Вашкалаослэсь йылолзэс улӟытӥзы

Троица (асьме сямен Семык) — со ӟуч калыклэн музъемез, вуэз, нюлэсэз сӥлы каронэн герӟаськем вашкала праздникез. Со тулысэз келянлы но гужемез пумитанлы сӥзем аспӧртэмлыко праздник луэ. Юнме шорысь та вакытэз «зелёные Святки» шуыса нимамтэзы, вылды. Вашкала дырысен адямиос нюлэсэз утиллям но сӥлы кариллям, нош тужгес но соос яратӥллям кызьпуэз — ӟечлыклэсь, яратонлэсь но чылкытлыклэсь символзэ.

4-тӥ инвожое Шошма шур дурын Бадӟым Лӧзя 1 люкет гуртысь мыло-кыдо адямиос но Балтась ёросысь ӟуч калыклэн лулчеберетъя огазеяськонэзлэн ёзчиосыз тӧрозылэн Анастасия Даниловалэн кивалтэмез улсын «Троицкая встреча» шуыса нимаськем тунсыко пумиськон радъязы, ӟучъёслэсь вашкала йылолзэс — Семык шулдыръяськонъёсты — улӟытӥзы.

Лӧзя палан эшлыко но тупаса уло пӧртэм выжыысь калыкъёс. Озьыен, праздник но йӧслыко пӧрмиз: ӟучъёс но, удмуртъёс но, бигеръёс но шулдыръяськонэ мыло-кыдо пыриськизы. Дасямын вал ческыт сиёнъёсын тырмытэм кузь ӝӧк, гурын пыжизы табань, гужлазы самоваръёс.

Ужрадэз радъясьёс куноосты Троица праздниклэн историенызы тодматӥзы, соин герӟаськем сямъёсын но йылолъёсын. Эшлыко пумиськонэ лыктӥзы Кызьпу но Нюлэсмурт, соос веразы нылпиослы, кызьы азьло дыре пусйылӥллям «зелёные Святки» йылолэз, кудӥзлэн символэз луэм кызьпу. Нылпиос но бадӟымъёс асьсэос но та чебер йылолэ пыриськизы: крезьгур но калык кырӟанъёс чузъяськем улсын кызьпуэз пунӥзы, венок керттӥзы, кызьпу котырын бергазы, сое данъязы. Собере пӧртэм шудонъёсын шудӥзы, кылсярысь, «Гори, гори ясно», «Ручеёк», «Русские переплясы» но мукет шудонъёсын. Озьы ик «кумление» йылолэз ортчытӥзы. Праздникез йылпумъяса, вань мылкыд карисьёс кызьпуэз венокъёсын но лентаосын чеберъязы. Праздник туж шуныт, югыт но шулдыр пӧрмиз.