Мылкыдэз ӝутӥзы, сюлэмез шумпоттӥзы

Ёросын но ёросъёсысь вань гуртъёсын сямен нимысьтыз ужрадъёс но пумиськонъёс радъяськизы. Шумпотымон, таӵе ужрадъёсы арлыдоосмы мылысь-кыдысь пырисько.

– Туэ Ӟаны гурт поселениысь арлыдоос понна туж шулдыр но узыр праздник радъязы. Вань мӧйыосты Тюнтер гуртысь выльдэм столовое ӧтчазы. Чебер залын нимысьтыз узыр ӝӧкъёс дасяллям вал. Ческыт сиён-юон сяна, Ӟаны но Тюнтер лулчеберетъя юртъёсысь ужасьёс концертной программаен шумпоттӥзы. Мылкыдэз ӝутӥсь кырӟан-эктонъёс сюлме пырыса кылизы. Ма, мар кулэ на милемлы, арлыдоослы? Одӥг шуныт кыл гинэ но кыӵе сюлмез каньыл каре! Таӵе тодэ кылись нуналэз радъямзы понна «Дуслык» возёслэн кивалтӥсезлы Николай Колоколовлы, Ӟаны гурт поселенилэн главаезлы Юрий Перфиловлы, вань радъясьёслы, юрттӥсьёслы тау кариськом. Азьланяз но тыршыса быдэстэм ужъёсты бервыло мед луозы. Милемлы шумпотон нунал кузьмамды понна бадӟым тау, – шумпотон мылкыдъёсынызы люкиськизы Ӟаны гурт поселениысь арлыдоос.