Вормонлэн кырӟанэз чузъяськиз

Ужрад сӥземын вал 22-тӥ инвожолы — Быдӟым тылож кутскон нуналлы. Кык нунал ӵоже Фестивален валче пӧртэм площадкаос ужазы, ужрадъёс ортчизы. Одӥгез соос пӧлысь военно-патриотической кырӟанъя элькун фестиваль — «Голос Победы».

Туэ та фестиваль кыкетӥзэ ортчем. Ужрадэ пыриськиллям республикалэн 22 ёросъёсысьтыз мылкыд карисьёс. Быръён тураз республикаысьтымы 678 мурт пыриськем, Гала-концертаз — 296 нылпиос но егитъёс.

Асьме ёросысь та фестивале пыриськиллям Покчи Лӧзя Культура юртысь Виктория Гаврилова, Шор Кушкет гурт клубысь Алёна Анисимова, Нуринерысь Ильнара Нотфуллина но Сосна гуртысь Нурислам Сафин. Ӟечкыласьком, соос ваньзы, чебер выступление возьматыса, III-тӥ степенё дипломъёсын, медальёсын но фестивальлэн нимысьтыз значокъёсыныз пусйиськизы. Нош Виктория Гавриловалы но Ильнара Нотфуллиналы Гала-концертэ но пыриськыны шуд усиз. Азьланяз но та нылъёслы но пиослы, ёросмылэсь данзэ утьыса, пӧртэм ужрадъёсын яркыт ворекъяны мед кылдоз.