Хезмәт

Владимир Алексеев: «Спорт — шумпотон вайись занятие»

Гондыргуртын улӥсь Владимир Алексеев спортэз матын каременыз гуртоосызлы гинэ ӧвӧл, котырысь гурт калыклы но, районын улӥсьёслы но кемалась тодмо адями ини.

Гондыргуртын улӥсь Владимир Алексеев спортэз матын каременыз гуртоосызлы гинэ ӧвӧл, котырысь гурт калыклы но, районын улӥсьёслы но кемалась тодмо адями ини. 1953-тӥ арын вордскем воргорон спортэз но таза улон сямез пичи дырысеныз матын карем. Туннэ но спорт со понна вань улонэз луэ. «Спорт мынам вире пыӵамын ини, — шуэ со. — Одӥг нунал ке но бызьыны ӧй поты ке, мугоры ассэ умойтэм шӧдыны кутске». Туэ август толэзе Покчи Лӧзяын «Чемпион» спорткомплексэз капитальной ремонт бере усьтыкузы но, Владимир Витальевичез ёрослэн главаез Рамиль Нутфуллин ТАССР-лэн 100 ар тырмонэзлы сӥзем медален, озьы ик грамотаен пусйиз (туспуктэмын). Та, валамон, тренерлэн нырысетӥ наградаез ӧвӧл. Нош Владимир Витальевич понна самой бадӟым вормонэз — нылпиолэн сое гажамзы, спортэз улонзы ӵоже матын каремзы но яратэмзы.
— Ачим Гондыргуртын вордски ке но, татын дышетски ке но, трос аръёс ӵоже Якутиын улӥ. Отын кӧня ке дыр ӵоже железобетонной заводын тырши, берлогес стропальщик луыса но ужай. Но 20 ар талэсь азьло вордскем палъёсам бертӥ. Озьы пӧрмиз: ужан интыям уксё но ӧз тыре, татын выны кулӥз, анае висьыны кутскиз, кузпалэным но люкиськимы. Соин гуртэ бертыны малпай, — веранзэ кутскиз Владимир Алексеев.
2000-тӥ арын, Владимир Витальевич Балтась районысь спортшколаын ужаны кутске. Якутиын улыкуз но спорт ужрадъёсы пыриськем бере, выль ужан интыяз дышыны кема дыр кулэ луымтэ солы. Тренер толалтэзэ нылпиосты куасэн ветлыны дышетэм, тулыс но гужем соосын ӵош бызьылэм. 2012-тӥ арысен со дано шутэтсконын ини.
— Одӥг ласянь, нылпиосты спортэ кыскыны туж тунсыко, нош мукет ласянь, та туж кылкутымон но. Кылсярысь, толалтэ куасэн бызьылыса пӧсяло но, собере дӥськутъёссэс воштыку кынмыса висьыны кутскыны быгато. 40 градус кезьытэн но куасэн ветлэммы вань. Мон ужаку, нылпиослы куасъёс уг тырмо вал, сокем трос луылӥзы спортэн вырыны мылкыд карисьёс. Пӧртэм аресъем нылъёс но пиос ветлӥзы спортшколае. Туж шулдыр но пайдаё ортчытӥськомы вал дырмес, занятиосмес. Ваньзылы киязы инвентарь сётӥсько вал, ваньзы ӵош люкаськыса, вераськыса, спортэн герӟаськем кыӵе ке тунсыко юанъёсты эскерылӥзы. Соослэсь спортэн тунсыкъяськон мылкыдзэс улӟытыны гинэ кулэ вал. Али, жаляса верано, интернет, телефон луэмен-а мар-а, ӵемысь нылпиос спортэн вырыны дыр шедьтыны уг быгато, — мылкыдъёссэ вера собеседнике.
Туала нылпиослэн спортэн эшъяськыны дыртымтэзы (зэмлык понна вераны кулэ, туала дыре но спортэз матын карись егитъёс ӧжыт ӧвӧл. Но 20-30 ар талэсь азьло соос, оло, тросгес луиллям, дыр) сое туж сюлмаськытэ, шӧдске. Бадӟым опытэн тренерлэн, аслаз 67 аресаз но ялан спортэн вырись воргоронлэн валанэз тае шонерен но умоен уг лыдъя. «Спорт адямилэн тазалыкез вылын гинэ ӧвӧл, характерез вылын но туж шӧдӥське. Адямиез кылкутонлы, дисциплиналы дышетэ со», — шуэ тренер. Таӵе кылъёсты юнме гинэ уг вера Владимир Витальевич, спорт солэн улоназ но шӧдскымон пытьы кельтэм. Чидась луыны, шуг-секытъёслы сётскытэк улыны дышетэм спорт сое. Туннэ нуналэ Владимир Алексеев ас арлыдъемъёсыз пӧлын бызьылонъя 8 пол Россиысь призёр луэм воргорон но. Казань, Ижевск, Йошкар-Ола городъёсын ортчись полумарафонъёсы но (22 иськем) мыло-кыдо пыриське пенсиысь тренер. Нош 22 иськем бызьыны быгатон понна кӧня кужым, чидан кулэ! Пенсиын шуыса уг пукы воргорон, котькуд нунал спортэн выре. Упражнениосты лэсьтэ, дораз солэн гантельёсыз но вань, велотренажёрез но аслаз. Гондыргуртын улӥсьёс одӥг нунал спортсменэз урамысь ӧз адӟе ке, ышто вылэм ини. Соос дышемын толалтэ воргоронлэсь куассэ кутыса бусыын яке урам кузя ветлэмзэ, нош гужем — бызьылэмзэ адӟыны. Пӧсь гужем но, кезьыт тол но сое уг кышкаты — дыши ини, спортэн вырон сямлы пӧрмиз ини, пе.
— Мынам егитъёслы тае вераме потэ: дорады ӧжытгес пуке. Вырыны кулэ котьку но. Малы ке но «спорт» кылэз кылэмзы бере, тросэз малпало, со секыт, трос кужымез но дырез кулэ карись маке шуыса. Но ведь со чик но озьы ӧвӧл. Котькуд адями аслыз кельшись, сюлмызъя луись спортлэсь ӧрзэ бырйыны быгатэ. Спорт — шумпотон вайись занятие, —вераськонмылы йылпумъян лэсьтыса пусйиз тренер.
Владимир Витальевичлэн кык нылъёсыз, кык внукъёсыз но кык внучкаосыз вань. Соос кыдёкын уло ке но, кызьы вераз ачиз тренер, самой матысь адямиосыз луо. Соос понна ик улэ со.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: