Юнлыклэсь но чиданлэсь куэм улон

Кышномуртлэн пельпум сьӧраз — быдэс эпоха, кудӥз тырмемын шуг-секытъёсын, ужен но ӟечезлы осконэн. Мария Николаевна Медведевалэн биографиысьтыз бамъёсты берыкъяку, валаськод: та нимаз адямилэн историез ӧвӧл, нош быдэс поколенилэн летописез — самой со поколенилэн, кудӥз вордскиз Быдӟым тыложлэсь азьло кышкыт вакытэ, улэп кылиз секыт ыштонъёсын пачылмем аръёсы но шаермес куашкан калэ вуэм югдурысь поттӥз но улӟытӥз. 

25-тӥ пӧсьтолэзе Мария Николаевна 90-тӥ вордскем нуналзэ семьяез — пиез, кенэз но внучкаез — пӧлын пумитаз. Та дано нуналэ сое ӟечкыланы вуылӥзы Покчи Лӧзя гурт поселениын ужасьёс. Соос асьсэлэсь но ёрос кивалтэтлэсь ӟечкыланъёссэ вуттӥзы, Таукарон гожтэт но синпель кузьымъёсты — шуныт тӧдьы шаль, бадӟым одеял но сяська керттэт — кузьмазы. Озьы ик юбиляр песянаез нимысьтыз ӟечкыланы лыктӥзы интыысь лулчеберетъя юртын ужасьёс но — Галина Петрова но Ринат Калимуллин. Соос Мария апайлэсь мылкыдзэ ӝутӥзы кузьымен но крезьгурен. Нош ми малпамы солэсь кузь но дано сюрессэ тодэ вайыны, быдэс ёрос калыкез та кышномуртэн тодматыны. 

Ожен ӵушкам пичи дыр 

Вордӥське Мария Николаевна огшоры крестьян семьяын Вылын Ушма гуртын. Николай атаез но Феодосия анаез ньыль пиналъёслы улон кузьмало: Семёнлы, Мариялы, Надеждалы но Михаиллы. Семья куанер, но огкылысь улэ, корка шугадӟон йыгаськытозь: Быдӟым тылож кутске но атайзэ фронтэ басьто. Со вордскем шаермес утьыны кошке но, ож бусыосы йырзэ поныса, уг ни берытскы. 

— Атайме воксё уг тодӥськы, войнае кошкыкуз, мон вить арес кылиськем. Анаймы огназ кылиз, кияз ньыль нылпи, — сюлэм вӧсьсэ вера Мария апай. (Нялтас вераса, ньыль нылпи пӧлысь туннэ Мария Николаевна гинэ вань).

Со кышкыт, сютэм аръёс луо. Анайзы колхозын ужа, туж тырше ке но, нылпиосты сюдыны-вордыны, кышкыт вакытэз чидан понна, семьялы куддыръя кураськылыны но тупа.

— Сютэмез но, кураськонэз но адӟиськиз. Вылын Ушма кузя кураськыса ветлӥм. Анай колхозын ужаз. Пичи гинэ коркамы вал, мунчо кадь. «Татын улом но, собере, кылдэм ке, бадӟымзэ лэсьтом», — шуэ, пе, вал атай, но лэсьтыса ӧз вутты... ӧз берты, войнаын быриз. Анай ньыль нылпиез будэтӥз. Кураськыса-кураськыса... Та быдӟа (чиньы пӧлызэ возьматыса — ред.) баранги кураса ветлӥмы. «Нош лыктыса вуиды-а ни тӥ? Бен, мынам барангие но ӧвӧл ук ини», шуэ вал одӥг гуртомы, но собере кытысь ке но шедьтыса поттэ вал, — курыт тодэ ваёнъёссэ маде песянай.

Но анаез понна тужгес секытэз эскерон луэ покчи пиеныз Михаилэныз люкиськемез. Мар карыны ёрмыса, кышномурт куинь аресъем пияшез мурт адямиослы будэтыны сётэ, нянь юдэс луоз шуыса оскыса. Но улон ас сяменыз ваньзэ лэсьтэ: пиналзэ басьтэм адями пичи пияшез чугун сюрес вокзалэ огназэ кельтэ. Ярано коть, вокзалын одӥг сэрегын бӧрдыса пукись пияшез бускель гуртын улӥсь воргорон синйылтэ но берен дораз вае. Озьы ке но Михаиллэн сюлмаз та яра быдэс улонэзлы кыле — со анайзэ будэм бераз но простить карыны уг быгаты. 

Улон сюресъёс но ужан нуналъёс 

Мария Николаевна сизьым классэз йылпумъя. Нырысь Улын Ушма покчиёзо школаын наукалэсь гранитсэ йыръе, собере Покчи Лӧзя школаын дышетсконзэ азьланьтэ. Но школа бере кутске бадӟым улон. Уждун утчаса, со гыбед дасяны мынэ — со туж секыт физической уж луэ пинал ныл понна.

