Нылпи вордонлэн секретъёсыз

Та дуннее адями ӟеч ужъёс лэсьтыны вордске. Нош адямилэн улонэз туж вакчи ук. Со дыр куспын одӥг-кык ӟеч уж лэсьтӥд ке но, тон умой адямиен лыдъяськиськод. Кызьы верало, улонамы одӥг ке но писпу мерттоно, корка пуктоно, нылпи вордоно. Нош нылпиос семьяын кӧня луыны кулэ, созэ ини котькудӥз ачиз тодэ. Мынам малпамея, макем трос нылпи, сокем тупаса но огкылысь юрт котырын ужъёсты ужаны луэ. Но со понна анай-атайлы трос гинэ кужым пыртоно, визьмано но ужаны дышетоно аслэсьтыз мусо нуныкайёссэ.

Мон будон вакытэ Вукогуртын но куинь-ньыль яке солэсь уно нылпиен семьяос трос вал. Милям анай-атаймылэн но ми сизьым кузя будӥмы. Мусо анаймы милям куинь аресэн сирота кылем но сюранай дорын будэм. Солэн сюлмыз зарни но котькинлы юрттыны дась вал. Сизьым классэз йылпумъяса, секыт аръёсы колхозэ ужаны пырем но отысен ик пенсие потэ. Педагогикая но психология книгаосты ӧз лыдӟы ке но, со милемыз котьку умоезлы гинэ дышетӥз. Али кадь пель сьӧрам анайлэн дышетэм кылъёсыз: муртлэсь веньзэ но эн лушкалэ, мар сиемды потэ, мон ачим басьто. Вӧсь книгамы дорын ӧй вал ке но, анай озьы шуоз вал: «Одӥг бамады чапкизы ке, кыкетӥзэ ачид чапкыны пукты». Озьы, пе, Инмар косэ, шуоз вал со. Туала пиналъёс таӵе кылъёсты верад ке, серекъяса, пумит луозы. Нош мыным соку анайлэн верам кылыз туж шонер но самой дуно потэ вал.

Собере бадӟым семьяын пичиосыз нылпиос быдӟымъёсызлэсь ужлы дышетскыса будо. Милям но самой быдӟымъёсыз — Мария апаймы, Зина апаймы — милемлы, покчи сузэръёссылы, визь-кенеш сётӥсь но котьку юрттыны дась луизы. Жаляса верано луэ, милям Зина апаймы секыт висьыса кулэмын ини. Но солэн дышетыса верам кылъёсыз котьку сюлмам уло на. «Катя, корка пуштэ котьку чылкыт возь, — шуоз вал со. — Анайлы быгатэмедъя юртты». Али гинэ вал кадь, кызьы гужем каникул дыръя со монэ Лазаревкае нырысетӥ нылпизэ возьманы нуиз. Соку верам кенешъёссэ но мон котьку тодам возисько.

Мария апае туннэ нуналэ Башкириысь Янаул ёросысь Шудек черкогуртын улэ. Со милемлы, вань сузэръёсыз понна, али анай кадь ик матын.

Мария апай, Савали техникумез йылпумъяса, Башкирие вуэ, Шудек школаын удмурт кылъя но литературая дышетэ. Отын ик Федя кырсиен тодматске но семья кылдытэ. Куинь нылпизы соослэн: кык пи но Вероника нылзы. Пиоссы будыку, апай, Бирскысь пединститутэз йылпумъяса, химияя но биологияя дышетӥсьлэсь дипломзэ басьтэ. Шудек школаын пенсие потытозяз химия предметэз дышетэ но пришкольной участоклэн кивалтӥсез луэ. Умой ужамез понна трос ушъян грамотаосыз вань солэн. Дышетӥсь-методист, «Башкортостан Элькунысь Калык дышетонысь отличник» нимен пусъемын апае.

