Ӟаны школалы — 70 ар

Ӟаны гуртысь школалэн сизьым аръем луэмезлы куарусёнэ (сентябре) 70 ар тырме.

Ваньмылы тодмо, кыӵе секытэсь луиллям жугиськон но со бере аръёс. Сютэм но ёрмыса улонэн сэрен, Ӟаныысь, Кисальысь, Кутэшысь, Турья Починкаысь но мукет удмурт гуртъёсысь уноез пиналъёс начальной классъёс бере дышетсконзэс азинтыны ӧз быгатэ. Тӥни озьы, странамы ӧжытак пыд йылаз султыны кутскем бере, Ципья районысь партилэн райкомез но калыкез дышетонъя отдел Ӟаны гуртэ сизьым аръем школа усьтыны решение кутӥзы. Та ужез мытон капчи луымтэ, дыр. Малы ке шуид со понна материальной база но луымтэ. Вылаз ик, вылӥын вераса поттэм гуртъёсын со дыре шоръёзо тодон-валан басьтэм яке дышетӥсьлы дышетскем адямиос чылкак луымтэзы. Озьыен, дышетон понна кадръёсты люкан но лэчыт проблема луэм.

Нош та ужпумез быдэстымон, кышкатэк секыт уж борды басьтӥськымон чырмыт удмуртъёс ёросын со дыре но луиллям. Школалэсь материальной базазэ но юнматӥллям-паськытатӥллям, пиналъёслы тодон-валан сётыны дышетӥсьёс но люканы быгатӥллям. Районысь кивалтӥсьёс та ужлэсь палэнэ кыльымтэзы ке но, секыт ужлэн бадӟым люкетэз пӧртэм аръёсы школалэн директоръёссы луыса ужам адямиослэн пельпумъёсазы усем, дыр. Та статьяын вераськон мыноз тӥни соослэн куинез сярысь. Соиз жалямон, соос туннэ асьме пӧлын ӧвӧл ини. Асьсэлэн улон сюресъёсазы тодмо но тодмо луымтэ бадӟымесь ужъёс лэсьтыса, ӵош ужам эшъёссэс, дышетэм пиналъёссэс, асьсэлэсь матын адямиоссэс кельтыса, соос пыраклы югыт дуннеен люкиськизы. Нош калык понна лэсьтэм ӟеч ужъёс ноку уг вуно. Озьыен, соослэн нимъёссы Ӟаны школалэн историяз пыраклы кылёзы.

Ужез мытӥсь

Ӟаны сизьым аръем школалэсь кутсконзэ мытӥз но солэн нырысетӥ директорез луиз Семён Иванович Лобанов.

С.И. Лобанов вордскиз 1924 арын 9 сентябре Вукогуртын. Со дыре шоръёзо школаез йылпумъяны туж секыт ке но вал, соослэн выжыязы дышетскем адямиос луэмысь, сое но дышето, шоръёзо тодон-валан сёто.

Школаын дышетскыкуз ик ини азьпал улонзэ пиналъёслы сӥзьыны малпаз. Со дыре та котырысь удмуртъёс пӧлын дышетскем адямиос уно ӧй вал. Соин ик шоръёзо тодон-валанэн егит пи кӧня ке гуртъёсын пиналъёсты дышетэ. Дышетӥсь луон малпанзэ улонэ пыӵатыны малпаса, Казаньысь педагогической училищее дышетскыны пыре. Жугиськон кутскем бере районысь дышетӥсь воргоронъёслэн уноез фронтэ кошко. 1943 арын Семён Лобановлы но черод вуэ, со но жугиськонэ кошке. Нош солы, мукетъёслы сямен, фашистъёслы пумит кема ожмаськыны уг кылды. Со арын ик секыт сӧсырме. Бакуысь госпитальын кема эмъяськемез бере сое дор палъёсаз лэзё.

Жугиськонысь бертэм дышетӥсьлы соку ик уж сёто. Со Сырьяын но мукет гуртъёсын пиналъёслы тодон-валан сётэ. 1947 арын Кургем гуртысь дышетӥсь луыса ужась Надя нылын улонзэ герӟа.

1949 арын Ӟаныын сизьым аръем школа усьтон сярысь решение луэм бере, солы директоре кинэ тодмоян пумысен кема малпаськыса ӧз улэ. Дышетон ужын шӧдскымон опытэз луэм, хозяйственной ужъёсты но ӟеч валам Семён Ивановичез Ӟаны сизьым аръем школалы директоре тодмояло.