— Сизьым классэз быдтэм бере мынэсьтым ӧжыт быдӟымгес нылмурт, Калпак Марпа шуо вал сое, монэ сьӧраз ӧтиз: «Ойдо, Мани, кошким али, мон тонэ сьӧрысьтым уг кельтӥськы, асьмеос Кирове мыном, торф поттонэ. Ойдо уксё но сётозы, кӧтыд но тыроз, уксёеныд мар ке басьтыса но сиёд», — шуиз. Ма, сизьым классэз быдтыса кужым луоз-а, мар-а? Мон отын кӧня ке толэзь ужай но, мынам уг луы ни: кужыме ӧвӧл. Куасьмем торфез пельпуме ошем корзинкае тырыса нуллоно вал. Сое скирдэз кадь сюро вал. Бадӟым, секыт, поныны уг луы, ачим пичи... Справка сётыса лэзизы, паспорт басьтыны. Доре бертӥ. 

Собере «Москвае стройкае нуо, мынӥськод-а?» шуыса, вербовщик лыктӥз. Соглаш луи. Но Казаньысен берытскыса бертыны тупаз: справкае вань, но аресэ уг тырмы, дас тямыстэк уг басьто вал. «Анай, мон табере нокытчы но уг потӥськы ни, — шуи бертыса, — тодэ ваёнъёссэ улӟытэ Мария Николаевна. 

Но егит ныл дораз пукыны уг чида: Мендюшысь (Арча ёрос — ред.) чугун сюрес лэсьтонъя трестэ ужаны интыяське. 

— Одӥг ар кадь улэм бере, Мендюше ужась, пе, кулэ, чугун сюрес лэсьтонэ. Отчы мынӥ. Кык-куинь толэзь гинэ ужай но учётчик карыса пуктӥзы. Отын нярак бигер нылъёс вал, соос ӟучен уг тодо, нош мон ӧжыт ӟуч сямен тодӥсько вал. Озьы учётчик луыса ужаны кутски, кӧня машина кӧня сюй вае, сое лыдъясько вал мон, — шуэ песянай. 

Ӵапак отын ик шудтэм учыр но луэ, кудӥз егит нылэз инвалид каре: Мария Николаевна бадӟым аварие шеде. 

— Нышыр время вал. Шофёр: «Пуксьы, мон тонэ переезд доры вуытозь нуо», — шуиз. Машиналэн подножкаяз султӥ, машина вылэ тубиз но мон уси но аварие сюри, кык пыды но сӧсырмиз. Мендюш больницае нуизы. Больницаын кыллён дыръя пыдъёсы сисьмыны кутскизы. Собере монэ Казане лэзизы, железнодорожной больницае. Мырдэм-мырдэм пуконэн ветлыны кутскиськем вал ини. Макесысь куме басьтӥзы но сӧсырмем интыям вуризы. Больницаын кыллён дыръя армиысь адскыны бертэм агае лыктыса вуиз. Кыӵе мон солы шумпотӥ! — тодаз вае Мария апай со дыръёсты. 

Кема толэзьёс ӵоже эмъяськон но улон мылкыд солы пыд йылаз султыны юртто. Озьы ке но тазалыкез чугун сюрес вылын ужаны уг лэзьы ни, одӥг арлы 3-тӥ группая инвалидность сёто (туннэ нуналэ 1-тӥ но 2-тӥ группаысь инвалид луэ), Мария Николаевна вордскем палъёсаз берытске. Со Балтасьысь мех арбериосты вурон фабрикае интыяське, отын скорнячка профессилы дыше. Куэн ужан понна бадӟым чидан но ювелирной точность кулэ вал. Ӵапак татын, вандылӥськон ӝӧк сьӧрын, со тырше 1992-тӥ арын дано шутэтсконэ потытозяз. 

— Мех вандылӥсько вал пӧзьы, куртка, воротник вурыны. Векчи кадьзэ пӧзьы каризы, бадӟым кулэсь воротник вандӥсько вал, уксёез но солэн бадӟымгес луэ вал — 80 манет, — Балтасьысь «Красный труд» артельын ужамзэ тодаз вае юбиляр.

Мария Николаевналэн огъя ужам стажез ньыльдон арлэсь ортче. Шумпотымон, кема аръёс ӵоже но тыршыса ужамзэ кивалтэт кулэезъя дунъяны но быгатэ: 1991-тӥ арын сое «Ужысь ветеран» медален пусъё.

Семья дунлыкъёс 

Мария Николаевналы личной улоназ но шуг-секытъёсын пумиськоно луэ. Нырысьсэ бызе Гондыргуртэ, но семья улонзы уг удалты, кема улытэк ик со картэз дорысь кошке. Озьы ке но улон солы кыкетӥ пумиськон кузьма — Покчи Лӧзя гуртысь Аркадий Медведев нимо воргоронэн.

