Экскурсие мынӥзы, праздник ӝӧк сьӧрын куно луизы

– Туж шумпотӥськом, ми сярысь уг вунэто шуыса. Арлы быдэ Арлыдоослэн нуналазы, гуртысь клубе люкаса, куно каро. Туэ но тани 3 октябре ми понна праздник радъязы. Туж бадӟым тау гуртысь клублэн заведующиезлы Ирина Исьмековалы но «Борнак» обществолэн кивалтӥсезлы, Назипов Рафкат Накиповичлы. Соослэн сюлмаськеменызы ми понна радъямын вал Бурнакысь выль фермае экскурсия, дасямын вал узыр ӝӧк, концерт программа. Нырысь ик экскурсие мынӥмы. Кивалтӥсьмы, Рафкат Накипович, автобус но висъяз. Дас ӵошен мынӥмы. Милемлы туж кельшиз. Отын ваньмыз выль, туала, чылкыт. Бурнакысь бертыса, гуртысь клубе люкаськимы, ческыт сиёнъёсын тырмытэм ӝӧк сьӧрын куно луимы. Праздникмес шулдыртыны Ирина, котьку сямен, Кушкетысь мызганчиез, Алексей Павловез, ӧтем вал. Тау солы куара кылзэмез понна, мӧйыослэсь мылкыдзэс ӝутэмез понна. Сюлмысь юмшамы, кырӟамы, гуртысь куинь нылъёслэн тыршеменызы дасям чебер концерт номеръёсты учкимы. Шулдыр пукимы. Ваньмыз кельшиз. Тау бадӟым ваньзылы, кин милемлы таӵе шутэтскон, ог-огенымы пумиськыса вераськон ужрад ортчытонэ люкетсэ пыртӥз, – ӝутскем мылкыдын ивортӥзы Турьяысь арлыдоос.