Кионъёс (Волки)

Вир кисьто калыкъёс ожъёсын,
Чигисько улонъёс сюрсъёсын.
Кионъёс сиён зын шӧдыса,
Быдэс уй калгыло вузыса.

Кӧня вир, кӧня выль ыбем сӥль!
Ӝуатско кионлэн синъёсыз!
Та одӥг лек ожлэн бервылыз.
Виисьёс - калыкъёс асьсэос.

Сьӧсьёслэн бадӟымзы, мӧйыез,
Адями вир зынэн кудӟыса,
Ветлонъяз куалектӥз но дугдӥз,
Вӧзысьтыз ӝуштэмез кылыса.

Сӧсырмем висьыса уйбыртэ,
Пыкъяське кызьпуэ киыныз.
Анай кадь жаляса егитэз,
Йӧтскылэ писпу вай мугораз.

Бӧрдыло жаляса егитэз
Котырысь сяськаос, турынъёс.
Возь вылын со ӧвӧл лысвуос -
Киськемын сьӧлыктэм синвуос.

Йыр кион ожчиез зынъялляз,
Паймыса со шоры учкылӥз.
Собере малы ке кескентэк,
Со кошкиз сӧсырез йӧтытэк.

Сӧсырлэн курадӟись шокамез
Шуккиськиз кионлэн сюлэмаз.
Кион ӧз, со ӧз йӧт, сак гинэ
Берытскиз, вамыштӥз палэнэ.

Ӟардон пал нош «муртъёс» вуизы,
Сӧсырмем егитэз учкизы:
Ӝыныя йырсазё солдатлэн
Осконэз ӧжыт вань улонлы.

Вуэмъёс солдатлэн мугораз
Ӟырдатэм шомполъёс бышказы.
Чидантэм тэльмыртэм беразы,
Та тӧдьы кызьпуэ ошизы.

Вир кисьто калыкъёс ожъёсын,
Чигисько улонъёс сюрсъёсын.
Кионъёс сиён зын шӧдыса,
Быдэс уй калгыло вузыса.

Кионъёс, ма...бен со кионъёс.
Кышкытгем кык пыдо пӧйшуръёс.

Василий Никитин.

Фото: vk.com