— Вылын Ушмаын гурт пумын юмшало вал, мон но отчы потӥсько вал учкыны. Аркаш но тубе вал. Огпол со мон доры лыктӥз но: «Ойдо васькиськод-а мон доры?» — шуыса юаз. Одӥг арня мында малпаськи но: «Ма, васьки ке, васько ини», — шуи. Дорын ведь агае вань, пиналъёсыз будозы, пересьмем бере мултэс луо, шуыса малпай. Тӥни озьы ӵош луимы, — чик чеберъятэк вера Мария апай.

Аркадий агай семьяяз одӥг гинэ нылпи луэм, анаеныз гинэ улэм, атаез озьы ик ожлудын бырем. Атаез войнае кошкыку, со куинь арес кылем. Анаез скал кыскем, секыт улӥллям. Мария апай соос доры улыны лыктыку, корказы туж куашкам югдурын луэм: отӥ но сисьмем, татӥ но сисьмем. Собере лэсьтэм щитовой корказы но ӝог сисьмем. Мария апайлэн ӧкынон дыръёсыз но луиллям. Но улыса-вылыса ваньмыз ас ӧраз пырем. Ӵош соос кема аръёс ӵоже уло, Анатолий пизэс будэто. Аркадий агай колхозын гаражын ужам, толалтэ — школаын кочегар луыса. Сьӧд-сьӧд луыса бертэ, пе, вал, шуэ Мария апай. Жаляса верано, Аркадий Александрович туннэ улэп ӧвӧл ни, но со сярысь югыт тодэ ваён кузпалызлэн сюлмаз пыраклы кылиз. 

Туннэ Мария Николаевна Анатолий пиеныз улэ. Со фермаын холодильной установкаосъя слесарь луыса ужа. Вӧзаз — сюлмаськись Алёна кенэз но муспотон Алина внучкаез. Кенэз Покчи Лӧзя гуртысь медпунктын фельдшерлэн юрттӥсез луэ, Алина внучкаез туэ 9-тӥ классэз йылпумъяз но экзаменъёсты умой сётыса, Уржуме фельдшерлы дышетскыны пыриз. Яратоно Сергей внукез гинэ туннэ нуналэ дораз ӧвӧл, али армиын.

Внукез сярысь веракуз, песянайлэн синъёсаз шумпотон но данъяськон тылгизьыосыз пиштыны кутско. Внукезлэсь бертэмзэ туж вите, со дырозь улыны мед кылдоз шуыса мылкыд каре. Шуркынмон толэзе бертоно ни, нуналъёссэ лыдъяса вите песянаез. Быгатэмезъя юрттыны но тырше.

— Кема ӧвӧл ни, ӝоген бертоз, кылдэм ке. Со Ленинград дорын служить каре, солэн ужпумез — черк возьман. Инмар юрттэ. Туж гажало сое отын, — данъяськыса вера Мария Николаевна.

Внукез ачиз но котькуд жингыртэмезлы быдэ песянаезлэн улэм-вылэменыз, тазалыкеныз, нунал ортчытэменыз тунсыкъяське, шуныт кылъёс вера. Песянаез солы туж шумпотэ.

Нимысьтыз гажамон Мария Николаевналэн кенэз, со туж умой уте анайзызэ. Мунчое но ачиз пыртэ, миське. Мӧйы муртлэн тазалыкез но лябӟе, больницаын но кылльыны тупа. Соку но Алёна вӧзаз луэ, соин ӵош больницае выдэ. 

— Яра, Алёна вань. Инмар сётэм ини сое мыным, — шуэ Мария апай, кенэзлы тау каремэ вераса. 
Кенэз но анайзыезлэсь мылкыдзэ ӝутыса шуныт кылъёссэ вера.

— Тупаса улӥськом. Со милемыз котькуд нунал пӧсь сиёнэн пумита. Ачим ваньзэ дасяса, интыяса кельтӥсько но песяймы пӧзьтэ. Тау, ас дыраз пиналъёсты утьыны но юрттӥз, — шуэ Алёна.

Зэмзэ но шӧдӥське: та юртын кузёяське каньыллык, кудӥз куддыръя сокем уг тырмы туала дуннеын. Татын утё семья дунлыкъёсты, гажало пересьмонэз но тодазы возё, валтӥсь узырлык — со ӵыжы-выжыос шуыса. 

— Историе бадӟым, улонам пӧртэмез вал, ваньзэ вераса но уд быдты. Нош кӧня улыны кылдоз, кин тодэ. Но туннэ нунал понна Инмарлы тау. Туннэ мон шудо: семьяе вань, матысьёсы монэ гажало, утё. Коркае югыт, шуныт но шулдыр, —шуэ 90 аресъем улон сюресэз ортчем песянай. 

90 ар — со туж бадӟым вакыт. Со аръёс куспын курытсэ но веръяно, ческытсэ но шӧмъяно луиськод, дыр. Валтӥсез — сюлмын ӟечезлы осконэз утёно но котькуд нуналлэсь кадырзэ валано. Сӥзиськом сое тӥледлы но, Мария Николаевна! Кема дыр ӵоже тупаса, коркадылэсь шунытсэ но матысь адямиостылэсь саклыксэс шӧдыса улыны мед кылдоз. 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.