Туннэ шаерамы визьнодан удысын ужасьёслэсь ӧнер нуналзэс пусйиськом.
Туала нылпи сад — со инты, кытын пӧртэм йӧскалык группаосысь но культураосысь нылпиос пумисько но валче визьнод басьто. Одӥг группае шедьыны быгато ӟучъёс, бигеръёс, удмуртъёс, поръёс, армянъёс но мукетъёс. Валтӥсез — таӵе югдурын котькуд пинал ассэ каньыл шӧдыны но соин артэ луэм мукет нылпиосты валаны дышетскыны кулэ.
Малы со ӵапак нылпи садын кулэ? Дошкольной арлыд — адямилэсь улон шоры учкон инъетъёссэ кылдытон понна туж пайдаё вакыт. Та арлыдын нылпиос выль информациез туж ӝог, тунсыкъяськыса пыӵато, соослэн ӧвӧл на урод стереотипъёссы. Нылпи садэ ветлон вакытэ нылпиослы ӟеч сямъёсты пыӵатон понна тужгес умой луонлыкъёс кылдытӥсько.
Нош йӧскалык визьнодан сярысь верано ке — со мукет калыкъёслэн праздникъёсынызы но дӥсьёсынызы тодматскон гинэ ӧвӧл, солэн валтӥсь ужпумез — нылпилы ас вордскем шаерез, инкуазез, лулчеберетэз но сям-йылолъёсыз сярысь валатон сётон, со дыре ик — мукет калыкъёсты, соослэсь лулчеберетсэс гажан мылкыд пыӵатон.
Балтась ёрос трос йӧслыко луэменыз данъяське. Нош Ципья черкогурт — ёросысьтымы одӥгез тужгес трос йӧслыко гурт, отын куспазы тупаса но ог-огзэс гажаса уло пӧртэм калыкысь адямиос. Гуртын вань шоръёзо школа но нылпи сад, кытчы озьы ик ветло пӧртэм йӧскалыкысь пиналъёс. Туннэ вераськиськом Ципья нылпи садлэн кивалтӥсеныз Никитина Ирина Валентиновнаен.
Визьнодан удысын ужзэ Ирина Валентиновна мытэ Вукогуртысь нылпи садын. 1992-тӥ арысен 1994-тӥ арозь визьнодась луыса ужа, 1994-тӥ арысен 2008-тӥ арозь — кивалтӥсь луыса. 2009-тӥ арысен Ципья нылпи садэ кивалтӥсе пукто, туннэ нуналозь но та интыын тырше. Педагогика удысын стажез — 34 ар, со пӧлысь 32 арзэ кивалтӥсь луыса ужа ни. Туэ гудырикошконэ трос аръёс ӵоже тыршыса ужамез но ас удысаз азинсконъёсыз понна «Отличник сферы образования и науки Республики Татарстан» данъян пусэн пусйизы.
— Ципья — мур историен зэмос удмурт гурт, со дыре ик со пӧртэм калыкъёслэн валче улон интызы но луэ. Шӧдӥське-а со нылпи садлэн улоназ, Ирина Валентиновна?
— Нылпи садмы комбинированной шуыса нимаське, визьнодан но дышетон ӟуч кылын мынэ. Но нылпи садэ пӧртэм выжы калыкъёсысь пиналъёс ветло бере, малпасько, сое этнокультурной компонентэн нылпи сад но шуыны луоз, дыр. Гуртмы кадь ик, нылпи садмы но — калыкъёслэн тупаса но огъя улон интызы.
— Нылпи садады кӧня воспитанникъёс но педагогъёс? Коллективады но пӧртэм йӧскалыкысь адямиос вань-а?
— Таяз дышетскон арын милям 109 пиналъёсмы — со Ципья, Вукогурт, Сизнер, Вуж Ципья, Тагашур, Кускем, Дурга, Арбор гуртъёсысь нылпиос, соос пӧлысь 35-ез бигеръёс, 58-эз удмуртъёс, 1-ез пор но 15-ез суро семьяысь пиналъёс. Коллективамы 12 педагогъёс: 5-ез бигеръёс но 7-ез удмуртъёс.
— Валамон, нылпиосын вераськон понна уже ӟуч кыл кутӥське шуыса, нош кызьы ӟуч луисьтэм пиналъёс, кылсярысь, бигеръёс, удмуртъёс но поръёс, выль кыллы дышо? Ӟуч кыл сяна, эшшо кыӵе кылъёсты дышето?
