Тунсыко, пайдаё, узыр ужрад

Та толэзе удмуртлыкмес юн гажасьёс, яратӥсьёс паськыт пусйизы нырысетӥ удмурт нылкышно гожъясьлэсь, сӥё-дано врачлэсь Ашальчи Окилэсь вордскемез дырысен 125 ар тырмонзэ. Палэнэ ӧз кыле Балтач ёросысь удмуртъёс но. Кылсярысь, 20 оштолэзе Россиысь Герой О.Н. Исаев нимо Ӟаны шоръёзо школаын, дано удмурт нылкышно кылбурчилы сӥзьыса, удмурт дышетӥсьёслэн бадӟым семинарзы ортчиз. Нялтас вераны кулэ, Ӟаны школа зол дасяськем та ужрадлы.

Лыктэм бере ик, куноосты ческыт чаен но табанен куноязы. Возьматэмын вал кык урок, кык мастер-класс, школаысь «Даур куара» шаертодон музее экскурсия радъязы (кылем арын школа грант утӥз, со коньдонэн музей выльдэмын). Экскурсоводъёс музей люкетъёсъя туж тунсыко вераны тодо. Бератаз дышетскисьёс но дышетӥсьёс Ашальчи Окилэн но мукет удмурт гожъясьёслэн произведениоссыя бадӟым концерт пуктӥзы, юбилярлэсь улон сюрессэ тодэ вайизы, солэсь творчествозэ данъязы. Концертын кырӟан-а со, кылбур веран-а, эктон-а, сценка шудон-а, мунё театр-а — ваньмыз туж усто быдэстэмын вал. Концертэз нуизы Олеся Васильевна Яковлева но Анна Витальевна Смердова, сое дасянэ трос кужымзэс понӥзы классэн кивалтӥсьёс но Виктор Павлович Камаев.

Нырысетӥ классын удмурт кылъя урок возьматӥз трос аръёс ӵоже покчи классъёсын ужам, бадӟым опытэн дышетӥсь Лидия Аркадьевна Асакова. Солэн урокез кылъёсты ёзъёслы но чурысь чуре выжтонлы сӥземын вал. Дышетӥсь пиналъёслы, пӧртэм амалъёсты кутыса, темаез туж валамон валэктӥз, пиналъёс соин ужъёсты шонер быдэсъяллязы. Урок Ашальчи Окилэн творчествоеныз герӟаса дасямын вал. Но жаль, пиналъёс удмурт кылын вераськыны шугъяськогес, соин ик дышетӥсьлы секыт ужаны. Мукет школаосын но сыӵе ик югдур вылэм. Бен, дышетон нокытын капчи ӧвӧл. Шӧдске, анай-атайёс удмурт кылэз туж ик кулэен уг ни лыдъяло, доразы нылпиосынызы ӟучен верасько. Янгышало анай-атайёс, удмурт нылпиосмы удмуртъёс пӧлын улыса, кык куко юбоос кадь медаз луэ вал. Анай-атайёс малпало, лэся, нылпи ӟучен тодӥз ке, усто дышетскоз, математикаез, физикаез, химиез ӟеч тодоз, профессор луоз шуыса. Усто дышетскон — со ӟуч кыл тодэм бордын гинэ ӧвӧл. Зэм, ӟуч кылэз но туж ӟеч тодоно — со асьмелэн дышетскон кылмы, сотэк вамыш уд лэсьты. Но тани басьтом город школаосысь дышетскисьёсты, кудъёсаз быдэсак ӟучен верасько. Малпаськоды, соос ваньзы «4»-лы но «5»-лы дышетско? Ваньзы вузъёсы пыро? Воксё ӧвӧл! Азьло удмурт кылэз тодэм пиналъёс ик, школаын ӟеч тодон-валан басьтыса, пачкаен-пачкаен вылӥ дышетскон интыосы пырылозы вал. Ашальчи Оки но удмурт кылэз ӧй ке тодысал, со сярысь та дырозь тодӥсь-марасьёс ик ӧй луысалзы ни. Ашальчи Окилэсь кылбуръёссэ удмурт кылын лыдӟон понна ик, француз профессор Жан-Люк Моро удмурт кылмес дышетске, собере аслаз француз кылаз берыктылэ но соосъя кырӟанъёс кылдытыло. Нош асьмеос ыме понэмзэ но сялӟиськом, удмурт кылмес бырйытэк, вордскем кыл интые мукет кылэз бырйиськом. Асьмеос асьмелы ик пумит луимы ке, кыӵе калык асьмеды гажалоз?.. Ас дышетон даурам ӟучомем удмурт нылпиосты но дышетылӥ. Тани одӥгез Павлов Александр Киров улосысь бертӥз, удмурт кылэз чик уг тоды вал. Нырысь ми дорын дышетскиз, собере Ципья школаын. Мукет предметъёсын «5»-лы дышетскем бере, мон солы удмуртэн но четвертьёсы «5» поттылӥ: дышетскисьлы мылкыд мед луоз. Кылем арын ВК-ын удмурт сямен комментарий гожтӥз. Пайми! Янгышъёстэк! «Ма, Саши, удмурт кылдэ городын улыса но воксё вунэтымтэед ук», — шуисько. «Кызьы вунэтод анай кылэз, тани точкаосын букваос кулэ вал», — ответ гожтӥз со мыным. Кызьы верай ни, ужан сюресам мукет ӟучомем пиналъёс но вал.