Дышетӥсьлэн семьяяз нылпи вордон — со секыт уж. Дышетӥсь вань кужымзэ сётэ школаысь дышетскисьёсызлы. Аслаз нылпиосызлы туж ӧжыт кыле дырыз. Озьы ке но апаелэн нылпиосыз туж визьмоесь но ужасесь луыса будӥзы. Вова но Владик пиосыз Ижкарын агрономлы дышетскыса потӥзы. Улон сюрессы анайзылэн ӧнереныз герӟаськиз. Вова ОБЖ-я но технология дышетӥсьлэсь ӧнерзэ басьтыса ужа, нош Владик пиез али дыре — Шудек школаын директор. Кык пиосызлэн ик кык вылӥ тодон-валан басьтэмзы сярысь дипломзы вань. Кыксылэн ик семьяязы трос нылпиоссы будо: Вовалэн — куинь пиос, Владиклэн — кык пи но одӥг ныл. Владиклэн Илья пиез но Милана нылыз ини, вылӥ тодон-валан юртъёсын дышетскыса, дышетӥсьлэсь ӧнерзэ басьтыса, школаын ужало. Вероника нылызлэн но аслаз семьяез вань. Соос Лёня кузпалэныз кык пиосты будэто. Вероника Ижкарын журналистикая факультетэз йылпумъяз. Улонзэ герӟаз нылпи садын воспитатель луыса ужанэн. Со ужлы но дышетскемын. Вероникалэн Игорь пиез Ижкарын лулчеберетъя колледжын дышетске. Туннэ нуналлы апае аслаз нылпиосызлэн но внукъёсызлэн ужъёсынызы но соослэн вормонъёсынызы данъяськыса улэ.

Нылпиосызлы шонер сюрес возьматыны быгатэменыз апае милемлы но пример луиз. Ассэ но нылпиосыз нуналлы быдэ кадырласа, небыт кылынызы но юрттыса улэменызы шумпотто. Озьы ик луоно ини со. Пинал дыръя анай-атай нылпиоссэ будэтыны сюлмаське, нош соос пересьмизы ке, нылпиослы сюлмаськоно. Нош туала улонэз ке учкид, котькуд семьяын озьы ӧвӧл со. Ми будыку, социальной ужасьёс ӧй вал. Школаын обществоведение урокын ми тодматскимы конституция кылэн. Отын гожтэмын вал, анай-атайёс нылпиос сярысь сюлмасько, нош соос пересьмизы ке, нылпиос анай-атайзэс утьыны кулэ шуыса. Кытчы ышиз со вакыт, малы сое вунэтӥзы туала пиналъёс? Нылпи вордэм адямиосты соцработник уте, яке пересь коркан улыса та дуннеен люкисько кудъёсыз пересьёс. Малы со озьы? Паймисько…

Мон сямен, нылпиоссылы шонер улон сюрес возьматыны быгатэм анай-атайёсты пересьмон дауразы пиналъёссы уз куштэ, соос котьку сюлмаськозы асьсэлэн самой  дуно адямиоссы сярысь. Мынам Ципьяын улӥсь Рита апаелэн семьяяз но куинь нылпи будӥз. Нош али дыре солы куинь быдэ вуымтэ внукъёссэ но будэтыны тупа. Вань кужымзэ поныса, Рита апай тырше та пиналъёсты дышетыны но сюдыны, дӥсятыны. Инмар солы кужым мед сётоз та нылпиосты будэтыса шонер сюрес вылэ султытыны. Анай сюлэм ведь котьку ас нылпиосызлы но внукъёсызлы ӟечсэ гинэ сӥзе. Соослэн улонзы каньыл мед луоз шуыса, ассэ но уг жаля куддыр. Кадырзэ гинэ мед тодозы вал Рита апайлэн внукъёсыз но.

Веранме азьланьто на Галя сузэре сярысь. Со, Гена нимо Кушкет пиен семья кылдытыса, вить нылпи будэтӥз. Нылпиосыз пӧлын быдэ вуыса дорысьтыз кошкемез но вань ини. Кык пиосыз дораз уло. Картэз вазь кулӥз, нылпиосызлэсь будыса вуэмзэс но ӧз адӟы. Озьы ке но Галя вить нылпизэ туж тыршыса, ӟеч адямиос карыса будэтӥз. Пиосыз скал но кыско, соосты сюдо-утялто но. Анайзы доразы ӧз ке луы, сиён но асьсэос пӧзьто. Анайзы сярысь сюлмаськисесь но котьку юрттыны дасесь сузэрылэн нылпиосыз. Со возьматэ, Галя аслэсьтыз нылпиоссэ шонер визьнодам шуыса. Котьку солэн нылпиосыз милемыз, ӵужапайёссэс, ӟыгыртыса но шумпотыса пумитало, туж матын каро. Пересьмон дауразы нылпиоссылэсь ӟечсэс адӟыса улӥсь анай-атайёс — со туж шудо адямиос.