— Ӟуч кылэз дышетонын нылпиослэн шуг-секытъёссы уг кылдо. Угось туала вакытэ нылпиос, анай кылынызы ӵошатыса, ӟуч кылэз капчиенгес дышето. Озьы ик, анай-атайёслэн соглаш луэмзыя, шоръёзо группаысен кутскыса, вань пиналъёс бигер но англи кылъёсты дышето. Со сяна, режимной моментъёсы воспитательёс нылпиосын анай кылынызы но верасько.
— Вань-а тӥляд, кылсярысь, ӵукна пӧртэм кылъёсын ӟечбуръяськон сямды?
— Бен, ӵукна нылпиосмы куинь кылын ӟечбуръясько: ӟуч, бигер, удмурт сямен. Та сям соослы пыӵамын ини, шуыны кулэ. Мынам малпамея, со туж умой практика.
— Кызьы радъяське анай-атайёсын уж? Вань-а сыӵе учыръёс, куке анай-атайёс пиналзэс бигер кыллы дышетыны пумит луо яке анай кылзэс дышетыны куро?
— Анай-атайёслэн претензи верамзы ӧвӧл. Тупаса, ог-огмес валаса ужаськом. Но азьланяз вордскем удмурт кылэз дышетонэз но уже пыртэммы потэ.
— Кыӵе йӧскалык праздникъёс пусйисько нылпи садады? Кыӵе конкурсъёсы пыриськиськоды? Ортчыло-а нылпи садады ужрадъёс, кытчы анай-атайёс но пырисько?
— Нылпи садын арлы быдэ пӧртэм праздникъёс но конкурсъёс ортчыло (Сумбля, Вӧй, Акашка но мукет). Арлы быдэ нылпиос «Мудорвай» но «Балтач малае — Балтач кызчыгы» конкурсъёсы пыриськыло, призо интыос басьто. Анай-атайёс но мыло-кыдо юртто, ужрадъёсы но пырисько.
— Вань-а анай кылъёсын, кылсярысь, бигер но удмурт кылъёсын, методической материалъёс, кудъёссэ тӥ ужады кутӥськоды?
— Бен, бигер кыллы но, удмурт кылэз дышетонлы но методичкаос, пособиос, книгаос, ӝӧквыл шудонъёс вань.
— Ципья гуртысь библиотекаосын, школаен, мерлыко огазеяськонъёсын кусып возиськоды-а?
— Школаен преемственной уж нуиське, библиотекае но музее экскурсиос радъяськом. Озьы ик кусып возиськом Балтась ёросысь удмуртъёслэн НКА-енызы, нимаз ик, Пчельникова Ольга Мироновнаен.
— Нылпиосты визьноданын азинсконлэн валтӥсь показателез мар тӥ понна?
— Валтӥсез со, конечно, коллективлэн, анай-атайёслэн но нылпиослэн огъя луэмзы.
— Кызьы малпаськоды, марлы туала нылпиос нырысь ик нылпи садын дышетскыны кулэ?
— Нылпи садын туала нылпиос нырысь ик «предметной» тодон-валанъёслы дышетскыны кулэ ӧвӧл, нош улон-вылонын инъет луись компетенциослы — огкыл шедьтыны, черодзэс витьыны, люкиськыны, керетэм бере тупаны, юрттэт курыны но сое ӵектыны быгатыны, мукет муртлэсь тунсыкъёссэ лыдэ басьтыны. Ваньмыз со шудон пыр быдэстӥськыны кулэ, кызьы куре дошкольной дышетонъя ФГОС.
— Тӥляд малпамдыя, кыӵе валтӥсь ӟечлыкъёсыз луыны кулэ туала визьнодасьлэн?
