«Крезьгурен вырыку, лулыным шутэтскисько»

Виталий Фёдоровез Бадӟым Лӧзя II люкет но матысь гуртъёсын гинэ ӧвӧл, ёросысьтымы котькуд сэрегысь гуртъёсын тодо: баянэн но мызганэн усто шудэменыз, чебер кырӟанъёсты гожъяменыз со трос калыкез синмаськытӥз ини. Капчи, вольыт шудэменыз, сюлмысь кырӟаменыз, сценаын ассэ юн воземеныз со трос учкисьёсты бордаз кыскыны быгатӥз. Ма бордын та мызганчилэн но баянистлэн устолыкезлэн секретэз? Та но мукет юанъёс сярысь — Виталий Валентиновичен интервьюын.

— Виталий Валентинович, мызганэн шудыны быгатэменыды кин выжые кошкиллямды?

— Анае баянэн шудыны яратэ, соин мон пичиысен баян гурез кылыса будӥ. Ачим куинь аресысен анаелэсь баян курыны кутски. Мынам, шуисько, баянэн шудыны дышетскеме потэ. Анае валаз: пиезлы азинскыны луонлыкъёс кылдытоно.

— Куинь аресысен?..

— Озьы. Анае баянлы яратон пыӵатӥз. Со сяна, гуртамы Петров Иван нимо туж усто мызганчимы вань вал. Солэсь шудэмзэ синмаськыса учки: сокем капчи, чебер шудылӥз. Тӥни озьы та кык адямиос, асьсэос но сое тодытэк, мыным баянист луыны инъет кылдытӥзы.

— Нырысетӥ крезьгур инструментты кыӵе вал? Улэп на-а со?

— «Теза» шуыса нимаськись пичи гинэ арган вал со. Али но вань, мон сое утьыса возисько. Мыным сое ӵектӥз но басьтыса вайиз Василий Арыков. Шумпотонэ вал соку! Мынам крезьгурез валанэ вань (слух), соин шудыны дышетскыны но секыт ӧй вал. Ӵукна вазьгес султыса баянэным шудылӥ. Эшъёсы урокъёс бере урамын шудо — нош мон весь баянме кыскасько. Шулдыр пичи дыръёс…

— Баянэн тунсыкъяськонды аръёс ортчыса ӧз кысы — будӥз гинэ, умойгес шудыны дышетскон понна крезьгуръя школаын но дышетскиды.

— Озьы. 5-10 классъёсын дышетскыку, Балтасьысь крезьгуръя школаын тодон-валан басьтӥ, баянъя классэз йылпумъяй. Отын тодон-валан басьтон вакытам рос-прос шудыны дышетски, быгатонлыкъёсме волятӥ. Дышетӥсе Гарипов Наиль Назипович тросэзлы дышетӥз. Арысь аре баянлы яратонэ юнмаз гинэ. Та аслам кулэ кареме бордын но, дышетӥсьёслэн тыршемзы бордын но шуыса малпасько. Школаез йылпумъяме бере но улонме крезьгурен герӟаме потӥз. Соин 2003-тӥ арын Елабугаысь лулчеберетъя училищеысь оркестръя отделение дышетскыны пыри.

— Тодон-валан басьтӥды ке но, ӧнердыя трос ӧд ужалэ…

— Шонергес вераса, одӥг ар гинэ ужай. Ӟаныын (соку отын крезьгуръя школалэн филиалэз вань вал — Н. Ж.) нылпиосты баянэн шудыны дышетӥ. Но уж бырем бере, сварщиклы дышетски, со ужен вырыны кутски.

— Крезьгуръя училищеын дышетскемды юнме луиз шуыса ӧд малпалэ-а?

— Озьы ӧй малпа. Бен, мон туннэ нуналозь асме пӧртэм интыосын эскери ини — сваркаен вырон сяна, гынсапег лэсьтон фабрикаын тырши, «Сурнай» колхозын но ужай, али тани Казаньысь гидрометеоцентрлэн филиалаз но ужасько. Но улонме крезьгурен, крезьгуро инструментъёсын герӟаме сярысь ноку ӧй жаля. Баян мынам сюлмам. Мон сое ноку ӧй вунэты но уг вунэтӥськы, дыры луыку, весь шудыны тыршисько.

— Репертуарды паськыт-а? Кыӵе кырӟанъёсты ӵемгес быдэсъяськоды?

— Кызьы верай ини, мынам крезьгурез валанэ умой. Соин кыӵе кырӟан куризы, сыӵезэ быдэстыны быгатӥсько. Репертуарам вань пӧртэм кырӟанъёс — ӟучъёсыз но, удмуртэз но; шулдырез но, ӝожъёсыз но. Тросэз соос пӧлысь яратон, улон-вылон сярысь кырӟанъёс. Ӵапак сыӵе темаос калыклы матын луо ук, городын яке гуртын улэмез шоры учкытэк. Нош кыӵе кырӟасьлэн яке инструментэн шудӥсьлэн валтӥсь ужез? Кырӟанэз яке гурез кылзӥсьлэн сюлэмаз вуттон, солэсь мылкыдъёссэ бугыртон.