Аслам нылпиосы но мынам кык кузя: ныл но пи. Мон но асме шудоен лыдъясько. Пие дорамы улэ. Котьма ужын — со мынам юрттӥсе. Ас мылкыдэзъя юрт лэсьтонысь  пиосмурт ужъёслы дышиз. Корка лэсьтоно-а, мунчо-а яке корка пушкысь уж-а — ваньзэ быгатэ. Сайдинген, профнастилэн ужъёсты но ужаны тодэ ини табере. Асьме коркамылэсь ог люкетсэ огназ ремонт кариз. Шумпотӥмы ваньмы, чебер луиз корка пушмы. Аслэсьтыд нылпидэ ачид эн ушъя, шуозы куд-ог лыдӟисьёс. Мон муртъёслэсь но пие сярысь ӟеч кылъёс кылӥ ини. Нылы но, семья кылдытыса, куинь нылпи вордэ. Соослэн туннэ улонзылы шумпотӥсько.  Азьланяз но умоен мед мыноз улонзы. Песяй-бабаенызы ӵошен уло соос. Нылы озьы шуиз: «Турлы дыр луоз, но мынам сюлмы каньыл, нылпиосы песяеныз кылизы шуыса». Туж шонер кылъёс та. Мария туклячие мынэсьтым нылме ас нылзэ кадь адӟе, куспазы тупаса уло, инмарлы тау. Туала егит семьяос асьсэ коже улыны тыршо.  Быгато ке, мед улозы. Но, мон сямен, мӧйыослэн но егитъёслэн кусыпсы котькуд семьяын умой ке луиз, пичи нылпиос но ӟечлы дышо. Мон ачим но кузпалъяськем дырысен бадӟым семья пушкын улӥ. Кык песяй, бызьымтэ апай, берлогес картэлэн сузэрыз пиеныз бертӥз. Ми дорын, лыдъяд ке, соку ньыль семья улӥз. Улыны тупаз тямыс но укмыс кузя одӥг коркан. Нылпиос понна огпол но керетон ӧз поты милям. Гуртысь нылкышноослэсь кылылӥ: Катя — со каньыл адями, умой улозы. Мынам анайзые мыным котьку нимын гинэ вазиськылӥз. Кулон азяз но: «Туж бадӟым тау тыныд монэ утемед понна», — шуиз. Табере Зоялэн (картэлэн сузэрыз) но, мынам но нылпиосы быдэ вуизы ини. Но кызьы ми пичи дыръязы дышетӥм «агай» шуыны быдӟымъёссэ, озьы али но вазисько ог-огзылы. Самой матысь адямиос луо соос куспазы но. Мынам ушъяськеме уг поты, но кызьы вань, озьы ик гожтӥ. Азьланяз но Зоялэн но мынам нылпиосы тупаса но ог-огзэс гажаса мед улозы.

Анай-атаймылэн куать нылъёс пӧлын берпуметӥез луыса вынмы вордӥськиз. Мария апай вера, мон сое пичи дыръяз, пе, тыбырам пуктыса нуллӥ. Ма, ваньмылы но утьыны кылдӥз ни сое анай-атаймы ужын дыръя. Юра вынмылэн но туннэ нуналэ куинь нылпиосыз будыса асьсэлы семьяос кылдытӥзы ини. Куинь внукез но вань ини. Зина апаелэн Андрей пиез но Валя кышноеныз кык нылпи будэто. Одӥг нылпиен кылемын милям Люба апаймы гинэ. Со туж кыдёке кошкиз та палась: Байкал ты палан улэ али дыре.

Та малпанъёсы кылдӥзы «Азьлане» газетлэн 20-тӥ толшоре потэм номерысьтыз «25 толшор — Татьянаослэн нуналзы» нимам статьяез лыдӟем берам. Статьяез лыдӟем бере туж шумпотӥ: асьме дыре но вань вылэм на куспазы туж тупаса улӥсь семьяос. Пор-Кутешысь Трофимовъёслэн семьязы трос пинал семьяослы но мӧйыослы адӟем карымон уло. Соос ымнырзыя ик ваньзы туж визьмоесь но сайкытэсь адско. Азьланяз но таӵе семьяос медаз быре вал. Семьяын тупаса улыны дышем адями котькинэн умой кусып возьыны быгатоз, котырысь адямиосты но гажаны тодоз.

Екатерина Иванова, Вылын Ушма гурт