Казаньын но чузъяськиз вордскем кылмы

28-29 южтолэзе Казаньысь 12-тӥ гимназиын дышетон организациосысь но воскресной школаосысь вордскем кылъя но литературая быдэс Россиысь дышетӥсьёслэн вожвылъяськонзы ортчиз. Татчы пыриськизы асьме элькунысьтымы но Россилэн пӧртэм улосъёсысьтыз дышетӥсьёс. Соос мастер-классъёс возьматӥзы, озьы ик вордскем (бигер, ӟуч, чуваш, удмурт, пор) кылъёсын проектъёссэс утизы.

Пусйыны кулэ, таӵе вожвылъяськон нырысетӥзэ уг ортчы.

Конкурс «ТР-ысь кун кылъёсты но ТР-ысь мукет кылъёсты утён, дышетон но азинтон» кун программа улсын но дышетонъя но наукая Министерстволэн ужан планэз вылэ инъяськыса радъямын.

Кылъёсты утёнъя но азинтонъя элькун программаос арысь аре тросгес саклык висъяло нылпиослэсь но дышетӥсьёслэсь анай кылзэс гажан но данъян мылкыдзэс будэтонлы.

Туала дышетон сӧзнэтын трос пӧртэм вожвылъяськонъёс, ӵошатсконъёс, конференциос, проектъёс ортчо. Нылпиослэн рос-прос вераськемзы, асьсэлэсь малпанъёссэс шараяны быгатэмзы но котькуд удысэ вутскемзы куддыр паймытэ. Та ваньмыз дышетӥсьёслэсь, анай-атайёслэсь тыршемзэс но уж борды мылысь-кыдысь басьтӥськемзэс возьматэ. 
Анай кылъёс туннэ нуналэ быдэс шаермы понна оскымон сылӥсь борддор кадь луо. Ичи лыдъем калыкъёс понна та тужгес но кулэ луэ, малы ке шуоно соослэн кылзы но лулчеберетсы каллен ышыны кутске. Туала вакытэ медийной луись калык тужгес син азьын сылэ. 

Тулыс каникулъёсы радъям конкурс ортчиз Казаньысь «Ф.Г. Аитова нимо бигер кылын дышетонъя 12-тӥ номеро гимназиын». Вордскем кылъя но литературая дышетӥсьёслэн вожвылъяськоназы зональной этапаз ваньзэ 87 заявка кутэмын вал. Соос пӧлысь 50-эз гинэ конкурслэн йылпумъян (заключительной) этапаз вутскыны быгатӥз.

Нош 29 южтолэзе ини 50 дышетӥсьёс вормон понна нюръяськизы. Соос пӧлысь: 15 — бигер, 9 — ӟуч, 6 — чуваш, 5 — пор, 2 — удмурт, 1 — мордва но 12 мукет улосъёсысь вордскем кылъя но литературая дышетӥсьёс. Татын соослы «Семья но школа» темалы сӥзем проектъёссэс утёно луиз. 

Рос-прос вераськон искусствоен таланто луон сяна, дышетӥсьёс понна туж кылкутымон луиз ас калык сям-йылолъёсынызы тодматон но синмаськытон. Калыклэн чеберез — адямиослэн со шоры синмаськыса но тунсыкъяськыса учкемзы. Та ик дышетӥсьёслэн валтӥсь ужпумзы луиз — выступленизэс дунъясьёсты тунсыкъяськытон. 

Ужрадлэн сӥё-дано люкетэз «Хоррият» кафеын ортчиз. Вормисьёсты но призёръёсты сӥлы каронэ пыриськиз ТР-ысь дышетонъя но наукая министр Ильсур Хадиуллин. Шумпотымон, Балтась ёрослэсь данзэ утьыны Ӟаны шоръёзо школаысь покчи классъёсты но вордскем кылъя но литературая дышетӥсьлы оскемын вал. Евдокимова Галина Борисовна — кема аръёс ӵоже покчи классъёсысь нылпиослы тодон-валан сётэ. Узыр педагогической стажез вылэ пыкиськыса, Галина Борисовна пӧртэм дышетон технологиосты уже кутэ, школаын ортчем котькуд ужрадэ пыриське, дышетскисьёсыз но сое вормонъёсынызы шумпотто. Ачиз но палэнэ уг кыльы, котькуд вожвылъяськонэ пыриськыса, одно ик выльзэ басьтэ, ачиз но тросэзлы пример возьматэ, адӟем карымон луэ.

— Туж шумпотӥсько, сыӵе конкурсэ пыриськыны луонлык кылдӥз шуыса. Кык нунал куспын вордскем кылъя но литературая дышетӥсьёсын тодматским, эшъяським. Нырысь ик бадӟым тау шуэме потэ Балтась ёросысь дышетонъя управлениысь йӧскалык дышетонъя методистлы Фидания Сабировалы но школаысьтымы директорлэн дышетон ужпумъёсъя воштӥсезлы Олеся Яковлевалы. Озьы ик бадӟым тау шуэме потэ ӵош ужасьёслы, гуртоослы, эшъёслы. Нимысьтыз тау кылъёсме вераме потэ яратоно семьяелы. Ми ваньмы ӵош быгатӥм, вормим. Азьпалан но озьы ӵошен-ӵошен ужаны мед кылдоз. Ваньдылы туж бадӟым тау, — шумпотонъёссэ гожтӥз дышетӥсь аслаз мерлыко бамаз. 

Галина Борисовналы азьланяз но бадӟымесь вормонъёс сӥзиськом! Котькуд ужады адӟем карымон бервылъёсын данъяськыны мед быгатоды. Дышетон ӧнерады нылпиостылэсь тыршемзэс, мылкыдо ужамзэс мед адӟоды. Тыршыса лэсьтэм ужъёсты азьланяз но узыр емышъёсынызы шум мед поттозы!