“Романтик”та саубуллашу кичәсе (+фоторепортаж)

Җәйнең бер ае үтеп тә китте. Ә менә "Романтик" ял лагерына ял итүчеләр өчен ул онытылмаслык мизгелләр белән истә калды, чөнки биредә үткән һәр көн бер-*берсен кабатламады. Очрашулар, ярышлар, конкурслар районыбызның төрле авылларыннан җыелган балаларны бер гаилә итеп берләштерде. Әйтергә кирәк, монда әйдәманнарның өлеше зур булды. Быелгы сезонда студентлар белән бергә мәктәп мөгаллимнәре дә тәрбияче булып эшләде. Лагерь ябылу тантанасында аларның хезмәтләрен югары бәяләп һәрберсенә рәхмәт хатлары тапшырдылар.

Балалар әти-әниләргә бик матур концерт тәкъдим итте. Флешмоб белән башланган бәйрәм чарасы нинди югарылыкта башланса, шундый нотада тәмамланды да.

12 июнь - Россия көне hәм хәтер көнен дә онытмаганнар иде, концертта алар да чагылыш тапты. Әлеге мизгелләрдә һәркемнең күзләрендә яшь иде.

Гадәттәгечә бәйрәм программасының иң кульминацион ноктасы "Шалкан" әкияте булгандыр. Елның - елында саубуллашу мизгелләре әлеге әкиятттән башка узмый, быелгысы аеруча күңелле булды.

Баязит Габдуллинның моңлы җырлары, яшь биючеләрнең чыгышлары да тамашачының көчле алкышларына күмелде.

- Сез лагерьга килгәндә барыгызның да йөзләрендә арыганалык сизелә иде. Сүз дә юк, 9 ай буе уку җиңелләрдән түгел.Ә бүген сез бик күркәм, рәхәтләнеп ял иткәнегез күренеп тора. Йөзләрегез балкый, - диде район мәгариф идарәсе җитәкчесе урынбасары Ләйсән Гатауллина лагерь ябылышында.

Чыннан да, балалар ялдан бик канәгать калды. Исән-имин, хәвеф-хәтәрсез үткән смена өчен җитәкчеләр дә куануларын әйтте.

Сау бул, "Романтик", матур көннәр, кызыклы очрашулар, яңа дуслар өчен чиксез рәхмәт сиңа.