Вакытэзлы тупась егитъёс

Карек-Серма (калыкын Починка шуо) гуртын трос адями уг улы ке но, туннэ нуналэ соослэн йыг-йыг сылӥсь инъетсы вань на — гуртысь пиналъёс но егитъёс. Соостэк уг ортчо нуналмысь лэсьтӥськись ужъёс, пӧртэм ужрадъёс, соос валто возёсысь ужез но воштонтэм луо интыужазы.

Туннэ матынгес тодматскоме соослэн тужгес валтӥсь люкетэныз — гуртысь «Ингур» коллективен.

Маиз эшшо но тунсыко — соос пӧлын куинь пар агай-вынъёс: Игорь но Яков Игнатьевъёс, Максим но Артём Никитинъёс, Александр но Алексей Ивановъёс. Аспӧртэмлыко но синмаськымон! 

Малпасько, ёросысь удмурт калык понна соос тодмо ни, берло дыре соос быдэс ёросысь калык понна но тодмо луыны кутскизы. Кызьы соос кылдӥзы, кыӵе мылкыдын соосты калык пумита, кыӵе азьпал малпанъёссы — та сярысь вераським Карек-Серма гуртысь клубен кивалтӥсен Зоя Никитинаен.

— Зоя Михайловна, туннэ нуналэ радъям коллективез пумитаны секыт, тужгес пиослэсь. Та пумысен, малпасько, тӥляд коллективды туж адӟем карымон луэ. Котькуд агай-вынъёс сярысь пыр-почгес вералэ вал, вань-а кин ке валтӥсез, радъясез соос пӧлын? 

— Зэмзэ но, котькуд коллективез люканы туж секыт, гуртын со эшшо но золгес шӧдӥське. Али гужем вакыт — ужъёс эшшо но будӥзы, соин ужрадъёсы адямиосты кыскыны шуген сётӥське. Но, Инмарлы тау, мынам пиосы вань на, котькуд ужрадэ ӧтьыку, отказ уг сёто. «Зоя апай, Зоя апай», шуыса пото. Соос мынам юрттӥсьёсы, мынам оскымон пыкетэ луо. Котькуд ужрадъёсы пырисько, азязы йыбыръяно ӧвӧл. 

Нимысьтыз радъясез, валтӥсез ӧвӧл шуыны кулэ, ваньзэ огкылысь, кенешыса лэсьто. Игнатьев Яков но Иванов Александр «Борнак» возёсын тыршо, гуртамы ик уло, кыкназылэн но семьяоссы вань. Ас ужазы соос воштонтэм луо, огъя гуртлэн, возёслэн, поселенилэн пӧртэм ужрадъёсаз но пырисько. Игнатьев Игорь Ципьяысь «Зифа» организациын ужа, гуртамы ас семьяеныз улэ. Никитин Артём Ижевскысь «Аксион-холдинг» мотозаводын инженер-конструктор луыса тырше. Никитин Максим но Иванов Алексей туннэ нуналэ магистратураын дышетсконзэс йылпумъяло. Улонзы радъямын шуыны луэ, котькудӥз ас ӧнераз быгатыса тырше, тодон-валанзэ будэтэ.

— Вормонлы сӥзем вожвылъяськонын тӥляд аспӧртэмлыко номерды вал: Алексей Иванов мызганэн шудэменыз «живой» аккомпаниатор луиз. Кудӥз пиосты нош ик лушкем талантэн висъяське?

— Алёша туж усто мызганэн шудэ. Кӧня ке сцена вылын кепыра ке но, аслэсьтыз быгатонлыкъёссэ арысен аре будэтэ, азинтэ гинэ. Со туж егит на ук, солэн творческой сюресэз али кутске шуыны луэ. Со сьӧры кыстӥське эшшо одӥгез пимы — Игорь. Мызганэн шудыны дышетскон мылкыдэз потэм бере, азямы ужпум султӥз — мызган кулэ. Татчы бадӟым люкет пыртӥз «Борнак» возёслэн кивалтӥсез — Рафкат Назипов. Со доры мызган курыса мынӥ но, пал кыл вератэк, басьтыса сётӥз. Та понна Рафкат Накиповичлы туж бадӟым тау шуисько, вань куронъёсмес быдэстэ, нокинэ уг люкы.

Инмар сётӥз ке, азьланяз гуртын кык мызганчиосмы луозы. Калык понна та туж дуно, котькуд праздникын, ужрадын мызган куара кылӥське ке, кыӵе ке аспӧртэмлыко, мусо потэ, вашкала сямъёсты утьыса возисьёс туж дунъяське калык пӧлын. Туала адями понна кыӵе ке «изюминка» но луэ, калык весь вашкалаысь кырӟанъёсты но эктонъёсты куре. Тазьы пиналъёсты кылдытос уже (творчествое) кыскыны капчигес. Азязы пример вань, кызьы калык пӧлын но сцена вылын астэ возёно.

