Хезмәт

Жуг-жаг — адямилэн бервылыз

Инкуазез утён сярысь ӵемысь вераськом, но малы ке но чик ӧжыт лэсьтӥськом котырысь улосмес чебергес, чылкытгес карон понна.

Со гинэ но ӧвӧл, чылкытатон интые, инкуазез кырсёмытон ужмес азинтӥськом гинэ. Малпан кылдэ, туала улонын инкуазь сярысь сюлмаськонлы инты ӧвӧл ни шуыса.

«Сюлэм вӧсь луэ сыӵе суредэз адӟыса. Асьмеос ик отӥ ветлӥськом, нылпиосмы со сюрестӥ школае мыно-берто. Возьыт луыны кулэ кадь. Сомында отын жуг-жаг. Утялтыса быдтымон но ӧвӧл. Ӧм чидалэ, одӥг нуналэ, кӧня ке анайёсын кенешыса (пиналъёсмес со сюрестӥ валче нылпи садэ ветлытӥськомы уга), питомнике утялскыны мынӥмы», — шуиз одӥг нуналэ тодмое, Покчи Лӧзя гуртысь лесничестволэн питомниказ люкаськем жуг-жаглы паймемзэ вераса. «Огпол мынэмен гинэ утялтыса быдтыны ӧм быгатэ, — шуэ егит кышномурт, — тани туннэ но бӧрсям пакетъёс басьтӥ, жаг люкан понна. Яра вылэм, утялтӥд но, чылкыт луиз шуыса буйгатскид ке. Ӧвӧл ук, бӧрсяд ик жаг куяло. Нош кинъёс шуод? Асьмеос ик — адямиос».

Зэмзэ но йыркур луымон. Ачид утялтыны уд ке валаськыд, утялтэмзэ ке но эн кырсёмыты вал. Нюлэсъёсын, арамаосын сыӵе суредэз адӟыны дышемын, лэся, ини асьмеос. Котыр кыллись пияла но пластик бутылкаослы, салфеткаослы, пакетъёслы ум но паймиське кадь. Но со кырсёмытоно, утялтытэк кельтоно шуэмез уг валэкты ук.
Та дырозь нокыӵе жуг-жаг инкуазез ӧз чеберты али. Сыӵе капчи ук, инкуазе шутэтскыны потыкуд, бӧрсяд пакет басьтыны. Жуг-жагдэ со пакетэ люкаса, нимысьтыз жаг куян интые кельтыны но сокем секыт ӧвӧл, дыр, шуыса малпасько.

Ужпум чеберлык но ӟеч сямъёс бордын гинэ шат. Нылпиосмылэн, асьмелэн тазалыкмы бордын но. Пиялалэсь, пластиклэсь но кортлэсь (нош вылӥын верам интыын кортӵогъёс но вань, пе) асьмеос ик изъян адӟыны быгатӥськом.

Эшшо одӥгез сюлмаськытэ: туала улонын адями тросгес ачиз сярысь малпаське, ас каньыллыкъёсыз сярысь. Инкуазь сярысь малпаськыны дышемын ӧвӧл, тужгес но быдэ вуымтэос. Пиналъёсты пичиысен ик инкуазез утён мылкыдэз пыӵатыса визьнодано шуыса, ваньмы тодӥськом. Но трос-а асьмеос лэсьтӥськом та ужпумез быдэстон понна? Нылпи садъёсын но школаосын та ласянь мыло-кыдо ужало, но со сяна анай-атайёс но нылпиоссылэсь экологической культуразэс будэтон сярысь сюлмаськыны кулэ, дыр.

Ноку но вунэтоно ӧвӧл, асьмеос, адямиос, огдыре ик та дуннеын кузё но, куно но шуыса. Мылпотэмъя, кузё кариськыса, сяськаосты ишкаськом, писпу вайёсты тӥяськом. Кема-а улозы со сяськаос вазаын, та сярысь чик ум малпаське. Нош инкуазь сэрегын кӧня дыр ӵоже соос асьмеды шумпоттыны быгато али. Соин но инкуазь чеберлыкез киын ӧвӧл, синмын «йӧтоно», утёно, кадырзэ валано. Инкуазьын луыкуды, жаг куштон интые, сьӧрады кыӵе ке инкуазь кузьым басьтэ: я чебер сӥзьыл куар, я музъем вылын кыллись тунсыко улвай. Малпасько, та арбериос, тужгес но соосты киужъёсады кутӥды ке, кема дыр ӵоже сюлмады шуныт но чебер тодэ ваёнъёсты утьыса возёзы.

Инкуазез утёме, инкуазен эшъяськоме, инкуазьлы юрттоме!
 

Реклама
Нравится
Поделиться:
Реклама
Комментарии (0)
Осталось символов: