Вунонтэм ужъёсыз уно (Ӟаны школалы сӥзем статьялэн азинтонэз)

Соизлы паймонэз ӧвӧл, малы ке шуид Иван Дмитриевич татысь школалэн коллективеныз 15 ар ӵоже кивалтон даураз туж уно ӟеч ужъёс лэсьтыны вутскиз.

Вордскиз Иван Дмитриевич 1933 арын Пор-Кутеш гуртысь колхозниклэн семьяяз. Со вал покчиез нылпи. Ципьяысь шоръёзо школаез йылпумъяз. 1954-1957 аръёсы армилэн радъёсаз служить кариз. Нош армие кошкытозяз кӧня ке ар Улын Кня школаын дышетӥз. Армиысь бертэмез бере Карек-Серма гуртысь библиотекаын ужаса басьтӥз. Нош мылкыдыз ялан но дышетӥсь луон вал. 1958 арын Ӟаны школаын физикаез но математикаез дышетыны кутскиз. Тӥни со дырысен солэн вань улонэз Ӟаны школаен герӟаськиз. Берен араз ик Ижевскысь педагогической институтэ пыриз, сое 1965 арын йылпумъяса, историен дышетӥсьлэсь ӧнерзэ басьтӥз. 1960 арысен 1975 арозь Ӟаныын тямыс аръем но шоръёзо школалэн директорез вал.

Кызьы верамы ини, со аръёсы Иван Дмитриевичен лэсьтэм ӟеч ужъёсты лыдъяса потоно ке, туж уно дыр кулэ луысал. Нош котькуд адямилэн ас улон гумыраз лэсьтэм ужъёсыз пӧлын тужгес но висъямонъёсыз луыло. Маин бен вунонтэм луыса кылиз Иван Дмитриевич Гришкин та коллективын ужан аръёсаз?

Нырысь ик, ӵапак со ужан аръёсы Ӟаны гуртлэн пумаз ӝутӥськиз выль школалэн зданиез. Иван Дмитриевич луиз та школаез лэсьтонын нырысетӥ ӵог шуккисьёслэн одӥгез. Школалэсь основной люкетсэ лэсьтон дыръя районысь организациослэн юрттэтсы шӧдӥськиз ик ке но, зданилэсь одӥг пал «бурдзэ» лэсьтыса вуттон быдэсак хозрасчётной амалэн нуиськиз. Нош таӵе амаллэсь «умой» палъёссэ та ужен вырем кивалтӥсь гинэ тодэ, дыр. Туж тунсыко луысал вылэм, Иван Дмитриевичлэсь та уж сьӧрын ветлыкуз кӧня ке пол Казане, Киров областе, Марий Эле но уно гинэ мукет интыосы вуылэмзэ лыдъяса потӥд ке. Нош районысь кивалтӥсьёс доры лэсьтӥськон организациосы ветлэмез сярысь вераса улонэз ик ӧвӧл.

Нюлэскысь ваем котькуд кор, кирпич заводысь ваем кирпич татын ужась дышетӥсьёслэн, кочегаркаын ужасьёслэн, утялтӥсьёслэн киоссы пыр потӥзы. Фундаментысен кутскыса, липет липон, буяськон дорозь ваньмыз соослэн кужыменызы ужаськиз. Ӟаны школа дорын ( вераськон мынэ вуж школа сярысь – ред.) шаугетыса сылӥсь кызьпуос но топольёс, тӧдьы сяська пушкы выем улмопу сад, убоосысь горд пиштӥсь сяськаос, пиналъёслы тол потыны тырмымон бакча сиён будэтон бакча — таос ваньмыз но тодэ уськыто Иван Дмитриевичен кивалтоно коллективлэсь бадӟым ужзэ.