— Котьку пӧрме-а кылзӥсьёслэсь мылкыдъёссэс бугыртыны?

— Та юанэз кылзӥсьёсылы сётоно, дыр. Но оскисько, пӧрме, дыр, шуыса. Со ведь адями бордын но луэ. Кылсярысь, лыктэ со концертэ, нош йыраз солэн кыӵе ке ужъёсыз сярысь малпанъёс — та учыре со копак крезьгур дуннее пырыны уз быгаты. Куке со капчи мылкыдын луоз, соку гинэ сюлмыныз крезьгурез, кырӟанэз, эктонэз шӧдыны быгатоз. Мон тазьы малпасько. Туннэ нуналэ ачим Ӟаныысь «Шулдыр ӝыт» ансамбльысь мызганчи луисько. Коллективен выступать карисько бере, тросгес калык кырӟанъёсты шудӥсько. Соку ини баянэн ӧвӧл, мызганэн шудӥсько — баянлэн крезьгур поттон ласянь быгатонлыкъёсыз тросгес ке но, удмурт калык гурез мызган кадь нокыӵе инструмент чебер карыса вуттыны уз быгаты.

— Концертъёсы яке мукет кыӵе ке лулчеберетэн герӟаськем ужрадъёсы пыриськыкуды, тӥ баянэн яке мызганэн шудӥськоды, нош тӥляд куарады но чебер ук — ӵапак сценаысен кырӟамон. Нош кыӵе чебер кырӟанъёсты гожъяськоды!

— Дышетскеме юнме ортчымтэ, дыр. Кырӟаны мон, зэмзэ но, туж яратӥсько. Фортепианоен но шудыны быгатӥсько бере (ачим кулэ карыса шудыны дышетски), дыры луыку, кырӟанъёс но гожъясько. Жаляса вераны кулэ, дыр гинэ ӵемысь шедьтыны уг луы. Асьме котырысь гуртъёсын ортчись праздник ужрадъёсы — сюанъёсы, армие келян но армиысь пумитан ӝытъёсы, гуртысь шулдыръяськонъёсы пыриськыку — кырӟасько но. Кырӟаса, сюлэмме буйгатӥсько.

— Лӧзя палан мызганчиос чиньыен лыдъямон бере, тӥледыз сыӵе ужрадъёсы ӵемысь ӧтьыло, дыр.

— Мызганчиос ми палан, зэмзэ но, ӧжыт. Милям гуртамы, кылсярысь, мон гинэ. Та туж малпаськытӥсь югдур — егитъёс мызганэз кулэ уг каро. Вань егитъёс сярысь вераны уг дӥсьтӥськы, малы ке шуоно Ӟаны но Ципья палан соос вань али. Но ми палан сыӵеос ӧвӧл ни. Шудыны дышетскыны кутскизы ке но, тунсыкъяськонзы ӝог ортче. Аслам но кык пиосы вань. Валерий 7-тӥ классын дышетске, нош Артём — 3-тӥ классын. Покчиез ӧжыт шудыса курадӟе, азьпалан мар луоз — адӟом. Мызганчиосмы луымтэысь, мон асьме палась гуртъёсын ачим шудыны тыршисько. Вӧйдыр праздник, кылсярысь, монтэк уг ортчы. Но туж умой луысал, мызганчиосмы тросгес ке луысалзы. Мызган ведь удмурт калыкез азьло дырысен шулдыртэм, вань уродэз сярысь вунэтыны, ужъёслэсь огдырлы ке но палэнскыны юрттэм. 

— Виталий Валентинович, тӥ туж шаплы но тыршись воргорон. Туннэ нуналэ кӧня ке интыын ужаса вутскиськоды, дорады пудо но трос вордӥськоды. Кызьы ваньмаз вутскиськоды, кытысь со ӝутскем мылкыдды?

— Жадён дыръёс луыло котькинлэн кадь ик. Но мынам юн кужыме, бадӟым осконэ вань — семьяе. Анае, кык пиосы, Светлана кузпалы понна улӥсько но тыршисько. Соос ик монэ бурдъясь адямиос. Соос понна ужасько, нош крезьгурен вырыку, лулыным шутэтскисько, кужым люкасько. Котьку озьы мед луысал.

— Вераськемды понна бадӟым тау. Туннэ кадь ик, котьку крезьгурен артэ вамышъяса, калыкез шулдыртыса улыны мед кылдоз.