Этнокультурной визьнодан нылпиослы кельше

Покчи Лӧзя нылпи садын дас ньыль ар ини визьнодась луыса ужась Екатерина Евдокимова 2004-тӥ арын Покчи Лӧзя шоръёзо школаысь 10-тӥ классэз йылпумъямез бере эшеныз ӵош Казаньысь педагогикая колледже дышетскыны пыре.

Нылпиосын ужаны яратӥсько

Колледжез йылпумъямез бере солы шоркарысь Советской ёросысь 352-тӥ номеро нылпи садэ ужаны направление сёто. Татын со одӥг ар ужа, соку ик бызе, собере кык нылпи вае. Дыр ортчыса, пумен уже потон сярысь малпаськыны кутске. Нош улон ваньзэ ачиз радъя: ӵапак соку Покчи Лӧзя гуртысь нылпи садын визьнодасьлэн интыез кылдэ. Екатерина отчы ужаны интыяське.

— Уг быгатӥськы вераны, мон понна со витьымтэ шорысь луиз шуыса, — вера Екатерина Григорьевна, со вакытъёсты тодаз вайыса.

— Нош зэмзэ но удалтӥз шуыса верай ке, шонер луоз, малы ке шуоно мон та коллективез умой тодӥсько вал ини, отысь атмосфера, кусыпъёс тодмо, соин ик уж борды выльысь кутскыны секыт ӧз луы, малы ке шуоно вӧзам вал адямиос, кудъёссэ мон тодӥсько вал, кудъёсыз мыным матын вал.

— Школаын дышетскыкум ик йырам ялан малпан улӥз: нылпиосын ужаны яратӥсько ук! — азьланьтэ веранзэ визьнодась. — Дыр вуэм бере, бырйыса пукыны ӧз тупа, колледже пыри. Дышетӥсьёсты дасян колледж сярысь кемалась малпаськылӥ ни, мынам, практической теориез сяна, пиналъёслэсь лулъёссэс но валаме, соослы юрттэме, соослэн пыкетсы луэме потӥз. Нош али, берлань учкыса, шуисько: та зэмзэ но мынам уже луэм.

Екатерина Григорьевна ужзэ туж яратэ, вань сюлмысь тыршыса но лулзэ сётыса быдэстэ со ужзэ. Котькуд нунал визьнодась шӧдэ аслэсьтыз нылпиос понна кулэ луэмзэ, адӟе, кызьы пиналъёслэн выль талантъёссы усьтӥсько, кызьы соослэн дунне шоры учконзы воштӥське, кызьы соос выль эшъёс шедьто. Анай-атайёсын эшлыко кусыпъёс возьыса, ог-огзэс валаса ужамысьтыз ик, оло, яратоно ужез солы капчиен сётӥське но, дыр. Ӵошен соос нылпиослы визь люкан но азинскон понна ӟеч атмосфера кылдыто. Собере валче ужамзылэн емышъёссылы шумпото: пиналъёссылэн асьсэлы осконзы будэ, куспазы вераськыны капчигес луэ, соос зэмос шудо нылпиос луо.

Мазэ веранэз, визьнодась ӟеч сюлэмо, чидась, нылпи сюлэмъёсты валась, пиналэз кыӵе вань сыӵеен яратыны быгатӥсь луыны кулэ. Нылпиослэсь мылкыдъёссэс валан, секыт вакытэ соослы пыкет луон, сюлэм косэмъя ужан — со вань визьнодасьёслы тупась ӟечлыкъёс. Екатерина Григорьевнаез но анай-атайёс ӵапак сыӵе сямъёсыз понна гажало.

— Ог-огмылы вань ӟечсэ сӥзён, ог-огмес гажан — коллективамы ужанлэн инъетэз, — шуэ таланто визьнодась. — Татын котькуд ужась аслаз ужаз, тодон-валан но опыт сяна, сюлэм шунытсэ но понэ. Соин ик нылпи садын котьку шуныт но каньыл, дорын кадь.

Семья но нылпи сад — пиналлы юн пыкетъёс. Соос ог-огзэс утё ке, пинал ассэ оскымон шӧдэ, шудо будэ. Екатерина Григорьевна но анай-атайёслы оскемзы понна тау каре, угось ӵапак ог-огедлы оскон ик тупаса ужанлэн юн инъетэз луэ. «Быгатысалды-а асьтэдыз мукет профессиын адӟыны?» шуыса юамелы Екатерина соку ик «Ӧй быгатысал!» шуиз.