Кема аръёс ӵоже Ӟаны школаен кивалтэм Иван Васильевич Ермаковлэн тодэ ваёнъёсысьтыз:

— Иван Дмитриевич директор луыса ужан аръёсы со нимысьтыз саклык висъяз интыысь кадръёсты дасянлы. Милям коллективамы ужам бадӟым опытсы луэм педагогъёс Анастасия Прокопьева, Антонида Иванова, Галина Тарасова, Антонида Ермакова, Евгения но Аркадий Тихоновъёс но уно гинэ мукетъёс Иван Дмитриевичен дышетэм но соин ӵош ужам дышетӥсьёс. Мон ачим но солэн киулаз дышетон ужлэн секретъёсызлы дышетски.

Ини вераммыя, Иван Дмитриевич директор луыса ужан аръёсаз туж бадӟым лэсьтӥськон ужъёс нуиз. Со гинэ ӧз тырмы, уно аръёс ӵоже колхозысь партийной организациын азьветлӥсь луиз. Со дыре быдэс агитмассовой уж дышетӥсьёслэн коллективзылы оскемын вал. Пудо утисьёслэсь юртсэс оформить карон, соослэн ужзылы йылпумъянъёс лэсьтон, «молниос», бордгазетъёс поттон... таосты ваньзэ пиналъёсты дышетон ужлэсь мозмем бере лэсьтоно.

Кузьма Семёнович Самсоновлэн тодэ ваёнъёсыз:

— Мон Иван Дмитриевичен пичи дырысен ӵош будӥ, ӵошгес Ципьяысь шоръёзо школаын дышетским. Ижевскысь педагогической институтэз йылпумъяса, школаын солэсь азьлогес ужаны кутски. Починкаын библиотекаын но учётчик луыса ужакуз ялан вералоз вал дышетон ужез матын карисько шуыса. Та пумысен РОНО-лэн заведующиеныз Рамиль Файзрахманович Фазлыевен кӧня ке пол вераськыны тупаз. Иван Дмитриевичез школае ужаны басьтыны дэмласа вераськи. Аслаз личной сямъёсыз сярысь ке верано, ужан дыръя пӧртэмез луэ вал. Кельшыса, ог-огмылы юрттыса ужан дыръёс но, вожпотонъёс но. Кулэм мурт сярысь умойтэм вераны уг яра, шуо. Озьы но одӥг сямзэ гинэ верало ини, директор луыса ужакуз ӧжыт ваменэсгес вал. Мон солэн педагог луыса пиналъёслы тодон-валан сётонын быгатонлыкез сярысь пыр-поч вераны уг быгатӥськы, нош тани ужез радъяны быгатонлыкез тырмыт вал.

Азьло директоръёс сямен ик, Иван Дмитриевич но улонысь вазь кошкиз. Тазалыкез лябӟемен, берло аръёссэ школаын дышетӥсь луыса ужаз. Нош берлогес секыт висён пыд йылысьтыз чылкак погыртӥз.

Соос кышноеныз Мария Семёновнаен куинь ныл но одӥг пи будэтӥзы. Бадӟым нылзы Ижевскын военной госпитальын ужаз. Али дыре дано шутэтсконын ини. Мукетыз нылзы Ӟаныысь почтовой связья отделениын ужаса пенсие потӥз. Куинетӥ нылзы Ципья школаын ӟуч кылъя но литературая дышетэ, дышетон ужпумъёсъя директорлэн кивоштӥсез но луэ. Пизы Георгий районын тодмо адями, тылпулэсь утиськонъя училищеез быдтыса, государственной пожарной надзорлэн районысь отделаз ужаз, подполковник званиен дано шутэтсконэ потӥз.

Александр Кунаев.

(«Азьлане» газетлэн архивысьтыз)

Редакцилэсь: Гажано лыдӟисьёс, та статья «Азьлане» газетын печатласькем 12 июне 1999 арын, 20 ар талэсь азьло. Валамон, сомында ар куспын со дыре шонер луэм куд-ог фактъёс тросэз воштӥськемын. Соин но тае лыдэ басьтыса, статья интыен-интыен редактировать каремын.