Вӧйдыр шулдыръяськонъёс

Кызьы тодӥськом, Вӧйдыр арня кыстӥське одӥг арня ӵоже. Солэн вашкала дырысен утиськем йылолъёсыз: шулдыръяськонъёс но шудонъёс, табань сиён, куро сульдэрез сутон — туннэ но ортчо на асьме гуртъёсын.

Одӥгез сыӵе гурт, кудаз Вӧй праздникез ортчытон кемалась чебер сямлы пӧрмиз ини, луэ Покчи Лӧзя. Отын котькуд аре та шулдыръяськонэз радъяло. Тани туэ но вӧй арнялэн берпуметӥ нуналаз, 6-тӥ южтолэзе, Покчи Лӧзяын Вӧй келянлы сӥзем праздник ортчиз. Котьку сямен туэез но шулдыръяськон тунсыко вожвылъяськонъёсын но шудонъёсын, шулдыр крезьгурен, ческыт табанен но капчи мылкыдэн тодэ кылиз.

Вӧй арняез келяны Покчи Лӧзя гурт поселениысь калык но бертэм куноос люкаськизы. Ужрад Лулчеберет юрт дорын ортчиз. Радъясьёслэн тыршеменызы, нимаз ик Покчи Лӧзя Лулчеберет юртысь устолыкъя кивалтӥсьлэн Галина Петровалэн сюлмаськемезлы луыса, праздник туж умой пӧрмиз, шулдыр ортчиз. Тунсыко вожвылъяськонъёс но шудонъёс, праздник атмосфера нокинэ но мылкыдтэм ӧз кельты. Куазь кезьыт тупаз ке но та нуналэ, нокин но кынмыса ӧз сылы, котькин аслыз тупась вожвылъяськон шедьтӥз. Кин гынсапег куяз, кин, клубез котыръяса, гынсапеген бызьылӥз, кин ледянкаен бызьылӥз, кин дротикен пельтон шаръёсты пуштытъяз… «Сапегез сыӵе ӟырдыт мылкыдэн куязы, одӥгез клуб липет йылэ ик лобиз. Ледянкаен бызьылонэз но калык туж яратэ», — шуэ Галина Денисовна. Огъя вераса, шулдыръяськон ужрадъёсы пыриськем адямиос ваньзы но умой мылкыд басьтӥзы, шумпоттӥсь кузьымъёсын пусйиськизы.

Соглаш луоды, дыр, урамын сылӥсь гур нокызьы но синме йӧтытэк кыльыны уг быгаты шуыса. Тани татын но нырысь ик пужыосын чебермам питырано гурез синйылтӥ. Малпай: огшоры чеберлы пуктӥллям. Матаз вуи но валай, янгышаськем шуыса: со зэмос гур вылэм, эгырез но вань, табань но пыжо. «Гурез ХЭС-ысен вайимы. Сельсоветэ вазиськимы но со юрттӥз. Куинь ведра табань пыжимы», — паймемме адӟыса, валэктӥз Галина Денисовна. Тӥни озьы праздникын мылкыд карисьёс гурын пыжем ческыт табань веръяны но самоварысь пӧсь чаен кунояськыны быгатӥзы. 

Кемалась дыръёсы кадь ик, али но Вӧй келянлэн валтӥсь тодметэз сульдэрез сутон луэ. Та толэз келян но тулысэз пумитан аспӧртэмлыко йылолэн лыдъяське. Сульдэрез сутыса, вань люкаськем адямиос ог-огзылэсь прощение куризы (угось Вӧй келян нунал Прощёной воскресеньелы тупа), ӟеч мылкыд каронъёссэс веразы но, удалтэм урожай, каньыл улон сӥзизы.

Туспуктэмъёс Галина Петровалэн