Сездән — сорау, бездән — җавап

— Фитыр садакасын мохтаҗларга ашау кирәк-яраклары яисә өс киемнәре итеп бирү рөхсәт ителәме?
— Бисмилләәһир-рахмә-әнир-рахииим! Тиешле фитыр садакасына мохтаҗ булган кешеләргә кирәк-яракларны алып бирергә мөмкин. Кемгәдер акча, кемгәдер көндәлек кирәк әйбер, кемгәдер дару итеп бирергә рөхсәт ителә.

— Коръән укылган аш мәҗлесендә мөнәҗәт әйтергә ярыймы һәм Пәйгамбәребез турындагы мөнәҗәтләрне көйләп уку рөхсәт ителәме?
— Ярамый торган гамәллләр катышмаган һәм дә яхшы сүзләр белән кешеләрнең күңелләрен йомшартып, яхшылыкка өнди торган мөнәҗәтләр һәм җырлар әйтү рөхсәт ителә.

— Ислам динен тотучыларга хәрби хезмәткә барырга ярыймы? Әгәр дә шулай эшләмәсәк, Ватанны кем сакларга тиеш була?
— Мөселман кеше төзегән килешүне үтәргә тиеш. Без Ватаныбызның кануннарын үтәргә бурычлы һәм анда Ватанны саклау максаты искә алынган икән, безгә торган ил-җиребезне саклау вазифасын үтисе була.

— Ислам дине театр, спектакльләр мәсьәләсенә ничек карый? 
— Әгәр дә театр-спектальләр, төрле фильмнар, мультфильмнар тәрбияви максатка нигезләнгән һәм аларда динебезгә каршы гамәлләр юк икән, ул чараларны карау һәм аларда катнашу тыелмаган.