Кыкетӥ урокез «Глагол» темая дасям удмурт кылъя но литературая ёросысь одӥгез устоез дышетӥсь Римма Николаевна Петрова. Римма Николаевналэн 6 классын урокез быдэсак Ашальчи Окилэн творчествоеныз герӟаськемын шуид ке, уд янгыша, дыр. Урок туала дышетон технологиосты кутыса дасямын вал. Тужгес тунсыко потӥз тылобурдоослэсь кырӟамзэс возьматӥсь глаголъёсын уж: ӟольгыри ӟильыртэ, кикы силе, уӵы чирдэ, атас чоръя, коӵо кыӵыртэ но мукет. Нош кыӵе сяська со Ашальчи? Ашальчи — со ӟуч сямен зубровка, ятрышник, ческыт зыно сяська.

Римма Николаевна кыл волятон бордын тырмыт ужа, удмурт кылын Лидия Аркадьевна кадь ик, чылкыт вераське, кыкназы ик УдГУ-ысь удмурт но ӟуч отделениез йылпумъязы. Но та классын но удмуртэн ӵемтылӥсьёс вань.

Мастер-классъёсты покчи классъёсын вылӥ категориен дышетӥсь Галина Борисовна Евдокимова но школаысь директорлэн дышетон ужъя воштӥсез, удмурт кылъя но литературая дышетӥсь Олеся Васильевна Яковлева возьматӥзы. Галина Борисовналэн темаез «Кыл берыктон дуннеын» нимаськиз. Семинаре пыриськемъёс Ашальчи Окилэсь кылбуръёссэ ӟуч кылэ берыктыны дышетскизы, туж тыршизы. Ёросысь йӧскалык (национальной) дышетонъя методист Фидания Табрисовна Сабирова но кылбурчилэсь «Лулы мынам» («Душа моя») кылбурзэ ӟуч кылысь бигер кылэ берыктӥз. Бигер кылын но чебер кылӥськизы кылбур чуръёс. Вералом на, Ашальчи Окилэн «Сюрес дурын» кылбурезлэн одӥг ньыльчурез «Татар теле 3» учебнике но пыртэмын вал.

Кыкетӥез мастер-класс текстъёслы сӥземын вал. Олеся Васильевна текстъёсын ужаку, дышетонын туала выль амалъёсты кутыны дышетӥз. Дышетӥсьёслы солэн возьматэмъёсыз туж тунсыко потӥзы.

