Валлэсь арзэ келяса...

Мынам кулэм атае кема аръёс ӵоже «пожарнойын» ужаз. Отын нимысьтыз куинь вал кутӥзы. Али син азе ик пуктыны шуг: кыӵе ке гуртын тылпу потӥз ке, уробое интыям киын ужатоно насосэн, одӥг бекче вуэн, валъёсты кужмо улляса, отчы кошкозы вал. Соин ик дышетскыны мынытозям ик мыным но валъёс котырын вырыны тупаз. Эшъёсыным ӵош со валъёсты ошмесэ люктаны ветлытӥмы. Кызьы гинэ ветлытӥмы али: черодэн, вожмаськыса, ӵошатскыса. Пичи пиос понна вал вылын ворттылон одӥг «экзотика» ук со.

Ньылетӥ классэз быдтэммы бере, колхозлэн председателез Гордтикон Миколай агай правление ӧтьыса, валъёсты кутьые поттыны ӵектӥз. Колхоз валъёс гидын кыллё, возьманы адями, пе, ӧвӧл. Тодам на, бухгалтерлы вераса, быдэн 10 манет аванс но сётытӥз. Тӥни со аре гужембыт сямен черодэн, кык ӵошен вал кутьы возьмамы.

Нош тужгес но вунонтэмез, шулдырез но тунсыкоез чумолё кыскан луэм, дыр. Туала егитъёс, пиналъёс понна «чумолё кыскан», «чумолё портӥсь», «межес», «межес гозы» шуэм кылъёс валантэмесь, дыр. Со дыре кусоен турнам турынэз куасьтыса, чумолёосы сюрыса, чумолёосты валэн кыскаса, возь вылэ ик кабанъёсы яке скирдъёсы сюрылӥзы. Тӥни соку ми, пичи пиос, «трактористъёс» интыын вал. Таӵе учырез уг вунэтӥськы: бригадир нырысетӥзэ чумолё кысканы ӧтиз, вал сиесэз Ларван Гори агай дорысь басьтод, пе. Вазь ӵукна ик Гори агай доры пыри, сиес кури. Соиз лапас улысьтыз поттыса сётӥз, мынэсьтым вал чыртые сиес поныны курадӟемме учкыса сылэ, пальпотэ. Мон сиесэз озьы но, тазьы поныны курадӟи, мырдэм пишмытӥ кадь. Нош Гори агай, пальпотэм гинэ ӧвӧл, серекъяны кутскиз, утёд ке, мон сиесэз мыдлань понӥськем вылэм.

Чумолё кысканлэн но аслаз «секретъёсыз» вань. Татын вал, чумолё портӥсь но вал вылын пукись ог-огзэс валаны кулэ. Тон валэныд, кузь гозыен, межесэн чумолё доры лыктӥськод, сое котыртӥськод, нош чумолё портӥсь чумолё ултӥ межесэз донгыса лэзе, вылтӥз гозы кыске, ӝикатэ но думыса понэ, тон каньылэн гинэ валдэ интыысьтыз вырӟытӥськод но скирд доры кыскиськод. Валэд сабырлы ӧз ке луы, чумолё портӥсь межесэз чумолё шортӥ ӧз ке донгы, тод но ул, чумолёед скирд доры мыныса уз вуы, ӝыны сюресын бекмыльскоз, ваньзэ выльысь ужаны тупалоз. Соин ик чумолё портыны опытсы луэм арлыдо нылкышноосты тодмояло вал. Мыным, кылсярысь, Матран кенак чумолё портэ вал. Туж быгатэ вал чумолё портыны. (Интыез узьмагын мед луоз).

Лумбыт пӧсь шунды улсын чумолё кыскамы ке но, жадён шуонэз тодӥсь луымтэ, дыр, ини. Кушкет возь вылысь, Кушкет межа дорысен вал вылын ӵошатскыса бертылӥмы. Валъёс вортто, сьӧрын гозые дэмӟытэм межесъёс тузон пурӟыто. Малпано ке, жадем валъёсты ӧжытак жаляны кулэ луэм, дыр. Со сяна, сюрес кузя кыстӥськись межес вал пыд улэ пырыны, шудтэм учыре вуттыны но быгатэ ук. Ӧвӧл, со сярысь йырамы лыктымтэ ини.

Нуназе ужамтэ валъёсты, толэсъёсты вал кутьыын возьмам сяна, ужась валъёсты уйинлы возь вылэ поттылӥзы, созэ «вал кӧлытон» шуылӥзы. Со валъёсты сюдыны фуражлэн луымтэеныз герӟаськемын луэм, дыр. Ми быдэ вуон аръёсы валъёсты уйинлы кутьые ӧз поттылэ ини. Со сярысь агайёслэн верамъёсысьтызы кылыса гинэ тодӥсько. Отын, валъёс кыдёке медаз кошке шуыса, азь пыдъёссэс думылыса возь вылэ лэзё вылэм. Вал кӧлытӥсьёс уйез тылскем дорын пукыса, картофка пыжыса ортчытӥллям, валъёсты ӵукна, уже кыткон азязы гидазы ваиллям.