— Кыӵе аспӧртэмлыкъёс вань пиослэн коллективазы? Кылдо-а кыӵе ке шуг-секытъёс?

— Пиос соос огкылэ вуыны чальгес быгато, керетытэк, мултэс чурыт кылъёстэк. Мае косӥськод, сое лэсьто, уг керъясько. Соосын туж капчи ужаны: дӥсяськозы но, радъяськозы но, сьӧразы учкыса ветлоно ӧвӧл. Кызьы клубын ужаны кутскем бере коллективе пыризы, озьы ик али но ветло, соин соосты туж бадӟым опытэн артистъёс шуысал. Сценалэсь уг кышкало, эскертэтъёс (экспериментъёс) пумысен но могӟетъёс уг кылдо. Пӧртэм жанръёсты басьтыны тыршиськом, калык, эстрадной кырӟанъёсты но эктонъёсты дышетӥськом.
Шуг-секытъёс сярысь верано ке, соос вань, сотэк нокызьы но уг луы, соосты сэрттыса-пертчыса гинэ азьлань вамыштыны луэ. Кылсярысь, репетициос ортчытъян понна соосты огазе люканы туж шуг, малы ке шуоно Максим но Артём Никитинъёс — Ижевскын, Алёша Иванов — Казаньын, мукетъёсыз но ужазы, семьяязы, юртъер котыразы. Но шутэтскон нуналъёсы пуктэм ужрадъёсы одно ик пыриськиськом, огзэ но ум кельтӥське. Кӧня ини грамотаос, дипломъёс, лыдъяны но секыт…

— Тросэз ӝожтӥсько: егитъёсын ужаны секыт, азьтэмъясько, тӥляд пиосты мылкыд карыса пыро-а ужрадъёсы?

— Та веранэн пумозяз соглаш уг луиськы. Вань, дыр, сыӵеос но, ватонэз ӧвӧл, туала дыре егитъёс мерлыко ужъёсы шуген пырисько. Но милям коллектив сярысь верано ке, татын копак мукет югдур кылдэмын. Соос вылэ туж бадӟым оскон понэмын, соос сое валало, гуртэз азинтоно, будэтоно, вордскем интызылэсь кулэлыксэ вӧлмытоно — та ваньмыз пиослэн йыразы улэ шуыса оскисько, соин пиос кырӟаны но, эктыны но устоесь, пӧртэм крезьгуро инструментъёсын шудыны но мылкыдзы вань. 

Тани Максим но Алёша туэ магистратураез йылпумъяло. Артём Ижевскысь сельскохозяйственной академилэн горд дипломеныз, Алёша — Казаньысь университетлэн дипмломеныз пусйиськозы, собере та кык пиосты арми радъёсы келяломы. Одӥг арлы коллективмы кулэсмоз. Малпасько, соос интые но султӥсь пиналъёс луозы. Одӥг ар кема уг кыстӥськы ке но, гурт лулчеберет понна со кӧня концертъёс, ужрадъёс, малпаны ик секыт.
Шумпотымон, та пиос шоры учкыса, пичи пиналъёс но сцена вылэ кыстӥсько. Соослэн мылкыдзы вань кырӟаны, эктыны, сценкаосы пыриськыны. Жаляса верано, гуртамы пиналъёс ӧжыт, соин огзэс но уг люкиськы, быгатэ-а, уг-а, ваньзэс клублэн ужаз кыскыны тыршисько. Ведь пиналлэн лулчеберет удысэ кыстӥськыны мылкыдыз ке вань, азьланяз одно ик маке пӧрмоз. Лулчеберет — со сыӵе удыс, кытын тыршыса гинэ умой бервылъёсы вутскыны луэ.
Вань пиослы, коллективлы бадӟым тау шуэме потэ сюлмысь пыриськемзы понна, соостэк уж но азьлань уз мыны, гуртлэн улонэз но куашкалоз. Азьпалан но трос аръёс ӵоже огазе тыршыса, кенешыса ужаны мед кылдоз на!

— Туж бадӟым тау вераськемдылы! Азьланяз тӥледлы но пиостылы бадӟымесь вормонъёс, творческой сюресын азинсконъёс, семьяосады шудбур но тазалык!

Егитъёслэн нуналзы — историын валтӥсь инты басьтэ, со сӥземын егитъёслэн ас граждан правозэс утён но азьпал улонэз кабъян понна батырлыко нюръяськемзылы.

Та нуналэз данъяса но сӥлы карыса, егит поколение понна зэмос пыкет луыны кулэ, соослэсь вань малпанъёссэс улонэ выжтыса, мерлык, шаермыпонна пайдаё ужъёссэс вӧлмытоме.