— Нылпи куараос, соослэн дугдылытэк юанъёссы, ӟыгыръяськонъёссы, пичи шумпотонъёссы тужгес но кельшо. Нылпи садын нуналлы быдэ луон — со уже мынон гинэ ӧвӧл, адямиослы астэ кулэен шӧдон, пиналлэн азьлань вамыш лэсьтэмезлы шумпотон, солы та вамышез лэсьтыны юрттэменым данъяськон. Ас интыяд астэ кулэен шӧдонлы ма вуоз?!

Шуг-секытьёсты вормыса

Визьнодасьлэн ужан нуналъёсыз огшоры гинэ уг ортчо, котькуд нылпилэн аслаз кужмо палъёсыз яке шуг-секытъёсыз вань.

— Ми та шуг-секытъёсты ум ватӥське, — шуэ Екатерина Григорьевна. — Соосты дыраз синйылтӥськом но чакласькыса гинэ юрттыны тыршиськом. Нылпилэн маиз ке уг пӧрмы ке — нылпи садлы дышыны уг быгаты, вераськонэз сӧриськемын, асваланэз кылдэмын ӧвӧл, вераськыны уг быгаты — таӵе учыръёсы семьяосын ӵош кылдэм ужпумъёсты сэрттӥськомы-пертчиськомы, нылпилы тупась луонлыкъёс утчаськомы. Анай-атайёс мед тодозы — котькыӵе шуг-секытъёсты, сюлэмшугъяськонъёсты нылпи садэ вайыны луэ — татынваньзэ ӵош сэрттомы-пертчомы.

Екатерина Григорьевналэн кузпалыз Андрей, бадӟымез Виктория нылыз 11-тӥ классын дышетске, Артём пиез 9-тӥ классын тодон-валан басьтэ, покчиез, куинь арес но укмыс толэзьем Максим пиез, нылпи садэ ветлэ.

— Семьямы огшоры улонэн улэ: урокъёс, школалы дасяськон, нылпиослэн юанъёссылы валэктонъёс сётон, шыпыт ӝытъёс...

Но огдыре огсыр каньыл улонмы воштӥськиз: Максим вордӥськем бере тодмо луиз, Андрей секыт висе шуыса. Мар чидаз семьямы та вакытэ, валаны быгатозы соос гинэ, кинъёс асьсэос сыӵе адӟон пыр потӥзы.

— Улон ялан идеальной уг луы вылэм, — верамез потэ чидась кышномуртлэн. — Но семьялэн юнлыкез шуг-секытъёслы пумитъяськыны юрттэ. Семья — со тодэ вайытон, кин понна азьлань мыноно но секыт вакытъёсы улоно шуыса.
Екатерина Григорьевна понна но семьяез, кузпалыз но куинь нылпиосыз — улонлэн валтӥсь ошмесэз. Ӵошен соос чиданлэсь пуштроссэ валало, жалясь но саклык висъясь луэмзылэсь бервылъёссэ адӟо. Ог-огдэ кылон, ог-огдэ валан, ог-огдэ гажан но ог-огедлы пыкет луон ӵапак дорысен кутске угось.

Этнокультурной визьноданъя уж

Ёросысь дошкольной учреждениосын этнокультурной визьноданъя системной уж нуиське. Ар ӵоже календарной но йӧскалык праздникъёс ортчо, калыкъёслэн лулчеберетсылы сӥзем тематической арняос радъясько. Нылпиос шумпотыса пырисько суредаськонъя, киужъёсъя конкурсъёсы, отын котькудӥз маде, кызьы адӟе аслэсьтыз вордскем шаерзэ: кинлэн ке вордскем шаерез ӵушкон вылэ пужыятэмын, кинлэн ке со песянайлэн кышетэз яке вордскем гуртэз. Ӵукна ик нылпиос калык кырӟанъёсты быдэсто, анай кылынызы кылбуръёс верало, экто, выжыкыл сценаосъя спектакльёс пукто.

Таӵе уж пиналъёслы пичи дырысенызы ик пӧртэм культураез гажан мылкыд пыӵатэ, анай кылынызы, ас калыксылэн историенызы тунсыкъяськон кылдытэ. Ӵапак та валатонъёс ик кылдыто лулчеберетэз но котырысь адямиосты гажан мылкыдэз.

Екатерина Григорьевна ӵемысь пыриськылэ йӧскалык киужъёсъя адӟытонъёсы, ярмаркаосы, мастер-классъёс сётэ. Визьнодасьёслэн алигес ортчем семинаразы со дышетӥз урод синлэсь утись удмурт чыртывесь лэсьтыны. Куноос солэсь небыт сямзэ, лякыт вераськемзэ но быгатонлыксэ синйылтӥзы.

Сӥзисько тӥледлы ӟеч ужады азинсконъёс, семьядылы тазалык но шудо улон, вуоно поколениослы лэсьтэм ӟеч ужъёсты асьтэлы но ӟечен мед берытскозы.