Аспалмы «Татар сузе» чеберлыко кылъя телевизионной конкурсын вормисе потӥз

Огъя конкурсэ 3000 заявка кутэмын луэм. Выступлениосты куинь номинациосъя (проза, поэзия но нимысьтыз номинация) но тямыс арлыд категорияя (7 аресозь, 8-13 аресъемъёс, 14-17 аресъемъёс, 18 но солэсь бадӟымгес аресъемъёс, 15 но солэсь бадӟымгес аресъем автор-исполнительёс, творческой семьяос, профессионалъёс и нимысьтыз номинация «Туган тел») дунъяллям.

Со 3000 заявка пӧлысь 37-ез вормисе потӥз. 

Тани ма вера ачиз Екатерина Денисовна «Татар сузе» конкурсе пыриськемез, мылкыдъёсыз сярысь:

— Мон «Татар сузе» вожвылъяськон сярысь «Азьлане» газетысь тодӥ. Заявкаосты 2023 арлэн пӧсьтолэзьысеныз шуркынмон толэзёзь лэзьыны луэ вал. Видеоме, кытын мон аслэсьтым гожтэм кылбурме лыдӟисько, мон 30 шуркынмонэ гинэ лэзи али. Заявкаосты нимаз комиссия эскерем. Финалэ ортчи шуыса, мон южтолэзьлэн кутсконаз тодӥ. 13 южтолэзе «Шаян ТВ» телестудие ветлӥ. Отын вань финалистъёс асьсэлэсь дасям кылбуръёссэс яке прозаен ужъёссэс лыдӟизы. 

Конкурсэ 3000 пала уж лэзиллям. Соос пӧлысь 37-ез гинэ финалэ потэм. СВО ысь солдат но ужзэ лэзем, нош ранениез луэмен татчы лыктэмез луымтэ. Анаезлы сётӥзы кузьымъёссэ. Мынам но кык эшъёсы группа поддержкиын вал. Аслам ӵош дышетскем эше Михайлова Евгения Петровна но Вукогурт клубын ужась Перемечева Антонида Михайловна. Мон соослы туж бадӟым тау каремме вуттӥсько но тазалык но ужазы бадӟымесь азинсконъёс сӥзисько. Котьку шулдыр мылкыдо мед луозы соос, ужзылэсь шумпотон но капчи мылкыд мед шедьтозы. Семьяосазы тынӥсьлык сабырлык ог-огзэс валаса улон сӥзисько. 

Мон «Родная речь» ( «Туган теле») номинациын вормись луи удмурт калык пӧлын. Озьы ик та номинацие пыриськизы пор, мордва но чуваш калыкъёс но. Соос пӧлысь но вормисьёс лыктӥллям вал Гала-концертэ. Вань вал семьяен кылбур лыдӟисьёс но, профессионалъёс. Асьме ёросысь Карелино гуртысь Мардановъёслэн семьязы пыриськиз. Эшшо Балтась библиотекаын ужась — Зиля Ильязова вань вал. Ваньмыз 5 мурт асьме ёросысь луимы та праздникын. Организаторъёс туж капчи мылкыдо, шуныт пумитазы ваньзэ лякытэн гинэ валэктӥзы. Туж кельшиз Гала-концерт. Пыриськемелы шумпотыса бертӥ. Азьланяз но пыриськыны мед кылдоз. Мылкыд карисьёс тросгес мед луозы удмурт калык пӧлын но. Таяз Гала-концертын мон огнам вал. 

P.S.: 20 оштолэзе 15.00 часэн ТНВ-ын передача луоз шуыса веразы вал.

— Мон туж шумпотӥсько Екатерина Денисовналэн сыӵе бадӟым вожвыльяськонын вормыса потэмезлы. Озьы ик даньяськисько солэн талантэныз, куинь сюрс вожвылъяськисьёс пӧлын нырысетӥ инты басьтэменыз. Сое вань сюлмысен ӟечкыласько, азьпалан солы юн тазалык но шудо-буро улон сӥзисько, выль но выль творческой азинсконъёс, асьмелэсь удмурт кылмес мед данъялоз! Туж бадӟым тау кылъёсме верасько солы милесьтым Ципья черкогуртысь лулчеберетья юртысь удмурт фольклор ансамбльмес творческой номерзэ дасяны юрттыны ӧтемез понна. Со ӧтемен ми но бадӟым сценаын сомында калык азьын асьмелэсь чебер вашкала удмурт гуръя кырӟанъёсмес но эктонъёсмес возьматыса бертӥмы. Та вожвылъяськон милям сюлмамы пыӵаса кылёз шуныт малпанъёсын гинэ, куке асьме элькунамы ортчытӥське таӵе масштабен анай кыллы сӥзем вожвылъяськонъёс, асьмелэн анай, удмурт кылмы, озьы ик традициосмы улозы, — мылкыдъёссэ вуттӥз Ципья лулчеберетъя юртысь устолыкъя кивалтӥсь Евгения Михайлова.

Ми но (малпасько, ёросысь вань удмурт калык но итӥськоз) Екатерина Денисовна понна сюлмысь шумпотӥськом но, та бадӟым вормонэныз ӟечкыласа, выль творческой азинсконъёс сӥзиськом!

Тодады вайытон вылысь: конкурс «Татарстан — Новый Век» телерадиокомпаниен Бигер кылэз но Татарстанын улӥсь мукет калыкъёслэсь вордскем кылъёссэс утён, азинтон ужпумъёсъя Татарстан Республикалэн Раисэз бордын ужась комиссилэн юрттэмезъя ортчытӥське.