Сездән — сорау, бездән — җавап

— Аллаһка зикерне тавышсыз, эчтән генә әйтү яхшымы әллә инде башкаларга комачауламаганда, кычкырып әйтү дә дөресме?
— Бисмилләәһир-рахмәәнир-рахииим
Зикерләр эчтән, үзең ишетелерлек итеп, тел белән әйтелә, ягъни ирен селкенгән хәлдә башкарыла.

— Риялы гамәл, дип ишеткәнем бар. Ул нәрсәне аңлата?
— Риялы гамәл ул Аллаһ Тәгалә ризалыгы өчен булмаган, тирә яктагылар, башкалар күрсен өчен, бәяләсен өчен кылынган, ихлас булмаган гамәлгә әйтелә.

— Мәчеткә барырга мөмкинлек булмаганлыктан, җомга көнендә өйдә өйлә намазы җомга намазы вакытына кадәр укылса, ул кабул ителәме?
— Гозерле сәбәпле җомгага барылмыйча калган очракта, җомгага кадәр укылган намаз өйләдән китә. Өйдә башкарылган намазның җомга намазыннан соң укылуы хәерлерәк.