Мазэ веранэз, котькыӵе ужлэн кутсконэз капчи уг луы. Малы ке шуид ваньзэ сямен нольысен кутскыны тупа. Дышетӥсь кадръёсты, секыт жугиськон аръёсын сэрен дышетсконзэс куспетӥ карем пиналъёсты люкан, тодон-валан сётон понна материальной база луытон — таос ваньмыз но директор вылын луо.

Семён Ивановичлэн кышноезлэн Надежда Дмитриевналэн тодэ ваёнъёсысьтыз:

— Ужмы туж секытэн кутскиз. Тужгес но дышетӥсьёсты люкан секыт вал. Нырысьгес кык витетӥ классысь пиналъёсты кыкнамылы дышетыны тупаз. 50-лы матэ пиналъёсты дышетон понна классъёс ӧй вал. Пиналъёс сютэм сямен уло, вылазы — агай-апайёссылэсь кылем дӥсь, пыдъёсазы — кӧтьырмаен кут. Кыкетӥ араз ӧжытак шокчыны быгатӥм, дышетӥсьёс тырмыт луизы.

Ӟаные нырысетӥ лыктэменыз, Семён Иванович татысь коллективен 1954 арозь кивалтӥз. Солэн но татын ужась дышетӥсьёслэн тыршеменызы куинь класслы здание ӝутӥзы, улмопу садлы но бакча сиёнъёс будэтон участоклы нэгыз понӥзы, картофка бакча луытӥзы, ӧжыт ке но уксё поттыны уз луы меда шуыса, кроликъёс вордыны кутскизы, вал басьтӥзы.

Со аръёсы та школаын ужам Кузьма Семёнович Самсоновлэн тодэ ваёнъёсысьтыз:

— Ватсаса классъёс понна здание лэсьтонын кутсконысеныз пумозяз шуымон пиосмурт дышетӥсьёслы ужаны тупаз. Аслаз Семён Ивановичлэн киысьтыз котькыӵе уж потэ вал. Ваньмон дыръяз киысьтыз тӥрез шер усьылӥз. Киров областьысь кӧчыса кошкемъёслэсь корказэс сэрттыса ваеммы туннэ но уг вуны. Бусы сюресъёстӥ туж тэльмырыса бертӥмы. Одӥг полаз бусыын кӧлыны но тупаз.

Татын ужан аръёсы Семён Иванович ужлэсь люкиськытэк Ижевскысь педагогической институтлэсь биологияя факультетсэ йылпумъяз. Биологиез матын каремез улоназ но шӧдӥське вал. Бакчаын пӧртэм опытъёс ортчытъяз, уно дырзэ пиналъёсын кролик клеткаос котырын ортчытъяз.

Ньыль ар ӵоже Кургемысь школаын, Ципья райкомын инструктор луыса, «Азьлане» газетлэн редакцияз ужамез бере, 1958 арын со выльысь Ӟаны школалы директоре тодмояло. Соку татын дышетӥсьёслэн уноез Семён Ивановичен азьло ӵош ужам кадръёс вал али.

Соин ӵош ужам Вера Федотовна Карабаева-Захаровалэн тодэ ваёнъёсысьтыз:

— Паймымон адями вал Семён Иванович. Ку учкид, ялан кыӵе ке но ужен выре вал. Аслаз нылпиосыз луымтэысь меда, урокъёс бере но ялан пиналъёсын ӵош вал. Кызьы ке но, магнитэн кыскем выллем, пиналъёсты ас бордаз кыске вал. Пиналъёс куд-ог дышетӥсьёс шоры вазьыны но кышкало, школалэн директорез сярысь веранэз ик ӧвӧл. Нош Семён Иванович борды «лякисько но лякисько» вал ини. Маиныз ас бордаз озьы кыскыны быгатэм, дыр, туннэ но паймисько. Коллективен кивалтон сямыз но аспӧртэм вал. Кӧня ар ужай, одӥг пол но кужмо куаразэ ӧй кылы. Туж огшоры, монъяськонэз тодӥсьтэм адями вал.

Улонэзлэн берло аръёсаз Семён Иванович Ципья шоръёзо школаын дышетӥз. Туж вазь, 1977 арын югыт дуннеен люкиськиз. Малы меда каньыл сюлэмо, адямилы ялан ӟечсэ гинэ лэсьтэм адямиос улонысь сыӵе вазь кошко?!

Александр Кунаев.

(«Азьлане» газетлэн архивысьтыз)

Редакцилэсь: Гажано лыдӟисьёс, та статья «Азьлане» газетын печатласькем 12 июне 1999 арын, 20 ар талэсь азьло. Валамон, сомында ар куспын со дыре шонер луэм куд-ог фактъёс тросэз воштӥськемын. Соин но тае лыдэ басьтыса, статья интыен-интыен редактировать каремын.