Выль «ВужМем»

Мукет сямен вераса, группа, кудӥз герӟаськемын удмуртъёслэн историенызы. Малы со озьы нимаське – «ВужМем»? Группалэн кылдытӥсез, одӥгез «идейной вдохновителез» асьме улосчимы Алексей Шмелёв та юанлы таӵе ответ сётӥз: «Улонын одно ик ваньмыз вужме но вунэ. Соин ик ортчемзэ тодэ вайыса, бугыръяськоно ортчем дауръёсын». Озьыен, та группа кылдытэмын ас калыкеныз, аслаз историеныз тунсыкъяськись адямиос понна.

«ВужМем» группалэн подписчикъёсыз али трос ӧвӧл ке но, малпасько, соос йылозы шуыса. Малы ке шуоно азьпалан малпанъёсазы – луэм материалъёсъя выль сайт кылдытыны. Нош со понна бадӟым кужым но трос дыр кулэ – та туж кылкутымон уж. Валтӥсь ужпум – шошма удмуртъёслэсь луэм дыръёссэс тодэ вайытыса, пиналъёсты ас шаеренызы, ас историенызы тодматон но соин тунсыкъяськон мылкыдзэс ӝутон уж. Мазэ веранэз, пиналъёс туала дыре шер гинэ научной статьяосты лыдӟо, семьязылэн, гуртсылэн, калыксылэн историеныз уг тунсыкъясько. Соин ик историзэс но уг тодо. Мон малпамъя, «ВужМем» группа историен тодматскон понна туж кулэ луись группа. Лыдӟисьёсмы пӧлын историен тунсыкъяськисьёс луизы ке, соос котьку быгато группаын луэм материалъёсын тодматскыны, озьы ик быгато асьсэлэсь гожтэм материалъёссэс но группае поныны. Группае котькуд потэм материаллэн одно ик аслаз авторез возьматэмын луоз. Отчы тӥ таӵе ӧръёсысь информацидэс кельтыны быгатӥськоды:

- топонимика (интынимъёс, соослэн кылдэмзы сярысь);

- удмуртъёсын куке но луэм тунсыко учыръёс, кырӟанъёс, веросъёс, туспуктэмъёс;

- кыкетӥ но нырысетӥ дунневыл жугиськонэ пыриськем удмуртъёслэн историоссы (улон-вылонзы, семьязы сярысь но мукет);

- удмурт гуртъёслэн историоссы;

- мукет малпамтэ проектъёс.

Архивъёсады вуж фотоосты яке ӵыжы-выжыосты сярысь тодэм веранъёсты вань ке, группае поттыны быгатӥськоды (https://vk.com/club_vuzhmem). Тӥ гинэ ӧвӧл, район калык но мед тодоз аслаз дано пиосыз но нылъёсыз сярысь.