— Туала визьнодась — со огшоры педагог гинэ ӧвӧл, со адями, кудӥз огдыре ик психолог, визьнодась, артист но сюлмаськись мурт луыса ужа. Милям нылпи садамы воспитательёсмы ваньмыз ӵапак сыӵеесь. Ваньзылэн вылӥ педагогической образованизы вань, кыкез визьнодасьёсмы вылӥ квалификационной категориен, мукетъёсызлэн нырысетӥ квалификационной категоризы вань. Коллективмылэн наставникъёсыз луо Гарифуллина Минзиля Ильдусовна, Зямилева Алсу Рафаэлевна, Фазулзянова Раиса Ивановна. Соослэн педагогической стажзы 30 арлэсь трос ни. Вань педагогической сюрессэс соос нылпиосын ужанлы сӥзизы. Соослэн саклыксылы но опытсылы луыса егит визьнодасьёс ӝоггес асьсэды усьто, туала методикаосты йыг-йыг ужазы кутыны кутско но ужзылы зэмос синмасько. Визьнодасьёс огшоры тодон-валанзэс гинэ уг сёто, соос оскон но ог-огедлы юрттон мылкыд кылдыто.
Озьы ик пусъеме потэ Кузнецова Ирина Николаевнаез — нылпи садысьтымы старшой визьнодасез. Со коллективлы азьветлӥсь но пыкет луэ. Дышетон ужез радъя, педагогъёслы юрттэ. Солэн ужаменыз ми — огъя команда, кытын котькуд педагог юрттэтэз шӧдэ но ӧнер ласянь будэ. Туэ со ӟеч ужамез но анай кылэз утёнэ но азинтонэ бадӟым люкет пыртэмез понна Татарстан Элькунысь Кун Кенешлэн тӧроезлэн воштӥсезлэн Таукарон гожтэтэныз пусъемын.
Вань педагогъёсмы муниципал, улосвыл, элькун конкурсъёсы мыло-кыдо пырисько, вормисьёс но призёръёс луо. Марина Николаевна Журавлёва туэ «Воспитатель года — 2026» конкурсын 2-тӥ инты басьтӥз, озьы ик Татарстанын улӥсь но визьнодан но дышетон ужзэс анай кылын нуись педагогъёс куспын ортчем вожвылъяськонын 50 сюрс манет тыр грант утӥз. Тарасова Лариса Николаевнаез — крезьгуръя кивалтӥсез — пусйытэк кельтыны ум быгатӥське на. Сотэк уг ортчы нылпи садамы одӥг утренник но, одӥг праздник но. Таланто, артистичной педагог. Халилова Эндже Шамилевна — бигер но англи кылъёсъя визьнодась. Никитина Алина Георгиевна — мугорез кыдатон культурая инструктор. Озьы ик ушъян кылъёс вераны кулэ покчи группаосысь усто визьнодасьёсмы — Ирина Васильевна Иванова, Раиса Вячеславовна Караваева но Эндже Фаритовна Сафиуллина сярысь. Покчи визьнодасьёс но технической персонал туж бадӟым инты басьто садикмылэн ужаз. Соослэн ужаменызы группаосын шуныт, чылкыт но кышкыттэм. Мон оскыса вераны быгатӥсько, милям самой умой коллективмы!
— Туннэ визьнодан удысын ужасьёс асьсэлэсь ӧнер праздниксэс пусйиськом. Таин валче ма верасалды тӥ асьтэлэн ужъюлтошъёстылы?
— Учырен пайдаяськыса, вань сюлмысьтым ӟечкыласько Визьнодан удысын ужасьлэн нуналэныз! Нылпиосын ужан — со аспӧртэм кузьым: кылыны быгатоно сое но, ма шара верамын ӧвӧл, нылпилэсь котькуд пичи вормонзэ синйылтоно но огшоры нуналъёсты чебер выжыкыллы пӧрмытоно. Гажано визьнодасьёс, ужъюлтошъёс, тӥ сое нуналлы быдэ лэсьтӥськоды — чидаса, шуныт мылкыдын, сюлэмдэс сётыса. Сӥзисько тӥледлы тазалык, мылкыд но тросгес пальпотон мугъёс. Котькуд нунал одӥг ке но ӟеч иворен мед шумпоттоз, нош дорады котьку мед возьмалозы каньыллык но юрттэт. Вань ӟечез, кудзэ тӥ нылпиослы сётӥськоды, тӥледлы сю поллы тросэн мед берытскоз.
— Вераськемды понна тау, ми но ӟечкыланъёсы итӥськиськом, ваньзэ умойзэ сӥзиськом. Ципья гуртысь нылпи садлэсь ужамзэ куке но тодмо удмурт гожъяськисьмы Кузебай Герд но вылӥ дунъям, мукетъёслы примере пуктылэм. Азьланяз но ципьяослы адӟем карымон луыса ужаны мед кылдоз.
Вераськиз Ольга Плотникова
Нет комментариев