Ужрад тунсыко, узыр пуштросъемо вал, малпасько, пайдаез но одно ик луоз.

Ашальчи Оки (Векшина Акулина Григорьевна) асьмелэсь палэнын, Удмурт шаерысь Грах ёросын ке но вордскиз, асьмелы со матын. Малы ке шуоно со Карлыган (Ӟаны починка) Шор удмурт школаын дышетскиз, отысь дышетӥсь луыса потӥз. «Карлыган школаын мыным умой вал. Интернатын улӥмы. Эшъёсы умоесь вал», — гожтэ со.

1916 арын Елабугаысь епархиальной учительской семинарие экзамен сётэ но дышетӥсьлэсь нимзэ басьтэ. 1913-15 аръёсы Вылын Субаш крашин гуртысь школаын удмурт ныл Акулина Григорьевна Вӧсь инъетэз дышетэм. Вылын Субаш гурт соку Кушкет но Кушкетбаш нимын ветлэм. Та сярысь гожтэмын Балтач ёрослэн энциклопедияз. Соин Кушкетын дышетэм шуэмысь, та гуртэз удмурт Кушкетэн сурало. Субаш школаысь шаертодон музеязы Ашальчи Окилы сӥзем сэрегзы но вань. Кыӵе ке Окыльна нимо ныл Пор-Кутеше но вуылэм, ӵош вуэ пыремзы сярысь вералоз, пе, вал Андреев Кузьма Андреевич (Куши Кузьма агай, 1900 арын вордскем). Нош Кутэшысь ик Трофимов Пётрлэн атаез Владимир (1898) вералоз, пе, вал, милемыз Окыльна апай дышетӥз шуыса. Но, Окыльна но Владимир огъёзоос, сое апай шуымон ӧвӧл. Мазэ веранэз, Карлыган котырысь удмурт гуртъёсы Ашальчи Оки вуылытэк кылььымтэ, луоз. Оло ӵош дышетскем эшъёсыз вал. Тани милям гуртысь Петрова Пелагея Григорьевна (1901) но Карлыганын дышетскем. Оло, соос но ог-огзылы тодмоесь вал?..

1919 арысен Акулина Векшина Казаньысь рабфакын но отысь ик университетын медицинской факультетын дышетске. 1928 арын врач-окулистлэсь дипломзэ басьтэ, Удмуртиын трахомаен нюръяське. 1930 аръёсын Ашальчи Окилы гожъяськон ужен вырыны эрик уг сёто: «калык тушмон» ним ляко, юнме шорысь солы кӧня допросъёсы ветлыны тупа, пытсэтын но пуке. Соку со тыпак 1956 арозь гожъяськемысь ик дугдэ. Жугиськон кутскем бере, хирург луыса, войнае ӧтё. «Отё бере, мыным оско», — шумпотэ со. Но «калык тушмон» шуыса бышкисьёс война дыръя но шедьыло. Ижевскысь нылкышно замполит врач вераллялоз вылэм: «Маке со луиз ке, ми тодӥськом тынэсьтыд кин луэмдэ». Война дыръя ӟеч ужъёсыз понна ӵектэмын луэ «Красная звезда» орденлы, «За отвагу» медаль сёто. Ашальчи Оки берло Алнаш ёросысь больницаын тырше. Ужзэ вылӥ дунъяло: «УАССР-ысь сӥё-дано врач» ним сёто, «Знак Почёта» орденэн пусъё.

Ашальчи Окилэн кылбуръёсыз, соосъя гожтэм кырӟанъёс кема улозы калык пӧлын, малы ке шуоно соос калык сюлэмлы матынэсь.

Семинаре пыриськемъёслэн нимынызы дирекцилы, котькуд дышетӥсьлы но мукет ужасьёслы бадӟым тау!

Василий Никитин,

Карек-Серма гурт