимаськиз «Программа внеурочной работы с детьми и подростками в возрасте 13-15 лет «#будудмурт» и, изучающих удмуртский язык и культуру». Отын вал милям вить направление. Нырысь ик нылпиослы историмы сярысь верай, адӟытӥ удмуртъёслэсь йӧскалык шудонъёссэс, тодматскимы удмурт хореографиен, удмурт кырӟанъёсын, удмурт обрядъёсын но декоративно-прикладной творчествоен. Соку мынам вал группае 6-тӥ класс, азьвыл вераса, ӵапак та классысь пиналъёсын мон куинь ар ӵоже ужай. 2019-тӥ арын ик, та программае вылэ пыкъяськыса, мон гожтӥ диплом ужме.

— Нош кыкетӥзэ та проектэныды ми пала Тӥ вуылӥды 2021-тӥ арын.

— Озьы. 2021-тӥ арын мынам вал магистр диссертация. Мон малпай, со ӧрез ик азинтыны, ортчытӥ социологической исследование но таяз учыре ини выль амалъёсты но уже кутӥ: этноблогинг, этнодизайн, объектъёслэн арт-дизайнзы, кырӟан гуръёсты мерлыко вотэсъёсын кутон. Нылпиосын ӵош соку ми ӟуч кырӟанъёсты удмурт кылэ берыкъямы, лэсьтӥмы пичи гинэ викторина кырӟанъёсъя… Со туж тунсыко луиз, туж трос просмотръёсты люказ.

— Туэез «#будудмурт» маин тодады кылёз?

— Туэ со группа, кудӥныз мон ужай, 9-тӥ классэз быдтэ. Соин поколениослэсь преемственностьсэ возьматон, со понна луонлыкъёсты кылдытон вылысь малпай туэ но та проектме азинтыны. Мон лэсьтӥ сыӵе проект, кытын нылпиос асьсэос организатор, менеджер, кивалтӥсь луыса, кылдыто но радъяло бадӟым праздник. Ми кык нунал ӵоже дасямы удмурт шудонъёс, удмурт сиёнъёсты пӧрамы, декоративно-прикладной творчествоя удмурт мастер-классъёс ортчытӥмы. Озьы ик дышетӥсьёс милемлы юрттӥзы концерт программа лэсьтыны. Со ваньмыз кылдытӥз праздникез, кудзэ нылпиос асьсэос ортчытӥзы. Соос шудонъёс но асьсэос ортчытӥзы, концерт программаез но асьсэос нуизы, асьсэос сценарий малпазы, ваньзэ-ваньзэ асьсэос. Мон соослы юрттӥськи гинэ. Мон шуысал, праздникмы туж умой пӧрмиз.

Таяз радэ мынам потэ вал адӟытэме, кызьы ортче «Гырон быдтон», ӵапак пичиослы, покчиёзо звеноысь нылпиослы, кудъёсыз матысь дыре подросток луозы, соослэсь тунсыксэс ӝутон понна. Малы ке шуоно тросэз удмурт пиналъёс, ӵапак покчиёзо школа арлыдъем нылпиос, уг ни верасько удмурт кылын, соос верасько ни ӟуч сямен. Но котьма ке но татын шӧдӥське на школалэн но ватсаса визьнод сётон юртъёслэн визьнодамзы: соос кырӟало удмурт кылын, лыдӟисько удмурт кылын, экто удмурт эктонъёсты. Соиз монэ туж зол шумпоттытэ.

Прямой эфирмы туж трос просмотръёс люказ, нуыку гинэ но 1800 просмотр вал ини. Таяз арын мон ужелэн бервылэзлы туж шумпотӥсько. Кошкыкум, тросэз нылпиос «Тӥ лыктоды на-а эшшо?» шуыса юазы. Озьыен, соос возьмало, соослэн тунсыксы улӟиз. Мон туж оскисько, та пиналъёслэн 2-3 процентэз ке но, тунсыкъяськозы удмурт лулчеберетэн, кыӵе ке элементъёсыныз ке но. Мед соос удмурт кырӟанъёсты кылзозы, мед соос удмурт кырӟанъёсты кырӟалозы, мед соос кыӵе ке но творчествоен вырозы, декоративно-прикладной творчествоен.

Мынам вал эшшо сыӵе ужпуме: нылпиослы азьпал улонэ сюрес возьматон. Кин тодэ, оло, соос дизайнэн вырозы яке творчествое кошкозы, историез дышетозы яке лингвистикае пыриськозы. Тросэз 9 класс бере кошко но асьсэлы ӧнер быръё. Соин ик туж усто луысал, кин ке тунсыкъяськысал но аслэсьтыз тодон-валанъёссэ ӟеч уж лэсьтонэ ӧръясал ке. Угось ӵапак озьы вотэс пӧрме, кудӥз кылэз но лулчеберетэз утён амалъёсты кылдытэ. Малы ке шуоно удмурт кыл, удмурт лулчеберет — со ведь тоже пыраклы ӧвӧл, нокин но уг тод, ку со быроз, ку азинскоз. Оло, ми берпуметӥез поколение, дыр, ини, кудӥз соин тунсыкъяське. Соин ик туж оскисько, мынам нылпиосы но удмурт лулчеберетэз но кылэз азинтонэ асьсэлэсь кыӵе ке люкетсэс пыртозы шуыса.

— Та проектты ласянь планъёсты сярысь но тодэм потэ вал.

— Луоз-а азьланьын та проект уз-а, мынам вераме уг поты, мынам потэ, со азьланяз но мед луоз, мед азинскоз шуыса. Туж уг поты сое быдтэме, выльысь но выльысь азинтэме потэ.

— Валамон, таӵе ужрадъёсты юрттӥсьёстэк, спонсоръёстэк ортчытыны уг луы.

— Котькуд ар ӵоже мыным туж зол юрттэт сётӥз Татарстанысь удмуртъёслэн НКА-зылэн тӧроез Герасимов Андрей Сергеевич. Со вань коньдон ужпумъёсты ас вылаз басьтӥз. Вань арбериос, проектлэн эмблемаеныз футболкаос — со ваньмыз Андрей Сергеевичлэн юрттэмезлы луыса, угось со но удмурт лулчеберетлэн но кыллэн вуоноезлы мылкыдтэм ӧвӧл. Туж бадӟым юрттэт сётӥз 9-тӥ класслэн классной руководителез Артемьева Наталия Михайловна. Куинь ар ӵоже улыны но ас дораз лэзиз, сюдӥз-вордӥз но, туж зол юрттӥз та проектэз улонэ пыӵатыны. Нимаз ик бадӟым тау солы. Тау кылме верасько Покчи Лӧзя школалэн администрациезлы но коллективезлы.

— Тау вераськемды понна, Анна Владимировна. Азинсконъёс Тӥледлы. Таӵе егитъёсмы тросгес мед луозы вал.